د امریکا ولسمشر ډونلډ ټرمپ پرون سه شنبه کانګرس ته په خپله لومړۍ وینا کې ادعا وکړه چې د کابل پر نړیوال هوايي ډګر د ۲۰۲۱ز کال د برید ”مسؤل لوړپوړی ترهګر“ یې په پاکستان کې نیولی دی.
د نوموړي د څرګندونو په تعقیب، امریکايي رسنیو خبر ورکړ چې محمد شریف الله (مشهور په جعفر) له افغانستان سره پر کرښه پرته سیمه کې د پاکستان استخباراتو تر هغه وروسته ونیو چې سي آی اې معلومات ورسره شریک کړل. ټرمپ په خپله وینا کې وویل چې پاکستان محمد شریف دوی ته سپارلی او په امریکا کې به محاکمه شي.
المرصاد له خپلو سرچینو د نیول شوي کس په هکله معلومات ترلاسه کړي دي. معلومات څرګندوي چې محمد شریف د کابل د برید طراح نه دی.
د سرچینو له قوله، محمد شریف الله په ۲۰۱۹ز کال کې نیول شوی و او د اګست په ۱۵مه د زندانونو له ماتېدو سره سم له زندانه وتښتېد. نوموړي تر بندي کېدو وړاندې، او تر خوشي کېدو وروسته، د یوه عادي ترصد کوونکي حیثیت درلود، خو کله چې تر فتحې وروسته د افغانستان د اسلامي امارت د امنیتي ځواکونو په عملیاتو کې د داعشیانو د رهبرۍ مهمې هستې له منځه یووړل شوې، شریف الله ته داعشیانو له مجبوریته ستر مسؤلیت وروسپاره.
محمد شریف څوک دی؟
د المرصاد د سرچینو په خبره، محمد شریف یا جعفر په افغانستان کې د داعشیانو لخوا د تش په نوم خلافت تر اعلان وروسته له دې فتنهګرې ډلې سره یوځای شو. په ۲۰۱۹ز کال کې، په یوه برید کې تر کشف کېدو وروسته د تیرې کابل ادارې لخوا ونیول شو. نوموړی په ۲۰۲۱ز کال کې له زندانه ووت. کله چې په ۲۰۲۲ او ۲۰۲۳ز کلونو کې د افغانستان د اسلامي امارت امنیتي ځواکونو د داعشیانو د رهبرۍ مهم کسان له منځه یووړل، میدان جعفر ته پاتې شو او د خراسان څانګې د امنیت ادارې مسؤلیت وروسپارل شو.
دا چې په افغانستان کې نوموړی او شبکه یې د امنیتي ادارو تر دقیق څار او عملیاتو لاندې و، نو د ځان ساتنې په هدف پاکستان ته وتښتېد.
د سرچینو په خبره، محمد شریف د داعشیانو په لیکو کې د جعفر ترڅنګ د انجنیر شریف او اجمل په نومونو هم مشهور و، په دې وروستیو کې چې نوموړی د امنیت ادارې مسؤل و خپل تر لاس لاندې افراد یې د اسحاقزي په نوم د ټلګرام اکاونټ له لارې رهبري کول.
د کابل د نړیوال هوايي ډګر د برید اصلي عاملین څوک وو؟
د ۲۰۲۳ز کال د اپرېل په نهمه، د نیمروز په زرنج ښار کې د افغانستان د اسلامي امارت د استخباراتو د ریاست په عملیاتو کې د عبدالله کابلي په نوم یو کس ووژل شو. د وژل کېدو پر مهال، عبدالله د خراسان څانګې د مهاجرت ادارې مسؤل و.
د ۲۰۲۳ز کال د اپرېل په پنځمه نېټه د هرات ښار په نهمه امنیتي حوزه کې د مجاهدینو په عملیاتو کې د ډاکټر حسین په نوم یو کس ووژل شو. ډاکټر حسین د داعشیانو د خراسان څانګې په اصطلاح ” د استشهادیانو د کتیبې“ مسؤل پاتې شوی و، د وژل کېدو پر مهال یې د خراساني خوارجو د رهبري شورا عضویت درلود او د غرب زون د نظامي مسؤل په حیث یې فعالیت کاوه.
د ډاکټر حسین او عبدالله کابلي له وژل کیدو وروسته د سپينې ماڼۍ ویاند وویل چې دا د کابل هوایي ډګر د برید طراحان وو چې د افغانستان د اسلامي امارت په عملیاتو کې وژل شوي دي.
د کابل د برید په پلان کې د محمد شریف (جعفر) د رول په هکله ولې مبالغه کیږي؟
د ټرمپ اداره او پاکستان دواړه د کابل د هوايي ډګر په برید کې د محمد شریف د رول په تړاو له مبالغې کولو خپل اهداف لري. ټرمپ غواړي چې خپل مخکنی رقیب کمزوری وښيي او د محمد شریف د رول په هکله په مبالغې سره خپله هغه ادعا ثابته کړي چې امریکا او امریکایان تر بل هر چا زیات اهمیت ورته لري او دا نیونه یې ښه ثبوت دی.
بلخوا، پاکستان بیا هڅه کوي چې د امریکا په اشاره په چلېدلو سره د ټرمپ له ادارې سره خپلې اړیکې ښې کړي او یو ځل بیا ”د ترهګرۍ پر وړاندې مبارزه“ کې د امریکا د حلیف په حیث ولوبیږي – حال دا چې په پاکستان کې د محمد شریف شتون او نیول کېدل پخپله پر پاکستان پوښتنې راولاړوي او هغه راپورونه تصدیقوي چې خراساني خوارجو خپلې ځالې پاکستان ته انتقال کړې دي او له هغه ځایه خپل بریدونه په ارام زړه پلان او ترسره کوي.
