د پېړیو په اوږدو کې ډېر ځله داسې کړۍ او ډلې رامنځته شوې دي چې په ظاهر کې به مسلمانان ښکارېدل، دعوه به یې د اسلامیت کوله، خو په باطن کې به د مسلمانانو وینې څښوونکي او لوټماران وو. لکه د سلطان صلاحالدین رحمهالله او نورالدین زنګي رحمهالله په وخت کې د (شیخ سنان) کرایي ملیشه او هشیشیان، چې د دوی کار او عمل به کټ مټ د پاکستان د پوځ په شان و. دوی به د کرایې او اجورې په مقابل کې مسلمانان او لوړ شخصیتونه شهیدان کول، د مسلمانانو مالونه او زیرمې به یې لوټ کولې، او د مسلمانانو ښځې به یې کفارو ته د توطیو او دسیسو لپاره روزلې.
نن هم کټ مټ همداسې حالت دی. د پاکستان پر معدنیاتو، زیرمو او ولسي ټکسونو یې خیټه اچولې ده. که ولس له لوږې مري، خو دغه کړۍ او ډلې به ټکس اخلي. په پاکستان کې د دوی (پوځ) له خوا د مخالفو اشخاصو او شخصیتونو مرموزې وژنې، د دغه قوم د پاک لمنو د اجورې او د کفارو د خوشالۍ لپاره پلورل، او د کفر د ګټو لپاره د مظلومو مسلمانانو قتل عام— دا هغه څه دي چې پخوا هم دغسې کرایي ملیشو او کړیو ترسره کول، او نن یې د پاکستان پوځ د اسلامیت په نوم ترسره کوي.
جالبه دا ده چې دغه پوځ ځان ته د پاک، مسلمان او د اسلام پوځ نوم ورکوي، د ولسي قشر او طبقې پر ظاهري اصولو او مقدسو شعارونو پابندي یوازې د دې لپاره ده چې په ظاهر کې ولس وغولوي او په باطن کې خپل اهداف پرمخ یوسي. د تاریخ په اوږدو کې همداسې کرایي ملیشو همداسې القاب او شعارونه لرل، څو په ظاهر کې د ولس له بېباورۍ او ملامتیا ځان وژغوري.
همدغه پوځ هم د خپل خباثت او شرارت لپاره داسې نوم او نښان غوره کړی چې ګواکې موږ د اسلام مدافعین یو، پاک پوځ یو او د اسلام ساتونکي یو، خو په باطن کې د هغه آیت شریف مصداق دي چې وايي: موږ خو ستاسو دوستان یو، خو کله چې کفارو ته ورشي، بیا د هغوی دوستي او ګټې بیانوي او د مسلمانانو په صداقت او باور باندې تمسخر او خندا کوي. همداسې د پاکستان د پوځ پالیسي ده: په ظاهر کې مسلمانانو ته د دوست او ملاتړي چیغې وهي، خو په باطن کې بیا همدغه مسلمانان پلوري، وژني، لوټ کوي او د کفارو د ګټو لپاره یې قرباني کوي.
زیات مثالونه شته چې دغه کړۍ د مسلمانانو د وینو څښوونکي ثابتوي: په خپلو واک لاندې مظلومو هیوادوالو د ضربِ غضب عملیات، هره ورځ د قبایلي او پښتني سیمو د مظلومو ولسونو بمبار، او مرموز قتل عام؛ په افغانستان کې زرګونه او په فلسطین کې لسګونه زره مظلوم مسلمانان وژل— ایا دا د پاک پوځ، مسلمان پوځ او د مسلمانانو د مدافع پوځ کړنې دي، که د مسلمانانو دښمن او د هغوی د زیرمو، خاورو او مقدساتو لوټمار او تخریبګر؟
د پاکستان ولس او د نړۍ مسلمانان باید د دغه پوځ اصلي څېره درک کړي، چې یوازې د اسلام او مذهب په نوم یو شعار دی؛ په باطن کې د اسلام او مسلمانانو کرایي ډوله اجیر دښمن دی، چې په خپل مکر، فریب او منافقت د کفر اهداف پالي.
