له څو کلونو راهیسې افغانستان د داسې ډلې د ظهور شاهد دی چې د اسلام په نامه د وحشتناکو جنایتونو مرتکب شوې ده، دا ډله چې ځانونه د دین مدافعین ګني، په حقیقت کې د دې خاورې د دښمنانو د لاس آله دي چې د افغانستان وحدت او امنیت زیانمن کړي، عام خلک، دیني عالمان او مشران د ددې ډلې د ظلم او جنایت قربانیان دي او د دوی د فعالیتونو ناوړه اغېزې د هېواد په هرځای کې احساسېږي.
دغه ډله يواځې داعش ده او د دې ډلې اصلي څېره له فساد، فتنې او د پردیو د ابزار پرته بل څه نه ده.
د افغانستان د پخوانۍ ادارې مشر، حامد کرزي، چې د پردیو د شومو نقشو په اړه له دننه معلومات لري، په دې اړه وایي:
. «داعش په افغانستان کې د امریکا پروژه ده.»
«ما ډېر ځله په ښکاره ویلي چې په افغانستان کې د داعش شتون او فعالیتونه د بهرنیو ځواکونو له ملاتړ پرته ناشوني دي.»
. «زه باور لرم چې داعش د امریکا د بهرني سیاست یوه آله ده چې غواړي سیمه ناامنه کړي.»
داعش د خپلو بېرحمانه وژنو او ظلمونو له لارې له ځان یوه غیرانساني او غیر اسلامي څېره څرګنده کړې، دوی د بېګناه خلکو په نښه کولو او د هېواد د وحدت او امنیت د ختمولو په هڅه کې دي، څو خلک له خپلو دیني او ملي ارزښتونو لېرې کړي.
خو د دې ظلم او فتنې په وړاندې، د اسلامي امارت اتل ځواکونه د پولادي ارادې او ټینګې عقیدې سره میدان ته راوتلي، د دوی بریالي عملیات د هېواد په بېلابېلو ولایتونو کې نه یوازې د امنیت سبب شوي، بلکې د دښمن د افغانستان د کمزوري کولو پروژه یې هم ناکامه کړې، د اسلامي امارت د ځواکونو هڅې د ستاینې وړ دي، ځکه دوی په خپلې سرښندنې سره خلکو ته سکون او ډاډ ورکړی چې امنیت او آرامي د دوی لومړنۍ موخه ده.
داعش سره له خپلو ټولو دروغجنو ادعاوو، یوه پروژه ده چې د پردیو له خوا د افغانستان د وحدت او پرمختګ د زیانمنولو لپاره ډیزاین شوې ده، خلک او دولت باید په هوښیارۍ او اتحاد سره د دې شومې پروژې په وړاندې ودریږي او نړۍ ته وښيي چې دا خاوره هېڅکله د دښمنانو فتنو او سازشونو ته تسلیمېدونکې نه ده.
په پای کې، یو ځل بیا د اسلامي امارت د ځواکونو له مخلصانه او اغېزناکو هڅو څخه د داعش په وړاندې مبارزه کې مننه کوو او د دعا په لپه یوو چې په ټول افغانستان کې د سولې او آرامۍ فضا رامنځته شي.
