د امریکایي اشغال پر مهال له ۴۸ تر ۵۲ اشغالګرو هېوادونو او د هغو بېشمېره لاسپوڅو؛ دغه راز د شوروي یرغل پر مهال روسیه او ملاتړي یې د وخت په تر ټولو درنو وسلو، مهماتو او تبلیغاتي وسایلو سمبال وو، خو په مقابل کې یې د افغانستان د مسلمان ولس او مجاهد ملت درنه وسله آر پي جي راکټ و، چې په ځمکه یې زنجیردار ټانګونه او په هوا چورلکې به د دې آر پي جي له کړنګ او د «الله اکبر» له نعرې وارخطا او ډارېدل.
د روسي اشغال په وړاندې لا افغانان د معاصرې نړۍ له فریبونو دومره نه وو خبر، خو د امریکایي اشغال پر مهال د دښمن هر ډول مکر او فریب ته چمتو او ځیر وو. که څه هم د افغانستان اسلامي امارت مجاهدینو ډېرو پرمختللو وسایلو ته لاسرسی نه درلود، خو په ډېرو ساده وسایلو، لکه ډرون کمرې، چې اصلي دنده یې رسنیزه، څېړنیزه او څارنیزه وه، د الله جل جلاله په نصرت یې په داسې نوښتګر ډول وکارولې، چې د اشغالګرو پښې یې یو په بل پسې ور سستې کړې.
څرنګه چې الله جل جلاله په قرآن کریم کې فرمایلي دي:
وَأَعِدُّوا۟ لَهُم مَّا ٱسْتَطَعْتُم مِّن قُوَّةٍۢ وَمِن رِّبَاطِ ٱلْخَيْلِ تُرْهِبُونَ بِهِۦ عَدُوَّ ٱللَّهِ وَعَدُوَّكُمْ وَءَاخَرِينَ مِن دُونِهِمْ لَا تَعْلَمُونَهُمُ ٱللَّهُ يَعْلَمُهُمْ ۚ وَمَا تُنفِقُوا۟ مِن شَىْءٍۢ فِى سَبِيلِ ٱللَّهِ يُوَفَّ إِلَيْكُمْ وَأَنتُمْ لَا تُظْلَمُونَ. [سورة الأنفال: ۶۰]
او تاسې تر خپلې وسې ډېر زیات طاقت او تیار زین کړي اسونه، د هغوی د مقابلې لپاره برابر کړئ، تر څو چې په دې وسیله د الله پر دښمنانو، پر خپلو دښمنانو او پر هغو نورو دښمنانو هیبت راولئ، چې تاسې یې نه پېژنئ، خو الله یې پېژني. د الله په لاره کې چې تاسې هر څه ولګوئ، د هغو پوره او بشپړ مکافات به ستاسې لوري ته راوګرځول شي، او له تاسې سره به هېڅکله ظلم ونه شي.
نو د افغانستان اسلامي امارت مجاهدینو او مسؤولینو د همدې سپېڅلي شریعت پر بنسټ خپله لار تعقیب کړه او بالاخره یې د هغو نورو دښمنانو، چې اوس زموږ په ګاونډ کې د پاکستاني پوځي رژیم تر سیوري لاندې د مسلمه امت د بربادۍ او د امن د له منځه وړلو لپاره روزل کېدل، پر وړاندې داسې کاري، دقیق، ځیرک، سریع او ځواکمن ګذارونه وکړل، چې د پورته آیت مبارک پر سیاق برابر یې د مسلمه امت د هر پټ او ښکاره دښمن د مادي او معنوي بنیادونو، یعنې عزم، ارادې، غرور او پر خپلو نظامي وسایلو د تکیې ستنې ولړزولې.
په ځانګړي ډول د پاکستان د اجیرې پوځي ادارې جنرالان، که لږ هم له سوچ، فکر، تعقل او څېړنې څخه کار واخلي، نو دا به ور معلومه شي، چې افغانان، او په ځانګړي ډول د دې مجاهدې خاورې هر هغه بچی، چې د الله جل جلاله اوامرو ته ځان ژمن ګڼي، نه چا اېل کړي او نه یې چاته سر ټیټ کړی.
غواړو د پاکستان پوځي رژیم دې ته متوجه کړو، چې زموږ بریدونه به تر دې وروستیو عملیاتو لا ډېر دقیق، کره، پر ځای، ځواکمن او ځیرک وي، خو پر خپلو ناکامیو مو سوچ وکړئ او زموږ اعداد مه ازمویئ.
