نعمتونه ټول ډېر غوره دي خو ځیني بیا داسې نعمتونه شته چې د نعمتونو اصل او مور ور ته ویلی شو او ور سره خورا ډېر نعمتونه نور پیدا کیږي، کله چې حضرت ابراهیم علی نبینا و علیه السلام د کعبې مکرمې بنیادونه جوړ کړل، له جوړښت وروسته یې د همدې مبارک ځای په اړه داسې دعاء وکړه: (رب اجعل هذا بلداً آمناً …سورة البقرة: الآیة: ۱۲۶) ژباړه: اې ربه! دا ښار امن لرونکی وګرځوه!
د همدې آیت په تفسیر کې امام رازي رحمه الله تعالی په خپل تفسیر مفاتیح الغیب کې لیکي: په دې آیت کې د مکې مکرمې هستوګنو ته د امن او پراخ رزق دعاء ده، د حضرت ابراهیم علیه السلام له لوري؛ د دې لپاره چې مکې مکرمې ته خلک را جلب شي، ځکه چې مکه داسې یو ښار و چې هیڅ ډول کښت کروندې، ونو او بوټو شتون نه په کې درلود، که امن هم نه وي نو مکې مکرمې ته له لیري سیمو څخه خلک نه ورتلل او ژوند په کې سخت کېده.
بله دا چې کعبه مکرمه الله تعالی د خلکو لپاره د ثواب ځای ګرځولې وه، نو خلکو ته هغه مهال کعبې ته ورتلل شوني و چې لارې په امن وای او خوراکي توکې ارزانه وای، په پورتني آیت کې له دعاء او د هغه له تفسیر څخه جوتیږي چې امنیت یو داسې نعمت دی چې ټولې ښېرازۍ ور پوري تړلې دي.
نړیوال سوداګر خپله پانګونه په هغه هیواد کې کوي چې د امنیت فیصدي یې لوړه وي، ډاډمن امنیت کورني سوداګرو، کارګرو او د هیواد ترقي ته کارکوونکو ته د ډېر وخت کار کولو لپاره زمینه مساعدوي؛ همدا لامل دی چې د هر هیواد حکومت تر ټولو کارونو زیات اهمیت د امنیت برقراره ساتلو ته ورکوي.
دا چې په ګران هیواد افغانستان کې د امارت له حاکمیت سره هم مهاله ډاډمن امنیت راغلی او هیواد د ترقي پر لور چټک ګامونه اخستي، خپلو او پردو په کې پانګونې ته زړه ښه کړی، هره ورځ په بېلابېلو برخو کې سوداګر خپلې پانګونې کوي چې د افغانستان دا حالت د هغه ښکاره او پټو دښمنانو ته هیڅ د منلو وړ نه دی.
دا چې د غربیانو سترې ګټې د افغانستان په اشغال کې نغښتې دي او د همدې هدف د تر لاسه کولو لپاره یې داسې اوږد مهاله پلانونه طرح کړي چې بشپړه پېړۍ یې په بر کې نیولې او د غربیانو د اشغال پالیسي سیاست پوهانو په دې ټکو کې خلاصه کړې: (غربیان چې له دروازې ووځي بېرته تر کلکین هغه ځای ته ننوځي) د سپر ځواکونو په مینځ کې پروت افغانستان د خپل ستراتیژیک اهمیت له کبله غربیانو ته ډېر اهمیت لري.
تقریباً نیمه پیړۍ موږ او تاسو شاهدان و چې غربیانو په ډول ډول پلانونو سره د افغانستان د نیولو پوره کوښښ وکړ چې په دې اخرو دوو لسیزو کې یې د دې هیواد د تسخیر لپاره په ډېره ناچیزه او بې بنیاده بهانه د افغانستان له اولس سره داسې جګړه وکړه چې په عمل کې ترسره شوه خو تر تعبیر لوړه ده؛ خو کله چې افغانان د الله تعالی پر دین کلک ودرېدل، له دې ازلي دښمن سره یې په تشو لاسو؛ خو په کلک هوډ یې جهاد وکړ چې په پایله کې الله تعالی بری د مومنانو په برخه کړ او امریکایان یې له هیواده تور مخ وشړل.
اوس امریکایان بېرته خپل هدف ته له ماتې او تر دروازې له وتلو وروسته بېرته له کلکین څخه را ننوځي، د همدې پالیسي له مخې امریکایان د افغانستان شته امنیت د داعش په پروژه سره د مختل کولو کوښښ کوي، که خدای مه کړه دا هیله یې تر سره شوه د افغانستان دا ډاډمن امنیت مختل شو نو ورسره تړلې ټولې نیکمرغۍ هم په بد مدغیو بدلېدلی شي.
