کله چې د نړۍ په ماڼيو کې د ظالمانو سره معاملې کيږي، کله چې د مظلومو فريادونه د نړیوالو رسنیو له نظره پټ ساتل کيږي، کله چې د بې حسۍ او چوپتيا وریځو هر څه پوښلي وي، نو هم هلته، پر وينو رنګین د غزې خاوره کې، د صبر او استقامت نه ډک اهل ایمان شته چې لا هم ټينګ ولاړ دی او وایي:
حسبنا الله ونعم الوكيل!
غزه، يوه داسې سيمه چې د وينو ډنډ ته ورته شوېده، چيرته چې زرګونه ماشومان له خپلو ميندو پلرونو بېل شوي، چيرته چې هره ورځ د ړنګو کورونو لاندې بې ګناه انسانان ژوند له لاسه ورکوي. هلته ميندې د خپل زړګي ټوټی بچیان خاورو ته سپاري، خو د صبر او استقامت څادر پر اوږو اچوي. د غزې کوڅې له اوبو، برېښنا او دوا درملو بې برخې دي، ناروغ ماشومان، زاړه او ټپيان د مرګ له اسوېلو سره مخ دي.
د نړۍ د انسانيت شعار ورکوونکو زړونه مړه شوي او بېغمه ننداره کوي. په لویو ښارونو کي د حقوق بشر چغې خو شته، خو د فلسطيني ماشومانو، سپينږيرو او مېرمنو د درد لپاره نه سفارتي غږ شته، نه بشري مرستې—يوازې بمبار، وژنه او وراني.
موږ د غزې تر څنګ ولاړ يو! ځکه هلته د داسی ایمان خاوندان ژوند کوي، چې د هر ظلم باوجود د ظالم مخې ته سر نه ټيټوي. د غزې د ړنګو جوماتونو نه راوتونکی د اذانونه انګازی شاهدي ورکوي چې اهل ايمان د ظلم په مقابله کې پر الله تعالی توکل لري. د غزی ماشومان په تیګو سره د ټانکونو مقابله کوي، ميندې خپلو زامنو ته د شهادت مبارکي ورکوي، هلته ځوانان د خپلو وران شوو کورونو پر کنډواله ولاړ وي او نارې وهي: لبیک یا اقصی!
نحن مع غزة! ځکه د غزې اوسنی حال موږ ته دا راښيي چې ظلم تلپاتې نه وي، که هر څومره زور وي، که هر څومره بمونه وي، يوه ورځ حق به غالبېږي. موږ وینو چې څنګه یو ټول ښار د محاصرې لاندې دی، اوبه او خواړه بند شوي، او میلیونونه انسانان د جمعي سزا سره مخ دي. څنګه هر ورځ بېګناه وګړي د بمونو په باران کې ژوند له لاسه ورکوي.
موږ د غزې تر څنګ ولاړ يو…
ځکه چې امت د يو بدن په څېر دی؛ که يې يو غړی درد احساس کړي، نو ټول بدن یې بې قراره کېږي. چوپتيا جرم دی، او د مظلوم ملاتړ د ايمان نښه ده.
موږ د غزې تر څنګ ولاړ يو…
ځکه د مظلوم سره ودرېدل زموږ وجيبه ده.
ځکه مسجد اقصی موږ رابولي…
ځکه د ظلم د تيارو په منځ کې د غزې خلکو صبر او توکل زموږ ضميرونه راويښوي.
زموږ رب فرمايي:
“وَلَا تَحْسَبَنَّ اللّٰهَ غَافِلًا عَمَّا يَعْمَلُ الظَّالِمُونَ”
(او ته هرگز دا ګومان مه کوه چې الله د ظالمانو له کړنو ناخبره دی.) [سورة إبراهيم: ۴۲]
موږ د غزې تر څنګ ولاړ يو – په خپلو دعاوو سره، په خپل قلم او ليکنو سره، په خپل مال او خپلو وسايلو سره او موږ به خاموش پاتې نه شو! ځکه د غزې هر معصوم شهید زموږ وجدان راويښوي. دا د انسانيت د بقاء جګړه ده، او موږ به په دې جګړه کې د مظلومو تر څنګ ولاړ يو.
نحن مع غزة، نحن مع الحق، نحن مع المظلومین!
(موږ د غزې تر څنګ يو، موږ د حق تر څنګ يو، موږ د مظلومو تر څنګ يو!)
