دا ډله په (۱۹۹۹) کال کې د “جماعت التوحید والجهاد” په نوم پیل شوې وه، چې په (۲۰۰۴) کال کې یې د القاعده سره وفاداري اعلان کړه، کله چې په (۲۰۰۳) کال د مارچ په میاشت کې د لوېدیځو ځواکونو لخوا د عراق اشغال پیل شو، داعش هم په دې جګړه کې برخه اخیستې وه.
د (۲۰۰۶) کال په جنوری میاشت کې د نورو سني شورشي ډلو سره یو ځای شوه، او د عراق د مجاهدینو شورا په جوړولو سره یې د (۲۰۰۶) کال په اکتوبر کې د عراق اسلامي دولت (ISI) اعلان وکړ.
د سوریې د کورنۍ جګړې له پیل وروسته په (۲۰۱۱ )کال کې (ISI) د ابو بکر البغدادي په مشرۍ په (۲۰۱۱) کال په اګست کې خپل استازي سوریې ته واستول، دغو جنګیالیو خپل ځانونه “جبهه النصره (النصره جبهه) بلل او په سوریه کې د سني په اکثرو سیمو لکه الرقه، ادلب، دیرالزور او حلب کې پراخه شتون پیدا کړ.
په (۲۰۱۳) کال کې ابوبکر البغدادي د (ISI) او النصره جبهې د یوځای کېدو اعلان وکړ او د یوځای شوې ډلي نوم یې د عراق او شام اسلامي دولت (ISIL) بدل کړ، مګر د جبهة النصر او القاعدې مشرانو ابو محمد الجولاني او ایمن الظواهري چې د دوی په نجسو افکارو پوه شول؛ نو د دوی سره د یو ځای کېدلو په وړاندې یې مخالفت وکړ.
د واک له شخړې اوه میاشتې وروسته، القاعده د (۲۰۱۴) کال د فبرورۍ په ۳ مه، د (ISIL) سره خپلي ټولي اړېکي ددې له امله چې د دوی پالیسي او افکار د اسلام او مسلمانانو خلاف وه؛ پرې کړې.
دې ډلې په سوریه کې، د حکومت ځواکونو او د سوریې د مخالفو ډلو پر ضد ځمکني بریدونه کړي، او پر رسنیو یې د سرونو پرې کولو ويډیوګاني خپرې شوې چې په دې سره د داعش شهرت وروسته نور هم زیات شو.
په (۲۰۱۴) کال کې یې د عراق د لوېدیځو ښارونو څخه د عراقي حکومت ځواکونه وشړل، د عراق د ځمکي له لاسه ورکول تقریبا د عراقي حکومت سقوط راوست او د امریکا د پوځي کړنو د بیا پیل سبب سو.
