ليکنه : مراد أنصار
يوه ورځ يو دوست راته ویل چې که يو سوک راته ووايي چې يو یهودي او يا يو عيسوي يا يو هندو مسلمان شو منم يی خو که يو څوک راته ووايي چې يو کمونيست مسلمان شو کله به يې هم ونه منم.
هوکې !
پخواني کمونيستان له اسلام سره سرسخته دښمني لري او د يو ريښتوني مسلمان ملت په توګه له افغانانو سره د دوی سر سخته دښمني له همدې ټکي څخه سرچينه اخلي. په تيرو څو لسيزو کې د افغانانو د ټولو ناخوالو اصلي عوامل دوی دي ځکه دوی په (۱۳۵۷ هـ ش ) کال کې د پوځي کودتا له لارې سردار داؤدخان او د نوموړي کورنۍ په قتل ورسوله ، واک ته ورسيدل او واک ته له رسيدو څخه وروسته يې په اسلامي او ملي ارزښتونو ملنډې پيل کړيدي. خپل وحشي کمونستي انقلاب ته د تهديد په پلمه يې د افغاني ، ديني ، علمي ، سياسي او ټولنيزو شخصيتونو نيولو او قتل عام ته مخه کړه ، افغانانو يې په وړاندې قيام وکړ خو دوی دغه قيام په قتل عام ځواب کړ خو بيا يې هم زور ونرسيد سرې لښکرې او ورسره اورونه يې د خپل ولس او د خپل هيواد د نابودۍ لپاره راوبلل ، يو نيم مليون افغانان يې شهيدان ، يو مليون معيوب او مليونونو نور يې د خپل هيواد پريښودلو ته اړ کړل او د افغانانو د ژوند ټولې ښيرازی يې له منځه يووړې .
د سرو لښکرو له تيښتې وروسته کله چې د ډاکټر نجيب په مشرۍ د وروستي کمونستي نظام وروستۍ سلګۍ وې له شيطانت څخه يې کار واخيست، د تنظيمونو تر منځ تقسيم شول او د قدرت په سر يې له سمتي او لساني انګيزو بربادوونکو تنظيمي جګړو ته لمن ووهله چې هم په ګران هيواد کې د يو مرکزي اسلامي حکومت د واکمن کيدو مانع شوې او هم د افغانانو د سپيڅلي جهاد د بدنامۍ بب وګرځيده .
په ګران هيواد د امريکا په مشرۍ صليبي ټلوالې له پوځي تيري وروسته کمونستان يو ځل بيا راټول، د پوځي او استخباراتي ارګانونو په سر کې ځای پر ځآی او يو ځل بيا يې د ځوريدلو افغانانو د داړلو او د افغانانو د ديني او ملي ارزښتونو په حرفوي تمسخر او نابودۍ وګمارل شول . د دغه پخوانيو کمونستانو له جملې څخه يوه پيژندل شوې او مرموزه څيره د اشرف غني کليدي ملګری د ملي امنيت مشاور حنيف اتمر دی.
حنيف اتمر د محمد آصف اتمر زوی په خټه پښتون د لغمان ولايت اوسيدونکی دی . د پخواني پاچا ظاهرشاه په دور کې پيدا شوی او ځوانۍ ته په رسيدو يې لومړنۍ رسمي دنده د پخوانيو کمونستانو د خاد ( خدمات امنيت دولتي ) د څارګرې وينې زبيښونکې ادارې په يو رياست کې پيل کړه ، د مجاهدينو په مقابل کې جنګيدلی دی. په ( ۱۹۸۰م ) کال کې کله چې مجاهدينو په جلال آباد باندې لويه حمله پيل کړه حنيف اتمر د مجاهدينو په مقابل کې په جګړه کې يوه پښه له لاسه ورکړه.
د کمونستانو د وروستي رژيم له سقوط څخه وروسته حنيف اتمر انګلستان ته وتښتيده او هلته د انګلستان حکومت پناه ورکړه ، هلته د نورو کمونستانو په څير نوموړی هم ( MIX ) استخدام کړ او له يو څه پټو او ښکاره زده کړو وروسته يې په هغه خيريه مؤسساتو کې بيلابېلې دندې ترسره کړې کومو چې د لويديځ لپاره د خيريه کمکونو تر چتر لاندې جاسوسي کوله . وروسته حنيف اتمر د امريکا له مرکزي استخباراتو ( CIA ) سره اړيکې پيدا کړې او د ( ERC ) په مؤسسه کې چې په سيمه کې د سي آی اې يوه فعاله جاسوسي شبکه ده د مرستيال په توګه وګمارل شو.
د امريکا په مشرۍ د لويديځې ټلوالې له پوځي تيري وروسته د دوی له لوري په تپل شوي نظام کې د کرزي په دوره کې د کليو دبيارغونې او پراختيا د وزير ، ښوونې او روزنې وزير او د کورنيو چارو د وزير په توګه دندې ترسره کړيدي چې بيا په ( ۲۰۱۰ م ) کال کې په لويه جرګه د طالبانو د بريد په مخنيوي کې د پاتې راتلو له امله د ارګ له لوري استعفا ته مجبور کړی او د اشرف غني له راتګ سره سم د نوموړي د کليدي ملګري په توګه راڅرګند او د ملي امنيت د مشاور دنده ورته وسپارل شوه .د نوموړي په اړه اوس فکر کيږي چې د اشرف غني د ټولو کورنيو او بهرنيو پوځي ، امنيتي او سياسي تګلارو او پروژو تر شا او مبتکر يې دی .
