مسلسل څو وارې د پاکستان پوځي رژیم ځانګړو کړیو د افغانستان حریم نقض کړی او پر ځایي ملکي کورونو یې بمبارونه کړي دي، چې د دغو بمباریو قربانیان تل ماشومان، ښځې او عام مسلمانان وي. ډېر هېوادونه د خپل جوړښت او پالیسۍ له امله ځینې داخلي امنیتي او سیاسي مشکلات او ستونزې لري، چې د دغو ستونزو راټوکېدل ځینې وخت د بغاوت سبب کېږي او ځینې وخت د ظلم او استبداد څخه د خلاصون لامل ګرځي.
د پاکستان پوځي رژیم هم له ورته برخلیک سره مخ دی، چې د ناامنۍ او مخالفت نقطه یې خپل پاکستاني تبعه خلک دي او د همدې خاورې په داخل او منځ کې سره اخته دي. ښه پوهېږي، چې د پاکستان پوځي رژیم مخالفین په پاکستان کې دننه دي او د ولس په حضور او موجودیت کې د یاد رژیم پر وړاندې تهاجمي او هر اړخیز بریدونه او حملې کوي، خو بیا هم افغانستان ته د مخالفو ډلو د ساتلو ګوته نیول کېږي. ولې، چې جګړه او مخالفین په خپله خاوره کې وي، بیا دغه ډول تهمت او ادعا ولې؟
د پاکستان پوځي رژیم د خپلې استبدادي، ظالمانه او پردۍپالې پالیسۍ له امله له بشپړې ولسي نارضایتۍ سره مخ دی، چې دغه نارضایتي نن د ولسي خلکو له خوا په نظامي او وسلواله بڼه اوښتې ده. تر نن پورې په یاد هېواد کې د رژیم ضد ډلو په حضور او موجودیت پوهېږو، چې دغه ډلې د همدغه پاکستاني مسلمان ولس له منځه راټوکېدلې دي او د رژیم پر وړاندې وسلواله مبارزه کوي.
افغانستان ته د مخالفو ډلو د شتون ادعا ځکه کوي، چې خپله داخلي ناامني د افغانستان له امله معرفي کړي، نه خپل داخلي مشکلات، ترڅو د پاکستان ولس پر ځای افغان ولس د خپل ظلم او وحشت وسیله وګرځوي. د افغانستان اسلامي امارت د حاکمیت له ټینګېدو سره سم، د افغانستان خاوره بشپړه مستقله او د یو آزاد او شرعي نظام څخه برخمنه شوه، چې نن الحمد لله په ټول افغانستان کې د یوه امیر او یوه مشر واک چلېږي.
د نورو ګاونډیو په څېر، یا د امریکا د اشغال د دورې په څېر، د افغانستان خاوره د ځواکمنو او استخباراتي کړیو د اهدافو مرکز وه، خو نن دغه خاوره د بهرنیو لاسوهنو او کړیو څخه آزاده ده. هېڅوک د افغانستان له خاورې څخه د ناوړه استفادې او کارولو واک او صلاحیت نه لري، او نه هم په پنځه کلنه موده کې د هېڅ ګاونډي او سیمهییز هېواد پر ضد د بهرنیو ډلو او کړیو له خوا کارول شوې ده.
د پاکستان رژیم هغه ادعاوې، چې د خپلو ناکامیو او ناامنیو د پټولو او ولس ته د بېځوابه کېدو لپاره کوي، د سالم عقل له درک او منلو څخه لرې خبرې دي، چې ګواکې په افغانستان کې د پاکستان ضد او مخالفې ډلې موجودې دي. د یاد هېواد ړندې ادعاوې او قضاوتونه مو ولیدل، چې تل یې پایله پر ملکي او مظلومو خلکو د وحشي عمل په بڼه راڅرګنده شوې ده، خو بیا هم خپلې بېبنسټه ادعاوې او دروغجن تهمتونه بدرګه کوي او خپل عملیات بریالي بولي.
جالبه خو دا ده، چې لکه څنګه موږ د پاکستان رژیم پر وړاندې د داعش د موجودیت په اړه مستند ثبوتونه او شواهد خپاره کړل او د دوی موجودیت مو د یاد رژیم په نظامي تأسیساتو کې اثبات کړ، خو دوی د بېشرمۍ او جنایت د پټولو لپاره خپله د منافقت پالیسي بدلوي او د نړۍ او نړیوالو پام د ظلم او وحشت تکرار ته رااړوي. ځکه د نړۍ تش په نوم سازمانونو ته داعش مطرح او مهم دی، نه د ملکي مسلمانانو قتل عام. نو ځکه پاکستان رژیم د وحشت او ظلم نوم پر ځان مني، خو د داعش او نورو نړیوالو ډلو موجودیت او اثبات هېڅ نه مني او نه ځان پرې تورنوي.
د پاکستان پوځي رژیم د خباثت جرړه ده. دوی ځکه خپل مخالفین، چې په خپله خاوره کې یې دي، نه په نښه کوي، چې پاکستان ولس یې پر وړاندې مخالفت ونه کړي او د یاد رژیم پر وړاندې د دفاع سنګر ونه نیسي. ښه پوهېږي، چې ستونزه یې خپله ده، مخالفین یې خپل او په خپله خاوره کې دي، خو بیا هم د خپل رژیم د بقا او دوام لپاره داسې کړنې تکراروي، چې هېڅ د منلو وړ نه دي.
