د افغانستان د اسلامي امارت امنیتي ځواکونو د داعشي خوارجو هغه ډله له منځه وړې چې تېره میاشت یې په بغلان ولایت کې یو مجاهد په شهادت رسولی و.
المرصاد ته د امنیتي ځواکونو له منځه سرچینو ویلي چې د بغلان په نهرین ولسوالۍ کې د ځانګړو ځواکونو په عملیاتو کې هغه داعشیان وژل شوي چې د تیرې رجب میاشتې په ۱۷مه نېټه یې یو مجاهد شهید کړی و او وسله یې ترې وړې وه. شهید مجاهد احمد جاوید (سیرت) نومېده او د افغانستان د اسلامي امارت د پوځ په لیکو کې په خدمت بوخت و، تقبله الله.
د سرچینو په خبره، له قتل شویو داعشي خوارجو هغه وسله هم امنیتي ځواکونو نیولې چې له شهید څخه یې غلا کړې وه او بیا یې د خپلې رسمي مجلې النباء په ۴۷۹یمه ګڼه کې انځور خپور کړی و.
تر دې وړاندې، د روانې شعبان میاشتې په لومړیو کې، د افغانستان د اسلامي امارت استخباراتي ځواکونو د هیواد په شمال کې د خوارجو پر ضد پراخ عملیات ترسره کړي وو، چې په نتیجه کې یې د داعشیانو هغه شبکه شنډه شوه چې په تخار، بغلان، کندز او سمنګان ولایتونو کې یې فعالیت درلود او په بلوچستان کې د خپلې مېشتې رهبرۍ په امر د بېلابېلو تخریبي اعمالو مرتکب شوي وو. په یادو عملیاتو کې هغه داعشیان هم له منځه وړل شوي وو چې د بغلان په نهرین کې یې ذکرکوونکي شهیدان کړي وو.
د داعشي خوارجو پر ضد له پرېکنده عملیاتو ښکاري چې د افغانستان اسلامي امارت د خپلو مجاهدینو او خلکو قاتلین هیڅکله نه بښي او په خپل وخت، د الله تعالی په نصرت سره، عدالت ورباندې پلی کوي.
