په ټوله کې هیڅ پاکستاني حکومت د پاکستان له تأسیس څخه تر ننه، کله هم د مسئول او منظم حکومت په توګه مسئولیت ندی ادا کړی؛ خو مګر پوځي او استخباراتي جنرالانو، چې هر وخت یې پاکستانی ملت او ملکي حکومت یرغمل نیولي، د نورو په اشارو داسې تاریخي بې باکۍ کړي، چې د پاکستاني مسلمان ولس د سترو ـ سترو قربانیو په ورکولو بیا هم ندي جبران شوي.
د پاکستان لومړی، صدر اعظم لیاقت علي خان و، د هغه له مرگ نه وروسته پاکستان په مستقیم او غیر مستقیم ډول د پوځي دیکتاتورو جنرالانو تر کنټرول لاندې پاتې شوی دی، حتی علي جناح په ۱۹۴۸م کې هغه ته هم د هغه وخت جنرال محمد ایوب خان په هکله ویلي وو: “دا جنرال ایوب د نظامي مسؤلیت په پرتله د سیاسي مسایلو سره ډیر بوخت دی.”
چا چې له ملتونو او تاریخي موضوعاتو سره بې باکه او سطحي برخورد کړی دی؛ پایلې یې ډیرې خطرناکې وي. لیاقت علي خان، چې د پاکستان صدراعظم و، د اکتوبر میاشتې په ۱۶ مه، د ۱۹۵۱ م کال، په یوه لویه ولسي جلسه کې د راولپنډۍ په کمپنۍ باغ کې د سید اکبر خان افغان لخوا د وینا پرمهال په تندي وویشتل شو، ځکه لیاقت د وینا پرمهال د ملتونو پر وړاندې بې باکه او سپکې سپورې وویلې او د هغه دې برخورد اکبر افغان اړ کړ، چې په تندي یې وولي او له منځه یې یوسي.
پاکستاني جنرالان د غلامۍ په طبیعت روزل شوي او د خپلواکۍ په باب حساس ندي؛ همدا وجه ده چې تل یې د خپلو ملتونو په وړاندې د دښمنانو سره لاس یو کړی، چې د هغوی دې بې باکه او خسیس کاروبار د پاکستاني حاکمیت ټول تاریخ وژلی دی. جنرال سکندر میرزا، چې د پاکستاني پوځ پلار ګڼل کیږي، په هکله یې تاریخي ریکارډ کې ثبت شوي دي:” میرزا د برتانوي ښکیلاکګرو د وفاداره ایجنټ میر جعفر کړوسی دی، میر جعفر د نواب سراج الدوله په ضد د بنګال د اشغال په خاطر انګریزانو ته جاسوسي کوله”.
که څه هم د جاسوسۍ مردود عمل، د پاکستاني جنرالانو په باب د تاریخ لخوا ثبت شوی جریان دی؛ خو ولې د ټول پاکستاني ملت په تاریخ سیوری غوړولی شي؛ بناء دا د پاکستاني ملت مسئولیت جوړیږي چې د پاکستاني ولس د تاریخ وژونکو جنرالانو په وړاندې غلي پاتې نشي.
پاکستاني جنرالان د حکومتولۍ له طرز سره هم د ټوکو او بې باکۍ برخورد کوي. د جنرال سکندر میرزا په وخت کې یوازې په دریو کلونو کې، یعنې له ۱۹۵۵ تر ۱۹۵۸ پورې، پنځه تنه لومړي وزیران برطرفه کړل؛ ځکه هغه د صدر اعظمۍ له مقام سره ډېر په ټوکو او سطحي برخورد کاوه، د دغه بې باکۍ وجه ده، چې کله په بنګال او کله په کمشیر کې شرمنده شوي وي.
