د امیرالمؤمنین ملا اختر محمد منصور تقبلهالله د اسلامي امارت د امیر په توګه د ټاکل کېدو لا کال نه و پوره شوی، چې د داعش خوارجو تر نامه لاندې د “داعش خراسان” په نوم د افغانستان په جغرافیه کې د ظهور اعلان وکړ.
دا یوه داسې فتنه وه چې په ظاهر کې یې د اسلامي امت لپاره د یو فرصت بڼه لرله، خو په حقیقت کې دا یوه خونړۍ توطئه وه، چې موخه یې په افغانستان داخلي اختلافات، ورور وژنه او د مشروع جهاد د چهرې بدنامول وو.
د دغې منحوسې فتنې د سر راپورته کولو په لومړیو ورځو کې، امیرالمؤمنین ملا اختر محمد منصور تقبلهالله د دې ډلې اصلي حقیقت وپېژانده او د داعش پر ځانټاکلي خلیفه، ابوبکر البغدادي ته یې یو ښکاره او خبرداریورکوونکی لیک واستاوه.
په دې لیک کې یې په واضح توګه څرګنده کړه، که چیرې داعش د افغانستان په دننه کې له خپل فعالیت څخه لاس وانخلي، نو اسلامي امارت به اړ شي چې د دې فتنې پر وړاندې په کلکه ودریږي او د افغانستان د مسلمان ملت له عقیدې، خاورې او فکره به په قاطع ډول دفاع وکړي.
دا خبرداری نه یوازې د امیرالمؤمنین تقبلهالله ژور درک، تاریخي هوښیارتیا او لرلید څرګند کړ، بلکې دا یې هم وښوده چې اسلامي امارت به هېڅکله دا اجازه ورنهکړي چې داخلي یا خارجي دښمنان د اسلام په نوم د مجاهدینو صفونه کمزوري کړي او د جهاد سپېڅلی مسیر منحرف کړي.
خو خوارجو، پر ځای د دې چې د وحدت، اخلاص او ورورولۍ پیغام ته غاړه کېږدي، د تفرقې ډنګ وواهه؛ مجاهدین یې تکفیر کړل، علما یې په نښه کړل او د بېګناه مسلمانانو ترمنځ یې خونړي بمونه وچول، څو د اسلام یو کرکجن، زشت او وېرونکی انځور نړۍ ته وړاندې کړي.
هغوی کوښښ کاوه چې د غولونکو شعارونو له لارې به ناپوه او احساساتي ځوانان ځان ته ميل کړي او د خپلو بادارانو د موخو لپاره، د اسلامي امارت پر وړاندې یو سنګر جوړ کړي؛ خو په حقیقت کې یې د اسلام او مشروع جهاد ریښې پرې کولې.
اسلامي امارت، د ملا اختر محمد منصور تقبلهالله تر زعامت لاندې، یوازنی حرکت و چې له بهرني ملاتړ پرته یې وکولای شول چې دا زهرجنه فتنه په خپله نطفه کې وځپي او دا منحرفه ډله پرېنږدي چې د افغانستان پر پراخې خاوره واکمن شي.
دا یوه داسې فتنه وه چې که پرمختګ یې کړی وای، نه یوازې به یې د یو واقعي اسلامي نظام د جوړولو هیلې له خاورو سره خاورې کړې وای، بلکې افغانستان به یې د کورنیو جګړو، مذهبي اختلافاتو او تباهۍ لمبو ته اچولی وای.
خو د اسلامي امارت پیاوړی قیادت، د امیرالمؤمنین ملا اختر محمد منصور تقبلهالله هوښیار تصمیم او پر خپلواکي ولاړ دریځ دا خطر تر زېږون وړاندې خنثی کړ، پرته له دې چې پر کوم بهرني قوت تکیه وکړي، په خپل ځواک او جرئت یې دا فتنه وځپله او افغان مسلمان ولس یې د دښمنانو له شره وژغوره.
خوارجو، چې د امیرالمؤمنین ملا اختر محمد منصور تقبلهالله له لیک څخه سترګې پټې کړې، تر هغه ژر له زوال او نابودۍ سره مخ شول چې فکر یې هم نه کاوه او ډېر جنګي ځواکونه یې له لاسه ورکړل.
هغه شرمېدلې ماتې، چې نه یوازې یې د دې منفورې ډلې بنسټونه په افغانستان کې ولړزول، بلکې په عراق، شام او نورو هېوادونو کې یې هم د تسلط کاذب هیبت له منځه یووړ او یو له بل پسې یې خپلې سیمې له لاسه ورکړې.
