۸- د اسلامي رسالت هېرول، د موخې او مقصد له لاسه ورکول او دنیا ته مخه کول
په حقیقت کې، لومړنی لامل چې زموږ اسلامي ټولنې ته یې ستر زیان رسولی، اسلامي امت یې کمزوری کړی او د هغه یووالی او انسجام یې له منځه وړی، د هغه ستر هدف او مقصد هېرېدل دي چې دا امت په اصل کې د هماغې د تحقق لپاره رامنځته شوی او د همدې رسالت له امله د ځمکې پر مخ د غوره امت په توګه پېژندل شوی دی.
قرآن عظیمالشان د انسان د پیدایښت اساسي موخه د الله تعالی عبادت ښوولی دی: ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاریات: ۵۶] «ما پېریان او انسانان یوازې د خپل عبادت لپاره پیدا کړي دي.»
همدارنګه، الله تعالی جلجلاله د رسول الله صلی الله علیه وسلم د امت غورهوالی د بشریت په خیر او ښېګڼه کې بیان کړی دی. الله جلجلاله د مسلمانانو عزت او سرلوړي په خپل عبادت او د ژوندبښونکي اسلام لوري ته د بشریت په بلنه کې ایښې ده. کله چې مسلمانان د خپل دې رسالت عملي کوونکي وو، د نړۍ معنوي، علمي او سیاسي مشري د هغوی په لاس کې وه؛ خو له بده مرغه، د وخت په تېرېدو سره مسلمانان په دنیا او مادیاتو کې ډوب شول او خپل هغه ستر رسالت یې هېر کړ چې د الله تعالی جلجلاله عبادت او د اسلام لوري ته د انسانانو بلنه وه.
د رسالت په هېرېدو سره د اسلامي امت د تدریجي زوال بهیر پیل شو او مسلمانان د انحطاط په کندې کې راګیر شول. دا یو څرګند حقیقت دی چې د ملتونو ژوند د رسالت په لرلو کې دی او د رسالت نشتوالی له مرګ او د تاریخ برخه کېدو سره برابر دی. په حقیقت کې، د رسالت هېرول او دنیا ته مخه کول هغه دوه وژونکې ناروغۍ دي چې نږدې د مسلمانانو ډېری یې ځپلي دي؛ تر دې چې د ډېرو مسلمانانو ټوله اندېښنه او هڅه د شتمنۍ په راټولولو او د دنیا له خوندونو څخه په خوند اخیستنه اوښتې ده. همدا هغه څه دي چې رسول الله صلیاللهعلیهوسلم ترې خپل امت خبرداری ورکړی دی: «إِنَّ لِكُلِّ أُمَّةٍ فِتْنَةً، وَإِنَّ فِتْنَةَ أُمَّتِي الْمَالُ»
«د هر امت لپاره یوه فتنه شته او زما د امت فتنه مال دی.»
له دنیا سره بېکچې مینه مسلمانان داسې کړي چې د آخرت او د حساب ورځې په اړه لږ فکر هم نه کوي. د رسالت هېرول د مسلمانانو د زوال لومړنی لامل دی؛ ځکه الله تعالی جلجلاله د اسلامي امت عزت او نېکمرغي په محمدي شریعت کې ایښې ده. هرکله چې مسلمانان له دې لارې واوړي او دنیا ته مخه کړي، سپک او ذلیل به شي. حضرت عمر رضي الله عنه فرمایي: «نحن قومٌ أعزَّنا اللهُ بالإسلام، فإن ابتغينا العزةَ بغيره أذلَّنا اللهُ.»
«موږ هغه قوم یو چې الله تعالی جلجلاله د اسلام په وسیله عزت راکړی دی؛ که عزت له اسلام پرته په بل څه کې ولټوو، الله تعالی جلجلاله به مو ذلیل کړي.»
د مسلمانانو د دویم خلیفه دا زرینې خبرې د سرو زرو په اوبو د لیکلو وړ دي؛ ځکه له هماغې ورځې چې مسلمانانو خپل هدف او رسالت هېر کړ، دنیا او مادیاتو ته یې مخه کړه او عزت یې له اسلام پرته په بل څه کې ولټاوه، له ذلت او وروسته پاتېوالي سره مخ شول. لنډه دا چې تر هغو به خپل پخوانی عزت او سرلوړي بېرته ترلاسه نه کړو، څو خپل اصلي هدف او رسالت راژوندی نه کړو او هغه الهي موخه په خپل عملي ژوند کې پلې نه کړو چې الله تعالی جلجلاله موږ د هغې لپاره پیدا کړي یو.