پاکستاني جنرالان یوازې د حکومتولۍ له طرز، د ملت، خاورې او تاریخ سره بې باکۍ او سطحي چلند کړی ندی، بلکې د ملتونو د قانون او دستور سره یې هم ناروا چلند کړی او د نورو په توسط یې پاکستاني مسلمان قوم ته پردی ایین ور جوړ کړی. تاریخونه لیکي: “ملک غلام محمد، چې یو بیروکرات او فلج وهلی شخص و، د جنرال ایوب په مرسته یې د پاکستان صدراعظم خواجه ناظم الدین له وظیفې نه برطرفه کړ او په ۱۹۵۳م کې یې د هغه پرځای، په امریکا کې د پاکستان سفیر محمد علي بوگره صدر اعظم وټاکه. جنرال ډیر ضعیف و او خبرې به یې د امریکایي سکرتر په وسیله ترجمه او تفهیم کیدې او په همدغه وخت یعنې ۱۹۵۴م کې د پاکستان د آئین مسوده تیاره شوه.”
پاکستاني جنرالانو تېر ځل د خپلو بې باکیو او سرمستیو په وجه بنګلدیش له لاسه ورکړ، دا ځل ښایي هماغه تاریخ بیرته په کشمیر او بلوچستان کې تکرار شي. د بنګلدیش د بېلېدو پر وخت د جنرالانو بې شرمانه لاسوهنو نتیجه وه، چې د ازادو انتخاباتو نتایج ونه منل شول؛ نو د بنګلدیش مشر او مخکښ لیډر مجیب الرحمن د خپل ګوند د ۶ مادېیز مانیفیستو د تطبیق لپاره بنګالیانو ته د ازادۍ لپاره د جنګېدو اعلان وکړ، چې د جګړو او انساني تلفاتو وروسته د (شرقي پاکستان) ستنه ړنګه او د مولانا ازاد د وړاندوینې سره سم (اپریل، ۱۹۴۶) د پاکستان مصنوعي جوړښت سره وپاشل شو او بنګلدیش د مستقل هیواد په حیث رامنځته او پاکستاني پوځ شرموونکې ماتې وخوړه.
پاکستاني جنرالانو تنها پاکستانی مسلمان ملت او مسلمان ګاونډیان ندي وژلي؛ بلکې سیمه او نړۍ کې هم مسلمانان د دوی له ظلم او وحشت څخه ندي بچ شوي او د فلسطینیانو غوندې مظلوم یې هم تر تیغ تیر کړي. د اردن امريکا پلوي پاچا ملک حسين ته یو مهال اندېښنه پيدا شوه، چي کېداى شي د فلسطين د ازادۍ جګړې اتلان یې واکمنۍ ته خطره شي او په دې کار کې ښايي د سوريې د هغه وخت حکومت (چې د شوروي ملاتړ ورسره و) د هغوى مرسته وکړي؛ نو هغه وو چې اردن د فلسطيني مهاجرو څخه د بېغمه کېدو په موخه، د ١٩٧٠م کال په سپمټمبر کې د هغوی په خلاف په عملياتو لاس پورې کړ.
دا عمليات د ” تور سپټمبر د عملياتو“ په نامه مشهور دي، د دې عملياتو په بهير کې اردن سره د اسرائيلو جاسوسانو مرسته کوله. په داسي حال کې، چي د دې عملياتو څارنه او مشري د پاکستان څخه ورغلي یو پلاوي، چې مشري یې يوه پوځي افسر برېگډېر ضياء الحق کوله. د دې عملياتو په پايله کي تر پنځه دېرش زرو زيات فلسطينيان شهيدان شول. دغه پوځي افسر تر دې وروسته بېرته خپل هيواد ته ستون شو، چې په ډېره لږ موده کې بیا جنرال شو. بيا د پوځ رئيس ارکان وټاکل شو. بيا يې د پاکستان د هغه وخت ملکي حکومت راوپرځاوه او په خپله مشري يې مارشلايي حکومت رامنځته کړ. بیا یې ورپسې لومړى وزير د قتل په يوه دروغجنه دوسيه متهم او اعدام کړ.
