داعش یوه جنګ سالاره ډله ده، چې په منځني ختیځ او د نړۍ تر ټولو زیاته غني نفتي حوزه کې ابر قدرتونو جوړه او تمویلوي یې، تر څو خپلو اهدافو ته ځان پرې ورسوي، دوی په لومړیو کې تش په نوم د شریعت د نفاذ لپاره مبارزه پیل کړې وه؛ خو په صفوفو کې یې د ګډوډۍ او بې نظمۍ له امله، چې هیڅ له دیني ارزښتونو څخه خبر نه و؛ له یوه نا معلوم برخلیک سره مخ شول.
د دوی مشران هیڅ معلوم نه دي، د دوی د رهبری هيڅ ځای نه معلومیږي، حتی هیڅ جنګیالی یې په دې نه پوهیږي چې دی څوک، د څه لپاره او په څه ډول رهبري کېږي؟
د دوی ښکته طبقه په عیاشي کې غرقه او په هغه وضعیت کې قرار لري؛ چې هر څه یې بایللي دي، دوی خپله د کورنیو په غړو د نورو ملګرو له خوا جنسي تیري ولیدل، د دوی تر منځ یوه میرمن څو جنګیالیو ته په نکاح کیږي، اولاد یې هیڅ نه معلومیږي؛ چې د چا زوی دی او د راتلونکي لپاره د دوی جنګي کتله به همدا بې پلاره ځوانان وي؛ چې د بلاک واټر په څیر وحشي او ځناوره جنګي قطعه ترې جوړیدای شي.
د دوی د راتلونکو جنګیالیو انګیزه یوازې او یوازې همدا کیدلی شي، چې څنګه شهوت پوره کړي، څنګه مادیات لاسته راوړي او همدا انګیزه به له دوی څخه یو ړوند او جاهله پوځ جوړ کړي.
نه کورنۍ لري، نه ژوند لري او نه هم راتلونکی؛ نو حتمن به د استخباراتي لوبو لپاره بهترین خاشاک وي؛ چې نړیوال یې استفاده کړي، اوس مهال دوی په سیمه او نړۍ کې د خپل جاهلیت او شهوت پرستۍ له امله ډیر بې علمه ځوانان ځان ته جلبوي؛ خو د ټولو انګیزه همدا شهوت پرستي او مادیت پرستي ده.
