په نننۍ نړۍ کې چې بېلابېل سیاسي نظامونه، هر یو د خپلو ځانګړو موخو او ارمانونو له مخې، خپلې ټولنې اداره کوي، ډېر لږ داسې نظامونه موندل کېږي چې په رهبري کې یې داسې خواخوږی، ژمن او بېریا مشر وي چې له خپل دین او ولس پرته بله اندېښنه ونه لري. په ډېرو هېوادونو کې واکمنان او سیاسي مشران یا د بهرنیو نظامونو سره تړلي دي او د پردیو غوښتنې او فرمانونه په خپلو ټولنو کې پلي کوي، یا د خپل واک او د خاندان د واکمنۍ د دوام په هڅه کې دي او یا یې واک د شتمنۍ د راټولولو او د دنیاوي هوسونو د پوره کولو وسیله ګرځولې ده.
په داسې شرایطو کې د داسې مشر او رهبر موندل چې خپله ټوله هڅه د خلکو خدمت، د اسلامي احکامو د روښانولو او د دیني ارزښتونو پر لور د ټولنې د بلنې لپاره ځانګړې کړي، ستونزمن او نادر کار دی. خو اوسنی افغانستان، د الله تعالی جلجلاله په فضل او د مجاهدینو او د حق او عدالت د لارویانو په هڅو، له دې ستر نعمت څخه برخمن دی چې اسلامي نظام پکې ټینګ شوی او یو خواخوږی او ولسي مشر، په نوم د امیرالمؤمنین شیخ هبةالله اخوندزاده حفظهالله، د دې نظام د رهبرۍ واګې په لاس کې لري.
هغه مشر چې خپل ټول مبارک ژوند یې د اسلام د سرلوړۍ، د کفر او یرغل پر وړاندې د مبارزې او د خلکو د خدمت په لاره کې تېر کړی دی او نن هم د اسلامي امارت د مشر په توګه، د ټولنې له اصلاح، د شریعت د احکامو له پلي کېدو او د الهي ارزښتونو پر لور د خلکو له لارښوونې پرته بله موخه، فکر او اندېښنه نه لري.
امیرالمؤمنین حفظهالله ځان نه یوازې حاکم، بلکې د خلکو خادم هم ګڼي او په خپلو ویناوو کې یې په وار وار ټینګار کړی چې اسلامي نظام د ولس ملکیت دی او مسؤلین د ولس د خدمت دنده لري. نوموړي مبارک حفظهالله د لوی اختر په وینا کې فرمایلي دي: «نظام د ملت ملکیت دی او ملت د نظام یوه برخه ده.» همداراز یې قسم یاد کړی چې: «که زما په وسیله د نړۍ په هر ګوټ کې د یوه مسلمان ستونزه حل کېدای شي، حاضر یم چې په پښو ورشم.»
دا خبرې د اسلامي امت پر وړاندې د نوموړي د بېساري خواخوږۍ څرګندونه کوي؛ داسې خواخوږي چې په ډېرو مشرانو او رهبرانو کې یې بېلګه نه موندل کېږي.
امیرالمؤمنین حفظهالله د تېرو پنځو کلونو په اوږدو کې، یعنې د کفر پر وړاندې له بریا او د اسلامي امارت د نظام له ټینګېدو راهیسې، د افغانستان د مسؤلینو او ولس لپاره په بېلابېلو اعتقادي، شرعي، اخلاقي او ټولنیزو برخو کې ارزښتناکې ویناوې، احکام او سپارښتنې وړاندې کړې دي.
دغه ویناوې له سپېڅلو او باوري دیني سرچینو څخه اخذ شوې دي او موخه یې د ټولنې اصلاح، له بدعتونو او ناپسندو دودونو او رواجونو څخه د خلکو خبرداری او د شریعت د احکامو پر لور د هغوی بلنه ده.
د دغو ویناوو اهمیت له دې امله دی چې په اوسني حساس پړاو کې د افغانستان ټولنه لارښوونې ته اړتیا لري، څو وکولای شي په سمه اسلامي لاره ګام واخلي او له هغو فرهنګي او ټولنیزو زیانونو څخه ځان وژغوري چې د تېرو کلونو په اوږدو کې پرې خپاره شوي دي.
د دې لړۍ د مقالو د لیکلو موخه د امیرالمؤمنین حفظهالله د ارزښتناکو ویناوو تحلیل او روښانول دي، څو د افغانستان دینپاله ولس د خپل خواخوږي مشر او رهبر له لارښوونو سره لا ښه بلد شي او د اصلاح او پرمختګ پر لاره ګامونه پورته کړي.
د دې کار اړتیا له دې ځایه راولاړېږي چې کېدای شي ډېری خلک او ان ځینې مسؤلین د دغو ویناوو له بېلابېلو اړخونو سره بشپړه بلدتیا ونه لري او د هغو د ښه درک لپاره تشریح او تحلیل ته اړتیا ده. همداراز، له دې امله چې دغه ویناوې د ټولنې د هر اړخیزې اصلاح لپاره د لارې نقشې حیثیت لري، د هغو څېړنه او تحلیل کولای شي له ټولو خلکو سره د اسلامي نظام د موخو او خپلو شرعي مسؤلیتونو په ښه درک کولو کې مرسته وکړي.
د مقالو دا لړۍ به په تحلیلي ـ دیني لیدلوري او په ساده او روانه ژبه، په بېلابېلو موضوعاتو کې د امیرالمؤمنین حفظهالله د ویناوو اساسي محورونه وڅېړي. هره مقاله به د هغو موضوعاتو له ډلې یوې بنسټیزې موضوع ته ځانګړې وي چې نوموړي پرې ټینګار کړی دی او د افغانستان د خلکو د فرهنګ او دیني باورونو په پام کې نیولو سره به د نوموړي لیدلوري او په ټولنه کې د هغو د اصلاحي رول په اړه وضاحت وړاندې کړي.
هیله لرو چې دا ناچیزه هڅه به د امیرالمؤمنین حفظهالله د اصلاحي افکارو د لا ښه پېژندنې او په افغان ټولنه کې د اسلامي ارزښتونو د ترویج په لاره کې یو کوچنی ګام وي او زموږ درنو هېوادوالو سره به د خپل خواخوږي مشر د سپارښتنو په عملي کولو کې مرسته وکړي. والله الموفق والمستعان.
