افغانستان د خپل جغرافیایي او تاریخي جوړښت له مخې د غرنۍ جغرافیې او قومي بنسټ لرونکی هېواد دی، چې په خپل اوږد تاریخ کې یې ساتنه د خپلې طبیعي غرنۍ جغرافیې او قومي تړونونو پر بنسټ شوې ده. دغه راز، هغه حکومتونه چې د دغو قومونو له منځه راټوکېدلي، ولسونه یې تر شا ولاړ شوي او په پوره مېړانه یې د خپلو حکومتونو ملاتړ کړی دی.
د افغانستان اسلامي امارت هم د افغان ملت له دین او فرهنګ سره په اړیکه کې رامنځته شوی حکومت دی، چې په ټول توان یې د خپل ملت او جغرافیې د ساتنې لپاره کار کړی او کوي یې.
څرنګه چې ملت د خپل مسؤولیت له مخې د نظام تر شا ولاړ دی، نو وخت ناوخت د ترهګریزو بریدونو ښکار کېږي. لکه څنګه چې د پاکستان پوځي رژیم د خپلو ناکامیو د پټولو، د خپلو ترهګریزو اعمالو د دوام، او د ورکړل شویو ترهګریزو پروژو د بریا او تحقق لپاره یو ځل بیا د ډیورنډ فرضي کرښې ته نږدې، په خوست، پکتیکا او کونړ ولایتونو کې پر ولسي کورونو بمبارۍ کړې دي، چې ګڼ مالي او ځاني زیانونه یې اړولي دي.
د پاکستان ترهګره اداره ادعا کوي چې ترهګریز مرکزونه یې په نښه کړي دي، او دا هغه مرکزونه بولي چې د پاکستاني پوځ اجیر عسکر یې په پاکستان کې دننه د دوی په پوستو کې هلاک کړي دي. د پاکستاني ترهګر پوځ د ادعا له مخې، دا مرکزونه د ټي ټي پي مجاهدینو مراکز دي. په داسې حال کې چې په دغو بریدونو کې ښځې، ماشومان او سپینږیري شهیدان شوي دي، عام کورونه او ودانۍ ویجاړې شوې دي. افغان حکومت بیا بیا په عملي ډول له ترهګرۍ سره د خپلې مبارزې بېلګې وړاندې کړې دي؛ لکه یوه اوونۍ مخکې چې د امنیت له اړخه د افغانانو لپاره یو مثالي اختر و.
د پاکستان ترهګر پوځ په افغانستان کې د ټي ټي پي د مرکزونو او پر مرتد پوځ د هغوی د بریدونو یادونه په داسې حال کې کوي، چې نږدې شپږ میاشتې کېږي له پاکستان سره د افغانستان ټولې پولې تړل شوې دي او پر فرضي کرښه له دواړو لورو کلکه څارنه کېږي.
له دې څخه معلومېږي چې د ترهګرې پاکستانۍ ادارې پر وړاندې د خپلو ولسونو نارضایتي، اقتصادي ستونزې، د صوبو ترمنځ د اجیرې ادارې تبعیضي چلند، د علماوو کرامو شهادتونه، د عامو مخورو کسانو وژنې او د آی اېس آی استخباراتي ادارې له لوري د قومي مشرانو غیابت، او نور ګڼ ظلمونه د دې سبب شوي دي چې د اجیرې او ترهګرې پاکستانۍ ادارې چارواکي لوری ورک کړي، ملامتي پر افغان حکومت واچوي او خپل انتقام له افغانانو واخلي
