شپږم لوی لامل چې پاکستان به سقوط کوي، هغه د پاکستان اقتصادي بې ثباتي ده. د پاکستان اقتصاد ته که سقوط و نه وایو، نو د سقوط پر حالت ولاړ خو خامخا دی، ځکه چې پاکستاني رژیم في الحال تر ۱۳۷ میلیارده ډالرو ډېر قرضدار دی، چې د دې قرض سود هر کال تر هغه ډېر دی چې پاکستان اقتصادي وده کوي.
همدارنګه د پاکستان صنعت هم د سقوط تر پولې رسېدلی دی؛ سلګونه فابریکې فلج شوې دي او پاتې نورې هم په نیمه درېدلي حالت کې دي. د پیسو نړیوال صندوق پاکستان ته سخت شرایط ایښي دي، چې د پاکستان صنعتکاران یې له شدیدو چلینجونو سره مخ کړي دي، د نړیوال صندوق یو لوی شرط دا دی چې پاکستان باید د برېښنا، نفتو او ګازو بیې پر خپلو وګړو لوړې کړي، دا کار خپله د صنعت د سقوط لوی لامل دی، ځکه صنعتکاران مجبوروي چې د تولیداتو بیې لوړې کړي، او پاکستاني توکي بیا په نړیوال مارکیټ کې د لوړ قیمت له امله خریدار نه لري.
بل مشکل چې د پاکستان د اقتصاد د سقوط سبب کېږي، هغه سیاسي بېثباتي، لوړې مالیې او خراب امنیت دی؛ څه چې پانګوال زړه نا زړه کوي چې په پاکستان کې نوې پانګونه وکړي، او برعکس مخکني پانګوال هڅه کوي چې خپلې سرمایې له پاکستانه وباسي.
همدارنګه د پاکستان د نفوسو ډېرېدل یو بل ستر فشار دی، هر کال میلیونونه خلک زیاتیږي، مصرف ورسره لوړیږي، خو په همدې کچه نه نوې فابریکې جوړېږي او نه صادرات زیاتېږي. بلکې برعکس د کارونو او فابریکو ګراف ورځ تر بلې ښکته روان دی. د پاکستان د روپۍ قیمت ورځ په ورځ کمیږي او نړیوال اعتبار یې له لاسه وځي، چې دا د اقتصاد لپاره بل سخت ګوزار دی.
هره ورځ نوي پورونه اخیستل د پاکستان د اقتصاد سقوط نور هم یقیني کوي، اقلیمي بدلونونو د پاکستان زراعت سخت کمزوری کړی؛ هر کال سیلابونه، په ځینو سیمو کې وچکالي، خراب مدیریت، نباتي ناروغۍ، او همدارنګه د هند له لوري د اوبو بندیزونه د پاکستان زراعت له پښو غورځوي، د خوراکي توکو بیې لوړې شوې دي او خلک تر سخت فشار لاندې دي.
فاسد سیاست چې د پاکستان د عوامو تر څنګ یې پانګوال هم تنګ کړي، یو بل مصیبت دی. د پاکستان پوځي رژیم تل سیاست او اقتصاد سره تړلي او په دې کار سره یې پانګوالو ته میلیونونه ډالر زیان رسولی دی. دا خپله د پاکستاني پوځ له لوري د خپلو اقتصاد ته ضربه ورکول دي.
لکه څنګه چې مخکې مو ویلي، د پاکستان پوځ او حکومت ټول د کرایې په کسانو مخته ځي. هېڅ دیني او ملي انګیزه نه لري، یوازې د پیسو د ګټلو لپاره کار کوي. نو د پاکستان د اقتصادي سقوط له امله به پاکستاني پوځی رژیم هم سقوط کوي؛ ځکه پاکستان به بیا ونه شي کولی چې خپلو کرایه عسکرو ته معاش ورکړي. همدارنګه د پاکستان ظالمان جنرالان چې د فساد او رشوت په لویو پیسو عادت شوي، به مجبور شي چې د پیسو د لاسته راوړلو لپاره پر عوامو ظلم زیات کړي او د حکومت هر څه وپلوري.
د پاکستان پوځي رژیم داسې جوړ شوی چې پرته له پیسو یوه ورځ هم مفت کار نه کوي. د پاکستان استخباراتي سیستم هم پر پیسو ولاړ دی. که پیسې نه وي، هغه کسان چې نن د پاکستان لپاره معلومات راټولوي، سبا به د همدې محرمو رازونو په خرڅولو د پاکستان د مخالفینو خدمت کوي.
که په خلاصه توګه ووایو، د پاکستان حکومت او پوځ پرته له کومې ملي یا دیني انګیزې یوازې د پیسو په زور راټول شوي او منظم شوي دي. که د پاکستان اقتصاد سقوط وکړي او پیسې ختمې شي، نو پاکستان حکومت او پوځ به هم ورسره یو ځای سقوط وکړي. ځکه په پاکستان پوځ او حکومت کې هېڅ داسې څوک نشته چې یوه ورځ دې د هېواد لپاره وړیا کار وکړي.
