- د تکریت اشغال؛ د صدام حسین زېږنځای!
د اهل السنة دښمنانو ته د داعش ظهور یوه لویه ګټه دا وه، چې هغه سیمې چې سني ځوانانو کلونه کلونه پکې مقاومت کړی و او اجازه یې نه وه ورکړې چې کنټرول یې په ښکاره ډول د روافضو لاس ته ورشي، داعش د دې لامل شو چې د روافضو د ظلم سیوری هلته هم وغځېږي او د ځوانانو هیلې په ناهیلۍ بدلې شي، چې تکریت هم له هغو مهمو او ستراتیژیکو ښارونو څخه و.
د تکریت ستراتیژیک موقعیت:
تکریت د صدام حسین زېږنځای او د صلاح الدین ولایت مرکز دی، هغه ځای چې ډیری اوسیدونکي یې اهل السنة دي، دغه ښار د داعش لپاره له پوځي، سیاسي او رواني پلوه خورا ډېر اهمیت درلود، پر دې ښار واکمنېدل د عراق پر شمال د پراخې برخې د کنټرول او ټولې سیمې ته د ځواک د پیغام استولو په مانا و.
پر تکریت د داعش د واکمنېدو څرنګوالی
د ۲۰۱۴ کال په جون میاشت کې، داعش د موصل تر نیولو وروسته په چټکۍ سره د تکریت پر لور حرکت وکړ، د عراق پوځ هغه مهال له رواني او سازماني پلوه د پاشل کېدو په حالت کې وو، ډیری قوماندانان او سرتېري وتښتېدل یا یې خپلې وسلې پرېښودې، له همدې امله، داعش له کومې سختې جګړې پرته تکریت هم ونیو.
داعش په کومو لارو چارو د عراق په ولس کې کرکه رامنځته کړه، ترڅو د اهل السنة او نورو ادیانو ترمنځ ښکاره دښمني او کینه پیدا شي؟
د اهل السنة په وړاندې د روافضو کینه په ټول تاریخ کې ښکاره او څرګنده ده، خو دا چې دا کینه څنګه او د چا له خوا په دې زمانه کې راوپارول شوه، موږ یې یوه بېلګه وړاندې کولی شو؛
د اسپایکر عاموژنه؛ د ۲۱مې پېړۍ یو له سترو فرقه یي جنایتونو څخه
ځای:
د تکریت سره نږدې د اسپایکر هوايي اډه، چې په عمده توګه د زرګونو شیعه پوځي زده کوونکو د روزنې ځای و.
د پېښې څرنګوالی:
۱:- د اډې له سقوط وروسته، داعش شاوخوا ۱۷۰۰ تر ۲۰۰۰ زده کوونکي ونیول.
۲:- هغوی یې د کاروانونو په بڼه د دجلې سیند تر څنګ د صدام حسین ماڼیو او نورو سیمو ته ولېږدول.
۳:- ډیری یې په لویو کندو کې یا د دجلې سیند پر غاړو په کتارونو ودرول.
۴:- قربانیان په ډلهییزه توګه اعدام او په ډله ییزو قبرونو کې خاورو ته وسپارل شول.
۵:- د دې جنایت ویډیوګانې او انځورونه د داعش له خوا خپاره شول، ترڅو د مخالفینو او د عراق د پوځ په زړونو کې وېره او ډار واچوي.
موخه:
د شیعه ګانو فرقه یي وژنه د وېرې او ګډوډۍ رامنځته کولو لپاره او همدارنګه د اهل سنت د وژلو او عام وژنې لپاره د پلمې جوړول.
