د افغانانو په لرې او نږدې تاریخ کې څوک دا نه شي په ډاګه کولی، چې افغانانو دې پر چا تعرض کړی وي؛ خو دا هم نه شي ثابتولی چې تعرضونو دې افغانان اېل کړې وي. له سکندر مقدوني بیا تر مغلو، له مغلو تر ګورګانيانو، له ګورګانيانو تر انګریزانو، روسانو او امریکایانو پورې افغانانو د الله جل جلاله په نصرت د هر یرغلګر شړۍ داسې ور ټوله کړې، چې کله يې هم بیا د پورته کېدو ځواک نه دی موندلی.
د پاکستان پوځي رژیم چې له اقتصادي او سیاسي اړخه له سختو ننګونو سره مخ دی او په کور دننه یې مسلمان ولسونه ناراضه کړي، له هېڅ ګاونډي هېواد سره رغنده اړيکې نه لري او پر يوه مقبوضه جغرافيه د ترهګرۍ د ملاتړ لپاره ودان شوی؛ هڅه کوي خپلې بدنامۍ پر افغانستان ور واچوي او ځان د افغانستان پر ځای سپېڅلی او ډېر شریف معرفي کړي.
د ورسپارل شوې دندې له مخې، چې هغه په سیمه کې د ناامنۍ خپرول، د ترهګرو او داعشي خوارجو ساتنه او پالنه، د لویو اقتصادي لارو او پروژو په وړاندې خنډ او ځنډ رامنځته کول او تر دې ټولو بده د اسلام او مسلمان بدنامولو دي؛ یو ځل بیا یې هڅه کوله، چې د افغانستان اسلامي امارت په ديني، اقتصادي او سیاسي لحاظ ترفشار لاندې راولي.
د همدې لپاره يې ديني علماء کرام شهيدان کړل، لویې اقتصادي لارې یې بندې کړې، په نړیوالو دریځونو یې د اسلامي امارت د بدنامۍ چغې وکړې، داعشي خوارج یې وروزل، د پرځېدلي جمهوریت اربکیانو او ناکامو چارواکو ته یې تبليغاتي او تسليحاتي امکانات برابر کړل او د خپل ترهګر پوځ په لاس یې د افغانانو عام کورونه او بنسټونه بمبار کړل.
د افغانستان اسلامي امارت ټولو اسلامي ارزښتونو، بشري حقونو او سیاسي قوانینو ته په پام هر څه د خبرو له لارې حل کول غوښتل، خو پايله يې د اجېرې پاکستانۍ پوځي ادارې د جسارت او زوړورتیا شوه. بلاخره افغان حکومت هم په ورته اقدام لاس پورې کړ؛ ځکه افغانان د ظالمو، جابرو، تېريګرو، ترهګرو او یرغلګرو په له منځه وړلو کې ویاړلی او ریښتنی تاریخ لري.
د افغانستان اسلامي امارت له وروستیو چټکو عملیاتو، چې په بلوچستان او مقبوضه پښتونخوا کې ترسره شول او په پایله کې یې ګڼ شمېر داعشیان، اربکیان او د افغانستان د امن شریر عناصر له منځه لاړل، دغه راز د اسلامي امارت د مسؤولینو له څرګندونو، د دفاعي ادارو له کړنو او د رسنیو له خپرونو څخه دا په ډاګه ښکاري، چې وروستي عملیات په څرګنده د پاکستان له پوځي رژیم سره د جګړې اعلان دی او تر دې وروسته به د ګواښونو، دفاعي او انتقامي عملیاتو پر ځای، تعرضي عملیات کوي او ټول هغه ګواښونه به په نطفه کې له منځه وړي، چې د افغانستان اسلامي امارت د ناامنۍ او ګواښونې لپاره د تشکیل په حال کې وي.
ددې تعرضي عملیاتو په وړاندې د نړیوالو بنسټونو، سیمیزو هېوادونو، قومي جرګو او مرکو ژبې او لاسونه ځکه تړلي، چې د افغانستان اسلامي امارت دغه ډول مذاکراتو ته ډېر وخت انتظار وکړ، چې کومه پایله یې ور نه کړه؛ نو د روان وضعیت د هر ډول بدو پایلو پړه د پاکستان پوځي رژیم ته ورګرځي او مسؤولیت یې لري.
