ترکي رسنیو خبر ورکړی چې یو ترکی وګړی له افغانستان سره پر کرښه پرته سیمه کې پاکستاني رژیم نیولی او د ترکیې امنیتي ادارو ته یې سپارلی دی.
د نیول شوي کس نوم ازګور التون ښوول شوی او سرچینې وايي چې د داعشي خوارجو د خراسان څانګې یو له مهمو مسؤلینو څخه و.
المرصاد ته سرچینو ويلي چې التون په ۲۰۱۸ز کال کې افغانستان ته راغلی او له داعشیانو سره یوځای شو. یو کال وروسته ونیول شو او د کابل تر فتحې پورې په زندان کې و، خو کله چې زندانونه مات شول نوموړی هم وتښتېد.
د سرچينو په خبره، په ۲۰۲۱ز کال کې له زندانه تر خوشي کېدو وروسته نوموړي بیرته فعالیت پیل کړ او په ۲۰۲۳ز کال کې تر هغه وروسته بلوچستان ته وتښتېد چې د افغانستان د اسلامي امارت په عملیاتو کې د داعش ډلې رهبري او افراد سخت وځپل شول. ازګور التون د خوارجو په لیکو کې د ابو یاسر الترکي په نوم مشهور و.
یوې امنيتي سرچینې المرصاد ته زیاته کړه چې په بلوچستان کې التون عمدتا د خوارجو لیکو ته د آزربایجاني او ترکي اتباعو او مالي مرستو د راجلبولو په برخه کې فعال وو.
د نوموړي په هڅو د داعش لیکو ته جلب شوي د ازربایجان ځینې اتباع په خپل هیواد کې نیول شوي او یو شمېر نور یې بیا په بلوچستان کې تر نیول کېدو وروسته ازربایجان ته تسلیم شوي دي. ځینې بهرني وګړي چې د التون لخوا بلوچستان ته غوښتل شوي وو د مستونګ په هغو عملياتو کې له منځه تللي چی د داعشيانو پر مرکزونو ترسره شوي او نږدې ۳۰ داعشي جنګيالي پکې ووژل شول.
د یادونې وړ ده، په بلوچستان کې د ابو یاسر او تر هغه وړاندې د شریف الله او نورو داعشیانو نیول کېدل او په مستونګ کې د دوی پر ښکاره مرکزونو بریدونه دا په ډاګه کوي چې د خراساني خوارجو مرکزیت بلوچستان ته انتقال شوی او له هغه ځایه خپل فعالیتونه پلان او ترسره کوي.