د نوموړي په لاس په ټولو جوړو شوو تګلارو او پروژو کې د بهرنيو استخباراتي سازمانونو رنګ له ورايه ښکاري ،له اسلامپالو او جهادپالو خوځښتونو سره د امريکايانو په نسبت زياته کينه لري او د هيواد په حساسو ريښتونو ، ملي ، امنيتي مسايلو کې ډير په بې پروايي عمل کوي او څرنګه چې د نوموړي پروژې د ګران هيواد يووالي او سولې ، ثبات او د ګران هيواد د ديني او ملي ارزښتونو په راتلونکي ته ډيرې خطرناکې تمامېدای شي له همدې امله له دغه پروژو او د دې پروژو له خطرناکو عواقبو څخه د ګرانو هيوادوالو خبرول زموږ ديني او ملي مکلفيت جوړيږي چې دغه پروژې په لاندې ډول دي :
1. د سياسي امتيازاتو په بدل کې له امريکا سره د بدنام امنيتي تړون لاسليک کول او امريکا ته د پوځي اډو ورکول
2. د طالبانو له زندانيانو سره سختي او په دوی باندې د فشار راوړل ، له دوی څخه د بشري او حقوقي آسانتياوو اخيستل د مثال په ډول : د مدافع وکيلانو تهديد ، د بګرام وحشي زندان ته د بنديانو نقلول ، له بنديانو سره د خپلو کورنيو د مخامخ ملاقاتونو بندول ، د استخباراتو د مامورينو په حضور کې د دوی له خوښې سره د بنديانو محاکمه کول ، بنديانو ته په عادي مخالفتونو زيات قيدونه ورکول ، د اعدام د سزا زياتوالی ، له بنديانو سره بد سلوک او د سختو تعذيبونو ورکول ، ټول سياسي بنديان په ځانګړې توګه طالب بنديان د ارګ له بخششي فرمانونو څخه محرومول ، د هغو بنديانو چې د حبس موده يې پوره شوې د آزادۍ مخنيوی او د امريکايانو نوي تور لست ته يې داخلول او په بنديانو باندې دې ته ورته ګڼې نورې سختۍ او فشارونه .
3. د افغانستان او پاکستان په پولو کې د سيمې له استخباراتو سره په ګډه د طالبانو د کمزوري کولو او نورو ګڼو شومو موخو لپاره د داعش ډيزاينول .
4. د ډيورنډ کرښې په رسميت پيژندلو لپاره مقدماتي کارونه او د شرايطو برابرول
5. په سيمه او ګران هيواد کې د ديني مدرسو په ضد ځانګړی کمپاين
6. حزبيانو ته د دروغجنو استخباراتي معلوماتو ورکول او د طالبانو او نورو خواوو پر ضد يې تخريبي فعاليتونو ته هڅول.
7. د امريکايي اشغال او د دوی په لاس د کينول شوي نظام د مشروعيت لپاره د ګران هيواد ، سيمې او نړۍ له ديني عالمانو څخه په ډول ډول نيرنګونو او فشارونو بده استفاده .
8. د ګډ حکومت د واک او زور له اصلي سرچينو څخه اسلام او تير جهاد ته د منسوبو اشخاصو بدنامول او لرې کول او پر ځای يې د سيکولرانو او د ملحدانو د نوي نسل مقررول .
9. په سمتي او لساني توپيرونو د افغانانو ويشل او تر منځ يې له يو بل څخه د کرکې خورول
10. د امريکايانو په اشاره د افغانستان جګړې ته د ځينو عربي هيوادونو راکشول او په سيمه کې يو نوي رقابت ته لمن وهل او نور…
حنيف اتمر د اشرف غني د ټيم کليدي غړی دی ، يادې ټولې پروژې د ګران هيواد د اوس او راتلونکي لپاره ډيرې خطرناکې دي خو وروستۍ پروژه يې يو مخ د افغانانو له آرمانونو او په ګران هيواد کې له سولې او ثبات سره په ټکر کې ده ځکه له يو پلوه دا د امريکايي اشغال د دوام لپاره د مشروعيت د تروړلو هڅه ده او له بله پلوه په افغانانو کې د ټولو هغو اړخونو د اعتبار له منځه وړل او يو ډول يې د امريکايانو په ګټه په جګړه کې راښکېلول دي له کومو څخه چې په راتلونکي کې په ګران هيواد کې د سولې او ثبات په ټينګښت کې د يو ډول رول لوبولو تمه کيدله .
د شنونکو له نظره حنيف اتمر او هغه پخواني کمونستان چې شاوخوا پرې راټول دي غواړي د يادو او نورو خطرناکو پروژو په ډيزاين او عملي کولو لومړی په نامخامخ ډول او د وخت په تيريدو سره کله چې شرايط چمتو شي په مخامخ ډول يو ځل بيا د هيواد واګې ترلاسه کړي او خپل پخوانی ناکام کمونستي انقلاب په يوه نوې بڼه راژوندی او د بهرنيانو په مرسته يې په خاموش ډول تر بريا پورې ورسوي ، په تدريج سره اسلام او جهاد ته منسوب خوځښتونه او اشخاص کونج ته کړي او له طالبانو سره د بهرنيانو په مرسته په دې هيله جګړه اوږده او د ريښتونې سولې هيلې له منځه يوسي چې کيدای شي په پای کې به طالبان کمزوري کړي. خو دا به وخت ثابته کړي چې آيا يو ځل به بيا پخواني کمونستان خپل شوم مراد ته ورسيږي که يا ؟!