په ۱۹۷۰م کې له فلسطین څخه اردن ته د مهاجرو شویو مظلومو فلسطینیانو پرضد بریالیو عملیاتو وروسته پاکستاني جنرال ضیاءالحق ته د هغه د ترسره کړیو خدمتونو په ویاړ د اردن ترټولو لوړ مډال ورکول شو. د یاسر عرفات د ادعا مطابق، چې په دغه عملیاتو کې د وژل شویو فلسطینیانو شمېر ۲۵۰۰۰ کسانو پورې رسېدلی و. دا عملیات د اردن د پاچا حسین په مستقیم امر ترسره شوي و. اسرائیلي جنرال موشي دایان یې په هکله وایي: «حسین چې په یوولسو ورځو کې څومره فلسطینیان ووژل، دا به اسرائیلو په شلو کلونو کې وژلي وای.
هغه مهال، چې په ډیسمبر ۱۹۷۹م کې د شوروي اتحاد لښکر په افغانستان یرغل وکړ؛ نو د جنرال ضیاءالحق په مشرۍ پاکستان پوځي حکومت په افغانستان کې د روسانو پر ضد جهاد څخه ډیرې اقتصادي، نظامي او تجارتي ګټې وکړې او (د زرو ټپونو په واردولو د مرګ ستراتیژۍ، کابل باید وسوځي، اوبه په معینه درجه جوش کړای شي او…) دوکتورین تطبیق کړل.
جنرال ضیاء الحق د اگست میاشتې په ۱۷مه نېټه ۱۹۸۸م کال په C-130 ډول ترانسپورتي الوتکه کې د امریکایي سفیر، نظامي آتشې او د پاکستان د پوځ د ۳۰ په شاوخوا کې لوړ رتبه افسرانو سره د طیارې د انفجار له امله پداسې مهال د پنجاب په بهاولپور سیمه کې ووژل شو، چې بهاولپور ته د امریکایي ابرام ټانکونو د معاینې او تطبیقاتو د کتلو لپاره تللی و او اصلاً یاد ټانګونه مجاهدینو ته نړیوالو ورکړي وو.
پاکستاني فوځي جنرالان، له سره تر پایه ټول یې د غلا، چور چپاول، وحشت، بې باکۍ، غلامۍ او د مسایلو سره د سطحي چلند تاریخ لري او واک ته په رسېدو د پاکستاني ملت له وینو او خولو (بیت المال) سره د غنیمت چلند کوي. څه موده وړاندې د جنرال پرویز کیاني او جنرال مشرف په هکله نړیوالو او پاکستاني رسنیو راپور ورکړ، چې په استرالیا او خلیجي هیوادو کې سترې جزیرې لري، حال دا چې پاکستانی ولس په ډیرو سختو او ډیرو بدو اقتصادي ستونزو کې را ګیر دی.
بهر حال! موږ پوهیږو، چې نن ورځ له افغانستان سره او د فرضي کرښې په امتداد د پرتو ولسونو سره د پاکستاني جنرالانو دوښمني په څه وجه ده؟ پاکستاني جنرالانو ته کوم ځای سخت زور ورکوي، د دوی هغه ارمانونه او ارزوګانې خاورې شوې، چې د روسانو ضد جهاد پرمهال یې ترلاسه کړې وې او نن یې یو ځل بیا هماغه خوبونه، چې په افغانستان کې پاتې شویو وسلو او د امریکا او ناټو د پاتې فوځي تجهیزاتو د کباړ کولو او پاکستان ته د قاچاق کولو په بڼه لیدل چټیات شول.
په پای کې د دوی د مقتدا او محبوب امریکایي پروفیسر جیورج سنتایانا یوه جمله ور یادوو، وایي: “Those who cannot remember history are doomed to repeat it” یعنې، څوک چې تاریخ له پامه غورځوي بې له شکه به بیا پرې راګرځي.
