د داعش پر کلامي او فقهي بنسټونو نقد
۲:- د داعش د خلافت پر ادعا نقد او د اسلامي امت له اجماع سره يې تضاد
د داعش له خوا د خلافت ادعا، په اوسنۍ زمانه کې د اسلامي مفاهيمو تر ټولو لوی تحريف وو، دا تکفيري ډله چې ځان يې «اسلامي دولت» باله، په حقيقت کې د اسلام د صدر د خوارجو لاروي وه چې د ديني متونو او مفاهيمو له انحرافي تفسيرونو سره يې د مسلمانانو وينه روا ګڼله، د فقهي او تاريخي اصولو او مبانيو څېړنه ښيي چې د داعش د خلافت ادعا هېڅ شرعي، عقلي او منطقي ټاټوبی نه درلوده او يوازې د دې ډلې د جنايتونو د توجيه لپاره يوه وسيله او آله وه.
د اهل السنة په فقه کې چې داعش يې د پيروي ادعا درلوده او لري يې، د خلافت مقام ته د رسېدو لپاره ډېر دقيق او روښانه شرايط ټاکل شوي دي، د عدالت شرط چې د اسلامي خلافت له مسلمو اصولو څخه دی، په خپله يوازې همدا شرط د داعش ادعا باطل کولای شي، څنګه يوه ډله چې د ملکي وګړو په وژنه، غلامۍ، د جوماتونو او سپېڅلو ځايونو په ويجاړولو او د مخالفينو په شکنجه کولو لاس پورې کوه او کوي يې، کولای شي د اسلامي عدالت ادعا ولري؟ د پخوا زمانو راهيسې، د اهل سنتو لویو عالمانو د اسلام په عقيدوي او کلامي برخه کې لکه ماوردي او تفتازاني، په ډاګه ويلي دي چې خليفه بايد عادل وي او له ظلم څخه ډډه وکړي، په داسې حال کې چې داعش په خپلو بې ساري جنايتونو او شکنجه کولو سره د اسلامي عدالت ټول اصول تر پښو لاندې کړل.
د اسلامي امت د اجماع مسئله هم د داعش د ادعا بله لويه کمزورې نقطه وه، د اسلام په تاريخ کې خلفاء تل د اهل حل او عقد په بيعت سره واک ته رسېدل، خو داعش څوک د اهل حل او عقد په توګه معرفي کړل؟ يوه محدوده او خودخوانده شورا چې حتی د لویو سلفي عالمانو له خوا هم تاييد شوې نه وه، جالبه خو دا ده چې حتی جهادي څېرو لکه ابوقتاده فلسطيني هم د داعش د خلافت ادعا رد کړه، په مقابل کې، د اسلامي امت ريښتینې اجماع د الازهر علماء، د اسلامي نړۍ لوی مفتيان او اسلامي دولتونه شامل و، چې ټولو داعش يوه تکفيري او منحرفه ډله بلله.
په عمل کې د داعش کړنو هم وښودله چې دا ډله له اسلامي خلافت د واقعي مفهوم سره حتی لږ تر لږه همغږي او ورته والی هم نه لري، خلافت د اسلام په تاريخ کې تل د اسلامي امت د وحدت سمبول و، خو داعش د خپل فکر او عقیدې له مخالفو مسلمانانو په تکفیر کولو سره، په اسلامي نړۍ کې تر ټولو لویې بې اتفاقۍ رامنځته کړې، له بلې خوا، خلافت يوې باثباته سيمې او يوه کارآمد حکومتي نظام ته اړتيا لري، په داسې حال کې چې داعش ډله حتی په خپل اوج کې هم ونه توانېده چې د خپلو تر کنټرول لاندې سيمو باندې له څو کلونو زيات حکومت وکړي.
دا په داسې حال کې ده چې د اسلام د تاريخ ریښتیني خلفا وتوانېدل چې يو لوی تمدن د پرمختللو اداري او قضايي نظامونو سره رامنځته کړي، د داعش او لومړنيو خوارجو مقايسه هم ډېره ګټوره ده، لکه څنګه چې خوارجو د اسلام څلورم خليفه حضرت علي رضی الله عنه د حکميت د منلو له امله تکفير کړ، داعش هم هر هغه څوک چې له خپلو نظرياتو سره يې مخالفت کوه، مرتد باله چې د دوی دا عمل د مسلمانانو د نړيوال مقاومت سره مخ شو او دوی د يوې تخريبي او د اسلامي اصولو او مبانيو ضد ډلې په توګه وبلل شول.
په پای کې بايد ټينګار وشي چې داعش د خلافت په دروغجنې ادعا سره، نه يوازې اسلام ته هېڅ خدمت ونه کړ، بلکې د اسلام څېرې ته يې تر ټولو لويه ضربه ورکړه، نن ورځ، حتی د دې ډلې پخوانيو ملاتړ کونکو هم د دوی په انحرافاتو اعتراف کړی دی.
د اسلامي عالمانو دنده دا ده چې د داسې انحرافاتو په اړه د روښانه کولو سره، د ځوانو مسلمانانو له پاکو احساساتو څخه د نويو ډلو د ناوړه ګټه اخیستنې مخه ونیسي. اسلام د رحمت او عدالت دین دی، نه د تاوتريخوالي او تکفیر لکه څنګه چې یې داعش ادعا درلوده.
