په سوریه کې یو شمېر قومندانانو د داعش په وړاندې په جکړه لاس پوري کړ، له همدې امله هغوی د اسد رژیم پر وړاندې له جهاد څخه لاس په سر سول او دا د دې سبب سو، چې له دوی څخه یو شمېر یې شهیدان کړل شي، دې ته ورته، یو شمېر اسلامي هیوادونو د داعش د بدنامي او خطرناکې ډلي پر وړاندې د جهاد اعلان وکړ.
نه یوازي د سوریې خلکو، بلکې نورو عربي ولسونو هم د دغې جګړې د حکم په اړه پوښتني لرلې، په ځانګړې توګه د هغه خلکو په اړه چې د دې غربي ډلي په مقابل کې وژل کېږي ایا شهیدان دي که څنګه؟
د څه وخت لپاره د هغو پیلوټانو په اړه بحث کېده، چې د داعش پر وړاندې په جګړه کې یې برخه اخېستې وه، په داسې حال کې چې ډېری مشهور علماء په دې اړه د حکم په ورکولو کې زړه نا زړه وو، حتی ځینو یې هغه خلک شهیدان نه بلل، چې د داعش پر وړاندې په جګړه کې وژل کېږي، او دا هغه دریځ دی، چې مونږ پرې په ټینګه رد کوو.
ډېر وختونه خلک د دوی د جنایتونو په اړه پوښتنې کوي، چې دغه باطله ډله یې د اسلام په نوم کوي، پر دې سر بېره یو شمېر غیر مسلم خلک هم د داعش په اړه د سني اسلام دریځ پوښتني کوي، او د سني مسلمان په توګه د داعش د پیروانو ناسمي طبقه بندۍ ته په کتو سره، چې عامه ذهنیت ته یې لار موندلې، ډېر خلک د دې وضاحت غواړي، چې اسلام تر کومه وخته د داعش د نظریاتو او کړونو استازیتوب کوي.
د دې وضاحت زیات اړین دی، چې یو شمېر لوېدیځي رسنۍ له دې فرصت څخه په استفادې سره غواړي د داعش ایډیالوژۍ او د مسلمانانو د اصلي مسېر تر منځ یو ناسم فکر رامنځته کړي، چې د دې یوه مشهوره بېلګه (Fox News) دی.
لوېدیځو رسنیو د داعش په فتواګانو، دریځونو او جنایتونو کې یو شمېر اساسي توکي موندلي او غواړي له دې لاري د لویدځوالو په منځ کې د اسلام په اړه وېره خپره کړي، په داسې حال کې چې هلته اسلام مبارک دین ورځ تر بلي پر خپرېدو دی او د پرمختګ په حال کې دی، او خلک یې ورځ تر بلي اسلام ته مخه کوي.
موږ به ان شاءالله په ټولنه کې د خوارجو او په خاصه توګه د داعش پر وړاندې د جګړې شرعي حکم بیان کړو، او د منهجي دلایلو له مخي دې پایلو ته رسېدلي یو، چې د دې مفسدي ډلي ټولي کړني په بشـپړه توګه د شریعت سره په ټکر کې دي او د خلافت دعوه یې هم نا سمه ده، او د سیمي پر خلکو د دوی پر وړاندې د دې لپاره جګړه فرض ده، چې د ځمکي له کرې څخه د دې غربي او مغرضي ډلي شتون ورک کړي.
