د اسلام د لارې زړور سپاهي، د ويښ ضمیر څښتن، جنګېدلی او غښتلی مبارز، شهید سعید ملا عبدالحکیم ” هجرت ” تقبله الله د عبدالحمید زوی، په ١٣٦٥ ه. ش کال د بادغیس ولایت د مقر ولسوالۍ، د تَرَکو د کلي په یوه دینداره او جهاد پاله کورنۍ کې دې فاني نړۍ ته سترګې وغړولې.
دیني زده کړې یې د خپل کلي له امام څخه پیل کړې، له هغه وروسته یې د علمي تندې د خړوبولو په موخه د مدرسې لاره ونیوله او په مختلفو مدرسو کې یې خپلو زده کړو ته دوام ورکړ.
دا چې نوموړي په داسې مهال کې د ځوانۍ په درشل قدم کېښود، چې زمونږ خاوره د کفارو او د هغوی د مزدورو غلامونو تر تسلط لاندې وه او د دې وطن د هر با احساسه ځوان په زړه کې د انتقام لمبې بلې وې، نو شهید هجرت تقبله الله هم د خپل ایماني جذبې له مخې ددې آزموینې میدان ته د سر په قیمت را ودانګل، د مدرسې لاره یې پرېښوده او په جهادي لیکو کې د غازیانو سره په ګرمو سنګرونو کې شامل شو.
هجرت تقبله الله په دې بهیر کې د بادغیس ولایت په مختلفو سیمو کې د کفارو او د هغوی له غلامانو سره د خپل ایماني قوت زور و آزمویه، وروسته هلمند ولایت ته ولاړ او هلته یې هم په ډېرو سختلو او پېچلو عملیاتو کې د دین او هېواد له دښمنانو سره مقابله وکړه.
شهید هجرت تقبله الله یو متقي، عاجز او نېک خویه انسان و، له ملګرو سره ښه سلوک، د بیت المال سره د خیانت کولو څخه د ځان ساتنه او د خپل زورېدلي ولس سره همدردي یې ځانګړي خویونه و، شهید هجرت تقبله الله د ماینونو او درازنوف یو تکړه مسلکي و.
کله چې د امریکا له لوري په افغانستان کې د داعش فتنه او استخباراتي آله رامنځته شوه، او د وخت سترو علماؤو یې په وړاندې د مقدس جهاد فتوا صادره کړه، نو د اسلامي امارت د اړونده مقاماتو له لورې په جوزجان ولایت کې ددې فتنې د محوې په خاطر د پرېکنده عملیاتو لپاره تابیا ونیول شوه، چې د یادو علمیاتو لپاره د بادغیس ولایت څخه هم یوه علمیاتي قطعه ور وغوښتل شوه، شهید هجرت چې په زړه کې یې د هر باطل او مردود فکر په وړاندې د مقابلې لیونۍ مینه وه، د همدې مینې د ماتولو په موخه د یادې قطعې سره مل شو او په جوزجان ولایت کې یې د داعشي فتنګرو په وړاندې خپل ایماني قوت و ښوده.
هلته پرلپسې څو ورځې سخت عملیات وشول، چې د یادو علمیاتو په جریان کې د داعشي فتنګرو ډېر کسان مړه او ژوبل شول او پراخې سیمې یې له ناولي تصرف څخه آزادې شوې.
شهید هجرت تقبله الله چې له پخوا څخه یې د شهادت ارمان په زړه کې و، او هر وخت به یې د الله تعالی په دربار کې د مقبول شهادت دعا کوله، الله تعالی یې دعاګانې قبولې کړې او د دریم خلیفه سیدنا حضرت عثمان بن عفان رضی الله عنه دغه لاروی د داعشي فتنګرو سره په مخامخ عملیاتو کې د جوزجان ولایت په درزاب ولسوالۍ کې په ۱۳۹۶/۶/۲۰ ه.ش نېټه د شهادت لوړ مقام ته ورسېد او خپل ابدي ارمان ته وصل شو، روح یې ښاد او یاد یې د ژوندی وي.
نحسبه کذالک والله حسیبه!
د شهید سعید ملا عبدالحکیم هجرت تقبله الله ورور ملا عبدالسلام هجرت کیسه کوي:
ما شهید هجرت تقبله الله ته وویل، چی وروره په ژوند کې بل یو آرمان لرې؟ له هلمند ولایت څخه هم خدای جل جلاله روغ او جوړ راستون کړې، زما ارمان هم دا و چې تا الله جل جلاله روغ او جوړ را ستون کړي، شهید هجرت تقبله الله راته وویل: چې د الله جل جلاله څخه په بار، بار راضي یم، هغه دي نه شي نا راضه؛ د ژوند آخري آرمان مې هم دا دی چې کله د شبرغان ولایت او درزاب ولسوالۍ ته د داعشي فتنګرو جګړې ته لاړ شمه، الله جل جلاله ماته مقبول شهادت را نصیب کړي، بس نور آرمان نه لرم.
