چا چې د کمزورو اقتصادي، تجارتي او نړیوال ارزښت ښکته او پورته کاوه، نن خپل ښکته اقتصادي او هر اړخیز ارزښت پورته کولو په هڅه کې دی.
د څو میاشتو په جریان کې چې د اسرائیل او ایران ترمنځ ښکېلتیا او جګړه د نړۍ اقتصادي او تجارتي ساه بندېدو سبب شوې ده، داسې وخت هم راغی چې په دغه جګړه کې امریکا هم ښکېله شوه. د دې ښکېلتیا سبب د خپلو تجارتي او اقتصادي لارو بندښت او په منځني ختیځ کې د امریکا څوکیدار (اسرائیل) سخته ځپنه او د له منځه تلو امکان و. د منځني ختیځ او د هرمز تنګي لار د فشار او جګړې مهمه اقتصادي او تجارتي برخه ګرځېدلې ده.
دغه لاره د امریکا ګټې، اقتصاد، تجارت او ارزښت تر هغه حده وغورځول، چې په څو ورځو کې یې په نړیواله کچه، د جي۷ هېوادونو، اروپا، استرالیا او ملګرو ملتونو ترمنځ له سخت زوال او ټیټوالي سره مخ کړ. جالبه دا ده چې د امریکا اقتصادي، مالي او پوځي قوت داسې ښکاري لکه یوازې په منځني ختیځ او د عربو په طبیعي زېرمو او شتمنیو پورې تړلی وي. کنه، څنګه امکان لري چې هغه هېواد چې د پاکستان کالدارې به یې په څو جملو مخالفې وینا په سلو کې پنځوس راټیټولې، نن یې مخالف الفاظ او نیوکې هېڅ مالي، اقتصادي او تجارتي اغېز ونه لري؟
د هرمز تنګي بندېدل، د امریکا په جګړه کې ښکېلتیا او مذاکراتو ته اړ کېدل د دې سبب شول چې نړیوال ارزښت له لاسه ورکړي. دا د نړۍ د ځواک اصل دی چې هره خبره باید تر عمل ورسېږي او هره جګړه باید په عمل کې وازمایل شي. هغه ځواک چې کابو د نړۍ نیمایي طبیعي شتمنۍ، زیرمې او بحري لارې یې تر واک لاندې لرلې، د څو ورځو فشار له امله خپل نړیوال ارزښت له لاسه ورکړ. دا ښايي ځینو ته عجیبه ښکاره شي، خو که ژور فکر پرې وشي، یو حقیقت ته ورته دی.
د امریکا مالي، تجارتي، اقتصادي او حتی د پوځي وسایلو بازار، پانګونې او نورې ګټې تر ډېره د عربي جزیرې، د عربو سمندرونو او د هرمز تنګي پورې تړلې وې. د جګړې، ښکېلتیا او ناسمې پالیسۍ له امله یې دا هر اړخیزې ګټې له خطر سره مخ شوې.
که ایران او نور اسلامي هېوادونه د امریکا دغه ستراتیژیکې او اقتصادي لارې وتړي او د وسلو بازار د خپلو تولیداتو پر بنسټ تنظیم کړي، نو امریکا به خپل نړیوال اقتصادي، سیاسي او پوځي ارزښت له لاسه ورکړي. بلکې ښايي د جګړو، داخلي اختلافاتو او بې ثباتۍ هېواد ته واوړي. په هغه صورت کې به نور د مسلمانو هېوادونو پر اقتصاد، سیاست او تجارت د فشار لپاره توند الفاظ او نیوکې اغېز ونه لري.
تاسې به وګورئ چې امریکا به د دغو ګټو د ساتلو لپاره بېلابېلې لارې وکاروي، هغه که سوله وي یا جګړه. خو که ایران ټینګه مقابله وکړي او امریکا له دغو لارو او سیمو څخه بې برخې کړي، نو بیا به نه امریکا پخوانۍ امریکا وي او نه به یې خبرې دومره ژر مالي اغېز ولري. بیا به د خپل له لاسه تللي ارزښت د بېرته ترلاسه کولو لپاره کلونه هڅې کوي. إن شاء الله، اوسنۍ جګړې یې خپل له لاسه تللی ارزښت د بېرته راګرځولو هڅې ته اړ کړی دی.
