د اسلامي امت په تاریخ کې تل ځینې ډلې، خوځښتونه او ګوندونه د همدې امت له منځه راپورته شوي او ځانونه یې رښتیني ملاتړي، د اسلام پیروان او د الهي دین بیرغوال معرفي کړي دي.
په دې منځ کې یو شمیر ډلې او خوځښتونه په خپلو دعوو ټینګ ولاړ وو او د دعوې او عمل تر منځ یې هېڅ واټن نه درلود؛ خو یو شمیر نورو بیا د امت د عامه ذهنونو د غولولو لپاره له تشو شعارونو کار اخیستی او د ادعا او عمل تر منځ یې د ځمکې تر اسمان توپیر دی.
له هغه ځایه چې په اوسني عصر کې هم بېلابېلې ډلې او خوځښتونه په رنګارنګ بیرغونو راڅرګند شوي او هر یو یې د رښتیني اسلام د استازیتوب دعوه کوي او مسلمانان ځان ته رابولي، نو موږ دې ته اړ شوو چې د مقالو په یوه لړۍ کې د اوسني عصر د یوې تر ټولو بدنامې ډلې (داعش) د ادعا او عمل تر منځ هغه واټن څرګند کړو چې د دې ډلې د اسلامي شعارونو او د هغې د کړنو د ترخو واقعیتونو تر منځ موجود دی.
داعشي خوارج له همدې ډلو څخه یوه ډله ده چې د خپلې ناخواله پیداېښت څخه تر اوسه پورې یې تل هڅه کړې چې په اسلامي شعارونو او په ظاهره ښکلو، خو په باطن کې زهرجنو خبرو سره اسلامي امت وغولوي، په ځانګړي ډول ځوان قشر ځان ته جذب کړي.
له همدې امله، د مقالو په راتلونکې لړۍ کې به په هره برخه کې د خوارجو یو تش شعار راواخلو او ادعا او عمل یې له یو بل سره پرتله کړو؛ ترڅو څرګنده شي چې څرنګه دې ډلې له دیني شعارونو په استفاده د ځان نه د حقطلبانه څېرې په ښودلو سره، په عمل کې اسلامي امت ته تر ټولو لوی زیانونه ورسول.
دې ډلې د ځوانانو له دیني احساساتو څخه په ګټې اخیستنې سره، هغوی له کورنۍ، ټولنې او د اسلام له سمې لارې جلا کړل او په داسې لار یې واچول چې نه یوازې د هغوی د تباهۍ لامل شوه، بلکې په اسلامي امت کې یې د فتنې اور بل کړ.
د نن ورځې خوارجو د خپلو صدر اسلام وخت اسلافو په څېر، د دیني ظاهر په اخيتارولو سره ساده خلک ښکار کړل او د آیت او حدیث نه په ډکې څېرې تر شا یې عملاً داسې پلانونو ته عملي بڼه ورکړه چې اسلام ته یې هېڅ ګټه نه درلوده، بلکې پایله یې د مسلمانانو وژنه، د اسلامي هېوادونو ورانول او د دین د دښمنانو لپاره د لارې هوارول وو.
بې له شکه چې د دې ډلې په کړنو کې په لږ فکر کولو سره په ښه توګه پوهېږو چې د هغوی دښمني له نړیوالو طاغوتونو سره نه ده، بلکې له مؤمنانو او اهل قبله سره ده؛ هغه کسان چې یوازې د دوی له باطلې مفکورې سره د مخالفت په جرم تکفیر شوي او وینه یې حلاله ګڼل شوې.
په ریښتیا هم د وحدت، جهاد، خلافت او شریعت شعارونه، یوازې د خوارجو (داعش) د ډلې د مشرانو سیاسي اهدافو او مقام ته د رسیدو لپاره یو نقاب و او بس.
همدا منافقانه کړنې بالاخره د دې لامل شوې چې داعش د اهل سنت والجماعت د نفرت وړ وګرځي او لویو اسلامي علماء له ټولو مذهبونو څخه، د دې ډلې پر وړاندې دریځ ونیسي او انحراف یې په صراحت سره اعلان کړي.
په پای کې، هیله ده چې د دې لړۍ په څیر لیکنې، د مسلمان ځوان نسل لا ډېر بصیرت اختیارولو ته اړ کړي، ترڅو د دې ډول فتنې په وړاندې ودریږي او د دې ډلو له ظاهري ښکلا او له حقیقت څخه خالي دیني خبرو ونه غولول شي.
