د نړۍ او هیوادونو ترمنځ د متقابل احترام او ګټو لپاره یو اصل دا دی چې خپله خاوره او پالیسي به د ګاونډیو او نورو سیمهییزو هیوادونو په زیان نه استعمالوي. د ځمکې پر مخ د غدر او توطیې په سبب جوړ شوي رژیم، تل هڅه کړې ده چې خپله خاوره او پالیسي د ګاونډیو او سیمهییزو هیوادونو په زیان او د هغوی پر وړاندې د ګواښونو د رامنځته کولو لپاره وکاروي.
د داعش د ځینو مهمو غړو او اشخاصو نیول کېدل، هغه هم په څو هیوادونو کې، او د دغو غړو او اشخاصو اعترافونه، چې د پاکستان له خاورې او د دغه هیواد د پوځي رژیم تر چتر لاندې فعالیتونه ترسره کېدل، هغه څه دي چې د پاکستان د پوځي رژیم له لوري د پاکستان خاورې د سیمې هیوادونو په ضرر د استعمال څرګندونه کوي.
په تېرو څو کلونو کې د افغانستان اسلامي امارت له لوري د داعش د غړو او بریدګرو نیول کېدل او بیا د دوی اعترافونه چې د پاکستان په بېلابېلو سیمو کې روزل کېږي، او دا چې د دوی بشپړ ملاتړ او روزنه د یاد هیواد د پوځي او استخباراتي کړیو له خوا ترسره کېږي، د یادو ادعاوو یوه برخه جوړوي.
د ترکیې د MIT استخباراتي ادارې له لوري د داعش هغه غړی نیول شوی چې په ترکیه کې یې د رسنیزو تبلیغاتو مسؤلیت درلود. د هغه اعتراف دا و چې دوی د روزنې او استوګنې مرکزونه د پاکستان په بلوچستان کې لري. د دغو مرکزونو په اړه د افغانستان اسلامي امارت پخوا هم مستند راپورونه او کاپي شواهد نړیوالو او د ترکیې په همکارۍ د پاکستان له رژیم سره د مذاکراتو پر مهال شریک کړي وو. خو اوسني شواهد، چې په ترکیه کې د داعش د تبلیغاتو د مسؤل احمد کازانجي اعتراف هم پکې شامل دی، نه یوازې د افغانستان د استخباراتي نظام دقت، ځیرکتیا او ریښتینولي په ګوته کوي، بلکې دا هم څرګندوي چې د پاکستان خاوره د دغه پوځي رژیم له لوري د ناوړه موخو لپاره کارول شوې ده.
د پاکستان پوځي رژیم د خپلو ناوړه موخو او اهدافو لپاره نه یوازې د پاکستان خاوره استعمال کړې، بلکې له نړیوالو تړونونو، تعهداتو او بهرنۍ پالیسۍ څخه یې هم څرګنده سرغړونه او ناوړه استفاده کړې ده. په نړیواله کچه دغه سرغړونې او ناوړه استفادې د پاکستان د پوځي رژیم له لوري دوام لري، چې د پاکستان د پوځي رژیم له خوا د امریکا او اسرائیل د ګټو لپاره د فعالیتونو څرګندونه هم کوي. هر هغه هیواد چې د امریکا او د هغې د متحدینو په زیان کې واقع وي، د پاکستان پوځي رژیم د خپل باطني او ظاهري حیثیت له مخې د شر او فساد د اور په پراخولو کې رول لوبوي.
داعش نه یوازې دا چې په افغانستان او ترکیه کې یې د یوه کال په موده کې خونړۍ پېښې پلان کړې وې، بلکې د افغانستان او نورو سیمهییزو هیوادونو، لکه روسیې، پر ضد یې هم ورته پلانونه او فعالیتونه ترسره کړي دي، څو هغه هیوادونه چې له افغانستان سره د ګټو او ښو اړیکو پر مسیر روان دي، پر افغانستان شکمن او بېباوره کړي.
