کله چې په عراق کی د دولت اسلامي په نوم يوه ډله جوړه شوه، او د اسلامي خلافت تش په نامه چيغې يې پيل کړلې، ډير خلک یې په چل او دوکې سره د ځانو ملګري کړل، آن تر دې چې د القاعده نړيوال جهادي تنظیم له ډلې څخه هم ځينې مجاهدين پرې وغولېدل او ورسره ملګري شول، په دې سره يې د عراق پراخه سيمه تر کنترول لاندې راوستله.
خو د القاعدې اکثره مجاهدين چې له پیله يې داعش ته د یو تکفيري ډلې او خوراجو نسبت کاوه، او د دې لپاره چې د دوی له فتنو خلاص وي او خپل جهاد ته ادامه ورکړي نو له عراق څخه سوريي (شام) ته لاړل او هلته يې د جبهة النصرة په نوم د بشار الاسد وحشي عسکرو سره په جهاد پيل وکړ، ډېرې سيمې يې تر خپل کنترول لاندې راوستلې.
داعشيانو چې په عراق کې ډېرې وسلې او مهمات په لاس ورغلي وو، په سوريه (شام) کې ورته د جبهة النصره پرمختګونه د زغملو نه وه، نو ويې غوښتل چې د عراقي حکومت په ځای سوريې (شام) ته مخه کړي، ترڅو هلته د القاعدې ډلې (جبهة النصره) مجاهدينو د پرمختګ مخه ونيسي ، او کومې سیمې چې د دې جبهې په لاس کې دي هغه ترې ونيسي. نو د خپلې ډلې نوم يې په الدولة الاسلامية في العراق والشام باندې بدل کړل او په شام کې يي له القاعدې سره جنګ پيل کړل.
غربي رسنیو په سوريه کې د جبهة النصره د نوم ورکولولو لپاره داعش ته انعکاس ورکړ، دومره شهرت وموند چې د القاعده نړيوال جهادي تنظیم يې د خلکو له ذهنو نو څخه هېر کړ.
تر دې وخته که څه هم په عراق او سوريه کې د داعش اصلي څېره خلکو ته معلومه شوې وه، خو دلته په افغانستان کې اصلي حقیقت تر ډېره وخته خلکو ته نه و څرګند.
زما د طالبۍ د شرح جامي درجه وه، د داعش تبليغاتي وډیوګانې چې ډېر شهرت يې ترلاسه کړی، ټولې به مو لیدلې، د عامو مسلمانانو په څېر به مونږ هم ورته دعاوې کولې، او کله کله به مو له علماؤ هم دوی ته د کامیابۍ دعاء غوښتنه کوله، خو علماؤ د دوی په هکله سکوت کاوه او دوی په اړه به يې، بیا هم هیڅ نه ويل خو زما په زړه کې یې ډېر ځای نیولی وو.
رابه شو اصلي هدف ته، یوه ورځ مو له استاذه د داعش په باره کی پوښتنه وکړه چې دا خو والله ډېر تکړه مجاهدین دي، الله دې افغانستان ته هم راولی، استاذ مو یوه لحظه چوپ شو، بیا یې وویل نه ! الله دې داسې نه کوي که چېرته راغلل نو بیا به پرما اوتا هم د کفر او شرک ټاپې ولګوي.
دا هغه وخت وو چې د پاکستان په اورکزي اجنسۍ کې پوځي عملیات پای ته رسیدلي وو او په اورکزیو کې هغه تش په نوم طالبان چې د تحريک طالبان پاکستان لخوا بیل شوي وو، د افغانستان تر پولو رسېدلي وو، څومیاشتې لا نه وې پوره چې دوی ته د ولسمشر اشرف غني لخوا د جلال اباد په ښار کې د اوسېدو اجازه پیدا شوه، نو دوی ټولو ته د جلال اباد په ښار کې د اوسېدو زمینه برابره شوه، آن خبره تردې ورسېده چې کوم څوک به چې له دوی سره ملګری وو هغه به جلال اباد ښار ته ځان رساوه، له دې وروسته دوی د افغان دوه سري حکومت او د جانکیري لخوا اکمالېدل، کله يې چې اکمال بشپړ شو، نو په ننګرهار کې پاکستان سره پوله درلودونکو ولسوالیو ته يې ولېږل او د داعش په نوم یې په افغانستان کې خپله ډله فعاله کړه.
طالبانو چې دا هرڅه لېدل ، پوره له صبر، حوصلې او ډېر له احتياط يې کار اخست، خو دوی په ډېر تدبير او تکتيک سره لومړی د طالبانو د ننګرهار والي مولوي مير احمد ګل د بهرنيو استخباراتي کړيو په مرشته په شهادت ورساوه، او ورسره جوخت يې په ننګرهار کې ډېر تکړه او فعال مجاهدين او ولسوالان لکه قاري عبد الله په ناخبرۍ سره د بريد لاندې راوستل او په شهادت يې ورسول، او له طالبانو څخه يې د ولسواليو د نيولو په موخه پراخه بريدونه پيل کړل.
