د هېوادونو ترمنځ په اړیکو کې صبر، زغم او بردباري د ډیپلوماسۍ او د کړکېچونو د مدیریت له مهمو اصولو څخه ګڼل کېږي. افغانستان هم د تاوتریخوالي د زیاتېدو د مخنیوي، د سیمې د ثبات د ساتنې او د خبرو اترو لپاره د مناسب فرصت د برابرولو په موخه، ځینې وختونه د پاکستاني رژیم د کړنو پر وړاندې له بېړني غبرګون څخه ډډه کړې ده؛ خو تجربو ښودلې چې که صبر او نېک نیت په پرلهپسې ډول تکرار شي او مقابل لوری یې په سمه معنا درک نه کړي، نو ښايي هغه د کمزورۍ نښه وګڼي او ترې ناوړه ګټه پورته کړي.
په وروستیو کلونو کې د افغانستان او پاکستان اړیکې ورځ تر بلې ترینګلې شوې دي. د پاکستان رژیم د افغانستان د نظام او امنیت د ګډوډولو لپاره د بېلابېلو پلمو او تورونو تر سیوري لاندې له هر ډول دسیسو او ناکامو پلانونو څخه کار اخیستی دی. دغه رژیم څو څو ځله هڅه کړې چې د داعش په څېر نیابتي ډلې وروزي او د افغانستان اوسنی نظام کمزوری کړي، څو د نړۍ پام دې ته راواړوي چې ګواکې افغانستان د بېلابېلو ډلو د حضور او فعالیت په مرکز بدل شوی دی.
پاکستاني رژیم د خپلو شومو موخو د تحقق لپاره بېلابېل جنایتونه او تېروتنې ترسره کړې دي او څو څو ځله یې د افغانستان له صبر، زغم او حوصلې څخه ناوړه ګټه اخیستې ده. حال دا چې هر نظام هڅه کوي د ستونزو پر وړاندې لومړی سیاسي او ډیپلوماټیکې لارې وازمويي. په بهرني سیاست کې صبر او زغم د کمزورۍ معنا نه لري؛ بلکې ډېر وخت د تدبیر، هوښیارۍ او د احساساتي غبرګونونو پر ځای د لوړو ملي ګټو د ترجیح نښه وي.
افغانستان په ډېرو مواردو کې هڅه کړې چې شته ستونزې د خبرو اترو، تفاهم او تعامل له لارې حل کړي؛ خو کله چې دښمن دغه زغم او بردباري د کمزورۍ نښه ګڼي، نو له دې وروسته باید د خپلو هر ډول خوځښتونو او تېروتنو پایلو ته هم متوجه وي او د متقابلو ځوابونو تمه ولري. که په ګوته ګوزار وکړي، په سوک به ځواب ترلاسه کړي. نور به ظالمانو او د هغوی نیابتي ډلو ته د فعالیت او ظلم کولو فرصت ورنه کړل شي.
د اسلامي امارت تګلاره بدله شوې ده. له دې وروسته به هر احتمالي ګواښ تر عملي کېدو وړاندې وپېژندل شي، شنډ به شي او له منځه به یووړل شي. د دوی موخې او پلانونه په بشپړ ډول روښانه شوي دي او هېڅ دفاعي سیستم به یې د افغانستان د بېپیلوټه الوتکو د تېرېدو خنډ ونه ګرځي. دغه رژیم او د هغه مصنوعي ډلې، که هر چېرې ځانونه پټ کړي، د افغانستان او سیمې د امنیت د خوندي ساتلو په موخه به له منځه یووړل شي.
