هغه ډله چې ځان ته یې داعش نوم غوره کړی، په خپل زېږېدلي ټاټوبي کې د ترهګرۍ او وېرې خپرولو په فعالیتونو پيل وکړ او څه موده یې هلته خپل شوم او ناوړه حضور ته دوام ورکړ؛ خو د وخت په تېرېدو، دوی د ډېرو سختو سیمهييزو او نړیوالو ستونزو او ننګونو سره مخ شول، چې همدا حالت د دوی بنسټونه ولړزول، نظم او سیستم یې ورته ټکنی او ګډوډ کړ.
داعش، چې تل د ورانکارۍ او ناوړه موخو پټ ارمانونه له ځانه سره لرل او لري؛ هڅه وکړه چې خپل شوم پلانونه نورو سیمو ته هم وغځوي، تر څو د فساد او وېرې لمن پراخه کړي.
د همدې هدف لپاره، دوی له مخکې نه پلانونه ترتیب کړل، چمتووالی یې ونیوه او د اسلامي هېوادونو نورو برخو ته یې مخه کړه، هلته یې د خپل ناپاک فکر تخم وشینده؛ هغه فکر چې له وجوده یې تباهي، فساد او بربادي څاڅي او له هېڅ اسلامي ایډیالوژۍ سره یې هیڅ ډول همغږي نه لیدل کېږي.
داعش د دې پر ځای چې د اسلام د سپېڅلو ارزښتونو پیغام خپور کړي، کوښښ یې وکړ چې خلک له دین او د بشر د نجات لپاره د رالېږل شویو آسماني تعلیماتو څخه کرکه پیدا کړي، دوی د ارتداد او له دین څخه د مخ اړولو زهرجن فکرونو ته وده ورکړه، تر څو د خلکو په زړونو کې له دین سره دښمني وزېږي.
دا د حیرانتیا خبره نه ده چې دا ډول فکر د اسلام له اصلي روح سره دومره په ټکر کې دی، چې هر څوک که لږ هم د دوی په اړه څېړنه او پلټنه وکړي دا حقیقت به ورڅخه پټ پاتې نه شي.
د «خراسان ولایت اسلامي دولت» هغه څانګه ده چې د داعش له مرکز (عراق او سوریه) سره تړلې ده، دا څانګه د دې موخې لپاره رامنځته شوې چې د افغانستان په خاوره کې د فساد او وحشت تخم وشیندي او خلک د اسلامي جهاد له نوم او مفهوم څخه بېزاره کړي.
داعش چې د وېرې خپرولو له لارې شهرت ترلاسه کړی، په افغانستان او نورو اسلامي هېوادونو کې د نفوذ ساحې جوړولو هڅې کوي، په ځینو سیمو کې، د خلکو له همکارۍ برخمن شوی او هلته یې خپل پټ او تور ځواکونه تنظیم کړي، خو له دې ټولو پلانونو او هڅو سره سره، د اسلامي نړۍ ډېر هېوادونه داسې دي چې د دې تور تفکر لپاره یې هېڅ ځای نه پرې ایښی او نه به پرېږدي.
ولې داعش باید څانګې ولري؟
هره هغه ډله یا فکر چې غواړي خپل نفوذ پراخ کړي، اړ ده چې د ځان لپاره مختلفې څانګې، نومونه او بڼې ولري، تر څو په بېلابېلو سیمو کې ځان ته ځای ومومي، داعش هم چې د کلونو راهیسې د اسلامي ارزښتونو ضد یو تفکر خوروي، اړ شو چې خپل فکرونه د سیمې د شرایطو سره سم، په بېلابېلو نومونو، بڼو او جامو کې وړاندې کړي، له همدې امله یې د «داعش خراسان» تر نامه لاندې، دا پلید فکر افغانستان ته وارد کړ؛ هغه هېواد ته چې تل د مجاهدینو د خوځښتونو مرکز پاتې شوی او د اسلامي امت لپاره د امید څراغ ګڼل شوی دی.
په پراخه کچه د وېرې خپرول، یو پخوانی سیاسي ـ نظامي تاکتیک دی، چې د سیمې او نړۍ ډېری ځواکونه یې تجربه کوي، په ننني سیاسي ډګر کې، چې نظامي بڼه یې غالبه شوې، د نفوذ پراخوالی یوه مهمه وسیله بلل کېږي.
داعش هڅه کوي چې له بېلابېلو سیمو څخه ګټه واخلي، تر څو د نفاق او وحشت تخم خپور کړي، دا یو له هغو لاملونو څخه دی چې دوی ته د یو څه کامیابۍ بڼه ورکړې، خو تاریخي شواهد ښيي چې دا ډول اندونه، که څه هم موقتي پرمختګونه ولري، بالاخره له ماتې سره مخ کېږي.
داعش افغانستان ځکه غوره کړ، چې دا خاوره د تاریخ له سترو اتلانو، مجاهدینو او مبارزینو د زېږېدنې ځای ګڼل کېږي، هغوی دا ګومان کوي، که دا نه ماتېدونکی هېواد تر کنټرول لاندې راشي، نو کولای شي خپل افراطي فکرونه په آسانۍ سره پلي کړي.
افغانستان هم په واقعي توګه او هم د نړیوالو په نظر، یوه ستراتیژیکه او جیوپولیتیکي سیمه ده؛ داسې سیمه چې تل د نړیوالو او سیمهییزو قدرتونو د پام وړ سیمه پاتې شوې، داعش هم د دې حقیقت پر بنسټ پوه شوی چې دا خاوره، له خپلو ځانګړو موقعیتونو او د اصولو پابند وګړو سره، باید تر واک لاندې راولي، ځکه که دا کار ورته بریالی شي، نو دا به د دوی لپاره یو ستره او تاریخي لاسته راوړنه وي.