طالبانو کولی شول چې په لومړي سر کې په ډېره اسانۍ د داعشیانو د دې برېدونو مخه ونيسي، خو د امارت مشرانو لخوا د دوی په وړاندې ورته د جنګ کولو اجازه نه وه، او د نوي والي او معاون لخوا ورته امر وشو چې دوی سره جنګ مه کوئ او سيمې ورته پرېږدئ. آن خبره دې حد ته ورسېدله چې په هره ولسوالۍ به دوی بريد پيل کاوه، طالبانو به په مکمل ډول دغه ولسوالۍ دوی ته پرېښودله، په دې سره په څو ورځو کې تقريبا ۸ ولسوالۍ چې مخکې د طالبانو په لاس کې وي په بشپړ ډول د داعش په لاس کې ولوېدلې، او طالبانو نورو ولسواليو ته شاتګ وکړ.
داعيشانو په نوو نيول شوو ولسواليو کې په خلکو ډېر زيات زور، زیاتی او وحشتونه ترسره کړل، څوک به يې وهل چې ستا پايڅي ټيټي دی، څوک به يې وهل او وژل چې طالبانو سره اړيکې لرې، آن تر دې چې ځينې د مسجدونو امامان چې حنفي مذهبي علماء وو په ډېره بې رحمۍ یې ووژل. کومو خلکو چې د دوی وسله وال ملاتړ نه کاوه، مرتدين يي بلل او د هغوی ښځې او ماشومان يې ځانو ته وينځې او غلامان کړل، قومي مشران او سپينګيري او ځينې په لاس ورغلي طالبان یې په ډېره بې رحمۍ او وحشت سره ووژل.
د ننګرهار غیرتي مجاهد ولس د صبر کاسه ډګه شوه، او اسلامي او افغاني غیرت نور اجازه نه ورکوله چې د دوی په وړاندې
غلي پاتې شي او دوی دې پرې وحشتونه ترسره کوي. له طالبانو يې وغوښتل چې افغانان نور د دوی له شره وژغوري.
طالبان چې هسې یې هم د خپلو ملګرو په شهادت نوره د صبر کاسه ډکه وه، د داعش لخوا د ننګرهاریانو په وژلو او د وينځو په نامه د هغوی په ناموسونو د تيريو کولو زغم يې بيخي نه درلود. نو د علماؤ کرامو په فتوا او د امارت د مشرانو په امر يې د خپل مسلمان ولس د ژغورلو په موخه په دوی پراخ عمليات پيل کړل، چې په ډېره کمه موده کې يې ترې ټولې سيمې ونيولې، او داعشيان مجبور شول چې د پولې اخوا واوړي.
خو د لنډ ځنډ وروسته بيا يې د پولې له هغې خوا په طالبانو بريدونه په داسې حال کې پیل کړل چې د امریکایانو او د هغوی د لاسپوڅو توپونو او الوتکو يې مرسته کوله. خو کله چې د سختو بمباريو او بې پیلوټه بريدونو له امله ډیر طالبان شهیدان شول بالاخره داعشیان وتوانیدل چې ځينې سرحدي سيمې بیا ونيسي. اوس له همغو سیمو وخت ناوخت په ولس او طالبانو بریدونه کوي.
لنډه دا چې دا پروژه د امریکا او د افغان حکومت د هوايي او ځمکني ګډ ملاتړ له مخې ورځ تر بلې زیاتېدله، چې د افغان حکومت يو جګپوړي چارواکي حاجی عبد الظاهر قدير هم پرې اعتراف وکړ چې امریکایي الوتکې یوازې په طالبانو بريدونه کوي داعش ته هیڅ نه وایي، حاجي ظاهر قدیر په داسې حال کې چې د اسنادو په توګه يې یوه سي ډی هم په لاس کې وه، په خپلو خبرو کې زیاته کړه چې قوي اسناد لري چې د حکومت الوتکو داعش ته د طالبانو په ضد وسلې او مهمات کوز کړي دي. او د ملي امنیت ځینې کارتونه يې هم وښودل چې د داعشي مړو څخه د ده په قومنده په یو جنګ کې په لاس ورغلي وه.
اوس به راشو دې خبرې ته چې په دغه پروژه کې د امریکا او لاسپوڅو څه ګټه وه؟
امريکایانو او ناټو چې په افغانستان کې په بشپړ ډول ماتې وخوړه، څومره به چې دوی له ظلم او وحشت څخه کار اخست هغومره به افغاني مقاومت مخ پر وړاندې روان وو، نو امريکايي صليبي يرغلګر وروسته له هغه چې د طالبانو په ډلو ويشلو کې پاتې راغلل، د ځينو سيمه ئیزو استخباراتو په مرسته يې د داعيش په نوم پليته او وحشي ډله په دې موخه رامنځته کړه، چې طالبان په جنګ کې مصروف وساتي، مذهبي تعصب زیات شي، او د پرمختګونو مخه يې ونيسي.
تر دې چې د امریکايي استخباراتو لخوا ځينې حنفي علماء کرام يې هم ترور کړل ترڅو په عراق کې ترسره شوې تجربه دلته هم عملي کړي او د حنفي او وهابي په نومونو مذهبي تعصب او مذهبي جنګونه پيل کړي.
خو طالبانو د هوښیار، ځيرک او با تدبيره قيادت په درلودلو سره د دوی ټولې دسيسې د الله تعالی په مرسته شنډې کړې، او افغان مسلمان ولس ته يې د دوي اصلي څېره وروښودله، چې دوی خوارج او تکفریان دي چې د صلیبي یرغلګرو لخوا په افغان مظلوم ولس تپل شوي دي.
