د دیني علماوو تکفیر
د داعشي خوارجو لخوا د امت د رباني علماوو په شهادت رسول، د اسلام د پیغمبر صلی الله علیه وسلم د حقیقي وارثانو پر وړاندې د دغې منفورې ډلې د مبارزې یوازې یو اړخ دی، ترڅو د خپلو بادارانو په امر د اسلامي ټولنو په منځ کې د علم رڼا مړه کړي.
د ابن ملجم رښتیني پلویان، د خپلو لوېدیځو بادارانو په استازیتوب د امت پر علماوو یو لوی برید پیل کړی دی، نه یوازې هغه علماء چې ژوندي دي، بلکې هغه روښانفکران چې له دې نړۍ څخه یې سترګې پټې کړي دي، هم د دوی له ناوړه ژبې څخه خوندي نه دي.
داعشي خوارجو د خپل پیدایښت له بدمرغې ورځې راهیسې، د امت د علماوو د بدنامولو لپاره ډېر پلانونه جوړ کړي او عملي کړي یې دي.
هغه زهرجن پلانونه چې اصلي موخه یې د خوارجو له فتنې څخه د امت د منع کولو په برخه کې د دغو علماوو د دعوت بې اغېزې کول و؛ هغه فتنه چې د اسلام په جامه کې یې په اسلامي ټولنو کې وده وکړه او د خپل ظاهري ادعا برعکس، د اسلام د دښمنانو په لاس کې د یوې وسلې په توګه وه او د امت په بدن یې سخت ګوزارونه وکړل.
په ټوله دې موده کې، داعشي خوارجو هر عالم او پوهیالی مسلمان چې د دوی په مخالفه جبهه کې و، په بې بنسټه بهانو تکفیر کړ او خپله ټوله هڅه یې د امت د عوامو او د علم او هدایت د دغو ځلیدونکو ستورو ترمنځ د واټن په رامنځته کولو کې وکړه.
«د دوزخ لوري ته دعوتګران» د لسګونو او سلګونو برنامو څخه یوه وه چې داعشي خوارجو په مجازي فضا او ټولنیزو رسنیو کې د علماوو د څېرې د خرابولو لپاره پیل کړې وه او د دیني بلونکو د خبرو په جعل او تزویرولو یې، سره له دې چې په دیني مسایلو کې ژوره ناپوهي لري، بې شمېره علماء یې تکفیر کړل.
په رښتیا چې د دې زمانې خوارجو د امت علماوو ته په سپکاوي او بې احترامۍ سره، د اسلام پیغمبر صلی الله علیه وسلم او په پایله کې د خدای پاک ذات ته سپکاوی کړی دی، نعوذبالله.
د اسلام پیغمبر صلی الله علیه وسلم په دې اړه داسې فرمایلي دي: “مَن أهانَ عالِماً فَقَد أهانَني، وَمَن أهانَني فَقَد أهانَ اللَّهَ.” (رواه الطبراني و البیهقی).
ژباړه: «هر څوک چې عالم ته سپکاوی وکړي، ما ته یې سپکاوی کړی دی، او هر څوک چې ما ته سپکاوی وکړي، خدای ته یې سپکاوی کړی دی.»
داعشي خوارجو، د پراخو تبلیغاتو په توسط، د رښتینو علماوو د څېرې د تخریبولو هڅه کوله او له دې لارې یې غوښتل خلک له دیني اصیلو سرچینو څخه لیرې کړي.
په هر حال، تاریخ ښودلې ده چې د حقیقت رڼا هیڅکله نه مړه کیږي او علماء، د ټولو دغو توطیو سره سره، د امت د روښانولو په برخه کې خپل رسالت ته دوام ورکوي.
