د جمهوریت د مهال نیول شوي امنیتي چارواکي الله داد فدايي د اعترافاتو ویډیو یو ځل بیا له داسې حقیقت څخه پرده پورته کړه چې نړیوال او د سیمې هېوادونه ورباندې چوپه خوله دي او یا خو د ترهګرو د همېشني کوربه هېواد پر وړاندې یوازې تر تش اعتراضه پورې غبرګون ښيي.
څه موده وړاندې قوماندان الله داد په خپله سیمه کې د امنیتي ځواکونو له لوري ونیول شو چې ځینو غرب مېشتو ورباندې غبرګونونه وښودل، په داسې حال کې چې د نیونې پر اصلي هدف او د نیول شوي کس په پخوانیو او اوسنیو جنایتونو یې هېڅ فکر نه و کړ، خو کله چې د جنرال سمیع سادات او قوماندان الله داد تر منځ ټیلیفوني مکالمه هم خپره شوه، د ډېرو انتقاد کوونکو پر غوسه د سړې اوبه تویې شوې.
جنرال سمیع په دغه غږیز کلیپ کې اقرار کوي چې دی په پاکستان کې دی او له الله داد څخه هم غواړي چې که امکان وي هلته ورشي، خو قوماندان الله داد ورته وايي چې دده شتون په لغمان او نورستان کې مناسب دی او په نظامي فعالیتونو یا کړنو کې به مرسته کوي. دغه کشف یو ځل بیا وښوده چې پاکستان د شر او فساد وروستی تم ځای دی او غواړي د جمهوریت د مهال تښتېدلي نظامیان، اربکیان او د شر و فساد یو شمېر هغه عناصر بیا د افغانستان او شرعي نظام پر ضد مجهز کړي چې موخه یې فقط واک او پیسې تر لاسه کول دي.
پوځي رژیم چې اوس په افغانستان کې حاکم ثبات، بیا رغونه او پرمختګونه نه شي زغملی او له بلې خوا له پر له پسې کورنۍ بې ثباتۍ سره مخ دی، اوس د همدغه کورنیو ستونزو د پټولو لپاره پړه پر افغانستان اچوي، څو د پاکستان ولس ته وښيي چې ستونزه ټوله په افغانستان کې ده. بله عجیبه خبره خو دا ده چې په ځلونو له ډېورنډ فرضي کرښې را اړول شوي وسله وال او پټې ډلې د اسلامي امارت له لوري نیول شوې، رسوا او پلانونه یې شنډ شوي دي، اما پر دې سربېره هم د نورو په اشارو غولېدلي د مقاومت، جبهو او ازادۍ په نامه هڅه کوي چې افغان خاورې ته د وسله وال فعالیت او نا امنۍ لپاره را ننوځي، چې دا ارمان یې تل ګور ته ورسره وړی دی.
د سمیع سادات او الله داد فدايي په مکالمه کې دوه ټکي نور هم ضرور دي چې یو پکې په نورستان کې د یوه مهم پله نړول دي، څو دوی ته پرمختګ او خوندیتوب اسانه شي، بل هم د جمعې په ورځ بریدونه او نا امني جوړول، چې په نظر یې د اسلامي امارت مجاهدین اکثره په دې ورځ رخصت وي او دوی به له فرصت څخه ښه ډول ناوړه استفاده وکړي.
ددغه مکالمې له خپرېدو او د قوماندان الله داد له نیول کېدو سره یو ځل بیا د پاکستان پر دوه مخۍ یو بل محکم ګوزار وشو، دا یې ورته وښوده چې افغان خاوره د نورو د لوبو او پروژو ځای نه دی او نه هم امنیتي ځواکونه دومره بې پروا او ویده دي چې ددغه شرخوښو له کړنو دې نا خبره وي.
که څه هم دغه نیول شوی قوماندان له فتحې وروسته د بښنې یا عفوې له فرمان څخه په ګټه اخیستنې په خپله سیمه کې عادي او ارام ژوند پیل کړ او ژمنه یې هم کړې وه چې هېڅکله به د هېواد پلورنې او نا امنۍ لپاره هڅه نه کوي، خو د ګاونډي پوځي رژیم او شر وفساد د مشرانو مادي وعدو یې سترګې ور ړندې کړې او د عفوې له امتیاز څخه په خپله سرغړونه وکړه چې پښېمانتیا یې هم ښودلې ده.
د پاکستاني پوځي رژیم له لوري د پخوانیو جمهوريتي نظامیانو، اربکیانو او فساد ډلو د ملاتړ موضوع اوس یوازې تر افغانستان پورې محدوده نه ده، بلکې دغه رژیم د خپلې بقا او غربي ژمنتیا د دوام لپاره تل هڅه کړې ده چې داخلي کمزورۍ په نورو د پړه اچولو او اوسني حاکم نظام د بې ثباته کولو له لارې پټې کړي.
ددغه هېواد پوځي رژیم او امکانات په خپل ټول توان او سپین سترګۍ هڅه کوي چې د افغان خاورې دغه دښمنان تر ډېورنډ فرضي کرښې پورې حتی په پوځي موټرونو کې ورسوي او هلته یې ددې لپاره ښکته کړي چې افغانستان ته خنډ او نا امني رامنځته کړي، خو د اسلامي امارت ویښوسرحدي او استخباراتي ځواکونو هر ځل یا ژوندي نیولي او یا یې هملته د خپلو شومو اعمالو په سزا رسولي دي.
دا ټول حقیقتونه څرګندوي چې پاکستان په سیمه کې د شرو فساد وروستی تمځی دی او د ټولو هغو ډلو ملاتړ کوي چې د دوی په امر د خپلو هېوادونو او نظامونو پر وړاندې د پیسو او څوکۍ په تمو جنګېږي. ډېره سخته اړتیا ده چې پوځي رژیم باید نور دغه حساسیتونه درک کړي، واقعي او رښتینی سیاست زده کړي او خپل ولس ته له زړه نه رښتیا ووايي چې نور د یو اړخ واک چلونې وړتیا نه لري او نه شي کولی چې له داخلي ننګونو سره کامیابه مبارزه وکړي.
