کله چې یو څوک د نورو په حقونو تېری کوي او د خپلو ګټو لپاره د بل زیان ته ملا وتړي، نو په طبیعي ډول خپل دوستان له لاسه ورکوي، دښمنان پیدا کوي، خپل حیثیت ختموي او په سیمه کې منفور ګرځي. د پاکستان حکومت د تېرو او اوسنیو کړنو له نظره دقیقاً له ډېر ناوړه برخلیک سره مخامخ دی.
پاکستان د داخل میشتو پښتنو او بلوڅانو په وړاندې دومره ظلمونه کړي چې قلم ترې عاجزه ده. د بلوڅانو شخصي ملکیتونه یې غصب کړل، هغوی یې له هوسا ژونده محروم کړل او په خپل هېواد کې بې ځایه کېدو او کډوالۍ ته اړ شول. ګڼ شمېر بانفوذه وګړي ترې لادرکه او بندیان شوي؛ پایله دا شوه چې ځینې بلوڅان د خپلو حقوقو د ترلاسه کولو لپاره وسلې اخیستلو ته مجبوره شول.
همدارنګه هغه افغانان چې په ډېر اضطراري حالت کې يې پاکستان ته د يوه مسلمان څنګلوري په صفت پنا يوړه، ژوند يې پیل کړل او بیا یې د څو لسیزو په تېریدو سره هملته سرمایه داري وکړه، د سوداګرۍ لپاره يې بی ساري امکانات برابر کړل چې په پایله کې د ټول پاکستان دولتي بودیجه د همدې کډوالو له جیبه ترلاسه کېده او د ټولنې په وده کې یې ونډه واخيسته. خو کله چې پاکستان لږ تر لږه خپل ځان بسیا ولیدل، نو پر همدغو مظلومو کډوالو یې د قهر مخ را واړاوه او بې له کوم دلیل یې هغوی له خپلو شخصي ملکيتونه تش لاس وتلو ته اړ ایستل.
د پاکستان یو بل ستر جرم دا هم دی چې د خپلو امنیتي او استخباراتي تېروتنو او کمزوریو د پټ ساتلو په موخه، کله چې د خپلو مخالفینو له نیولو ناتوانه شي، نو د خپل ملت بې ګناه خلک ونيسي او کلونه_کلونه يې د ژوند او مرګ معلومات نه کېږي، چې دا کړنې د خلکو د باور له منځه وړلو لا سبب شوې دي.
تر ټولو تازه او دردونکې پېښه د افغانستان د حریم بیا بیا نقض او د ياد هېواد په دننه کې ملکي تأسیسات او ملکي وګړي په نښه کول دي. له اوږدو جګړو څخه ستړي راوتلي افغانان چې لا یې د آرام ساه نه ده اخیستې، په ډېره بې رحمۍ سره یې په شهادت ورسول. دې تجاوز دومره منفي تاثیر پیدا کړ چې پاکستان نه یوازې د سیمه ییزو ولسونو له لوري وغندل شو، بلکې د نړیوالو لپاره هم په يو منفور دولت بدل شو، ځکه خلک اوس پاکستان ته د بهرنیو ځواکونو، په تیره بیا د امریکا، د يوې وسیلې په توګه ګوري چې په غیر مستقیم ډول د افغانستان پر وړاندې کار ترې اخیستل کېږي.
پایله داچې، کله چې باور له منځه ولاړ شي، کرکه او نفرت پیدا کېږي. حتی که یو دولت په جنګي تجهیزاتو او قانوني جوړښت هم سمبال وي، بيا هم په ناڅاپي توګه له زوال سره مخ کېږي او ژر ده چې دغه حکومت به خپل واک او مشروعیت له لاسه ورکړي.
د یادونې وړ ده چې افغانان هېڅکله هم د یرغلګرو پر وړاندې چوپ نه دي پاتې شوي، بلکې تل یې په کلکه او قاطع توګه ځواب ورکړی دی. ځکه چې افغان ولس ته خپله خاوره، خپل ملي وقار او دیني مقدسات ستر ارزښت لري او د دغو ارزښتونو د دفاع لپاره له سر او ماله هم تېرېږي.
له همدې امله، پاکستان باید له خپلو ظالمانه کړنو لاس واخلي، خپلې کورنۍ ستونزې په خپله حل کړي، او افغانستان ته دې د یوه اسلامي او دروند ګاوندي په سترګه وګوري.
