بدرالدین د سلطان غازي خداوندکار (لومړي مراد) په وخت کې زېږېدلی و، په کوچنیوالي کې يې له خپل پلار څخه حساب یا اکتساب زده کړ، قرآن کریم یې حفظ کړ او بیا یې لومړني کتابونه له پېژندل شوي عالم مولانا شاهدي څخه ولوستل.
د صرف نحو يو څو کتابونه یې له مولانا یوسف څخه ولوستل بيا مصر ته ولاړ، د سید شریف جرجاني او مولانا مبارک شاه منطقي له مدرسې څخه یې په قاهره کې د اکتساب علم ولوست، بیا یې له مبارک شاه سره د بیت الله حج وکړ او په مکه شریفه کې له شيخ زيلعي سره شاګرد شو، له مکې مکرمې څخه بيا قاهرې ته ولاړ او د سید جرجاني په شتون کې يې له شيخ اکمل الدین (بایبوري) څخه گټه واخیسته.
شیخ اکمل د مصر مملوكي سلطان (فرج بن سلطان برقوق) استاد و کله چې (شيخ بدر الدين) له ظاهري زده کړو فارغ شو نو له تصوف سره یې شوق پیدا شو، نو د مصر د هغه وخت لوی روحاني شخصیت سعید اخلاطي ته ولاړ او د هغه په لاس یې بیعت وکړ، شيخ اخلاطي هغه تبريز ته واستاوه، تر څو خلکو ته د الله – الله ويل او په همدې کلمه د عمل كول ور زده کړي.
ويل کېږي کله چې ګود تیمور تبریز ته راغی نو د بدرالدين یې ډېر قدر او عزت وکړ او ډېر مال يې ورته ډالی کړ، هغه دا ټول مال پریښود او روان شو لومړی بدلیس ته ولاړ بیا یې د مصر په لور سفر وکړ، له هغه وروسته له حلب او کوينه څخه د روم بښنار (تبره) ته ورسېد، دلته یې د ساقز جزيرې د رئیس چې په مذهبي ډول عیسوی و بلنه ترلاسه کړه.
بدرالدین د هغه د دعوت په اساس ساقز ته ولاړ، نصراني امير د هغه په لاس د اسلام بیعت وکړ، له دې وروسته چې کله موسی بن سلطان د غازيتوب اقتدار ته ورسېد، نو دی یې په قضا و گماره، موسی د خپل ورور (محمد) له لاسه ووژل شو، نو بدرالدين له خپلې کورنۍ سره بندي د ازنيق ښار ته راغی.
از نیق په ترکيه کې د یو ښار نوم دی، بدرالدین خلکو ته د خپل فاسد او ناسم مذهب په لوري دعوت پیل کړ، هغه به خلکو ته په دینونو مال او متاع کې د برابروالي دعوت ورکاوه، د مسلمان او نامسلمان د عقیدو تر مینځ توپیر ته قایل نه و، هغه به ویل له دین او نظر پرته ټول انسانان ورونه دي.
د يهودي ماسونیت همدا دعوت و، د دينونو د یووالي دا دعوت جاهلانو، ناپوهو او د وخت تابع خلکو ښه په اسانه ومانه او د بدرالدين د دعوت د مشهوروونکو شمېر زيات شو، کومو خلکو چې به د بدرالدین د منهج او مذهب دعوت کاوه، نو په دې کې د يو کس نوم ډېر مشهور شو، چې هغه ته به پیر قلیجه مصطفی ویل کېده له ده پرته (طوره کمال) چې په اصل کې د یهودو له نسله و، ډېر مشهور شوی و.
یهودان د رسول الله صلى الله عليه وسلم له وخته تر ننه د مسلمانانو په وړاندې پلمې جوړوي، په هر حال؛ د وحدت الادیان دا باطل مذهب په بشپړه اندازه خپور شو، پیروان یې ډېر شول، تر دې چې د دې باطلې عقيدې را گرځېدنه د محمد چلبي تر غوږو ورسېده، سلطان له بدرالدین سره د مقابلې لپاره یو لوی لښکر را واستاوه، خو افسوس چې د دې لښکر سپه سالار سیسمان کوم چی محمد چلبي را استولی و د (پیر قلیجه) له لاسه ووژل شو او دا لښکر مات شو.
سلطان د خپل ځانگړي وزیر (بایزید پاشا) په مشرۍ یو بل لښکر روان کړ، هغه پیر قلیچه ته په (قرة بورنو) کې ماتې ورکړه او په پیر قلیچه مصطفی یې د جنګ حد تطبیق کړ.
