وروسته تر هغه چې د داعشي خوارجو د خراسان څانګه په افغانستان کې سخته وځپل شوه او د رهبرۍ په شمول یې نظامي شبکې تقریبًا په بشپړ ډول شنډې شوې، اوس خوارج مجبوره شوي چې له ځان سره د خپلو پاتې عناصرو د ساتلو لپاره خپل ټول تمرکز د پیسو پر راټولولو وکړي.
د دې خبرې ښه ثبوت د خراسان څانګې د العزایم مجلې په تېر یوه کال کې خپرې شوې ګڼې دي، چې په هره ګڼه کې یې خلک تشویق کړي چې دوی ته پیسې ولېږي او په مسلسل ډول یې خپل اکاونټونه پکې ذکر کړي دي.
څو ورځې وړاندې د العزائم د فتواوو څانګې، په خپلسري ډول، یوه فتوا هم خپره کړه چې په هغې کې یې ویلي و چې د کافرانو بانکي اکاونټونه هک کول او پیسې ترې غلا کول حلال دي. د کافرانو له بانکي حسابونو د پیسو غلا کولو ته له جواز ورکولو، د خراسان څانګې خصوصًا او د داعشیانو عموما، مقصد دا دی چې خپل ملاتړي کسان دې کار ته وهڅوي او په توسط یې خپل ځان تمویل کړي.
مالي ناچارۍ خوارج په ځانګړي ډول په سوریه او افغانستان کې دې ته هم مجبوره کړي چې په اختطاف او د سوداګرو په ډارولو لاس پورې کړي. د تجارانو او د هغوی د خپلوانو اختطافول او بیا یې د پیسو په بدل کې ازادول د خوارجو د اقتصاد ادارې کار دی او په دې وروستیو کې چې نورې لارې ورباندې تړل شوې یا سختې شوې دي، اختطاف ته یې کار ویلی دی ځکه چې دا لار د نورو په نسبت اسانه ده او په کم کوښښ زیات څه پکې ترلاسه کولای شي.
خوارجو ته خپلو په اصطلاح شیوخو او مسؤلینو له بانکي حسابونو د غلا په څېر ډېر وړاندې لا دا اجازه هم ورکړې وه چې خلک اختطاف کړي. د ساري په ډول، په ۱۴۴۳هـ ق کال کې د خوارجو د شام ولایت والي ټولو مسؤلینو ته خبر ورکړی و چې اقتصادي چارې بېرته فعالې کړې، پخپله یې مدیریت کړي او په بشپړ محرمیت سره دې دوام ورکړي. په مکتوب کې همداراز له مسؤلینو غوښتل شوي وو چې د اختطاف او نورو اقتصادي لارو د فعالولو لپاره دې د اړتیاوو – لکه موټر، کور، پیسو وغیره – لیست ورسره شریک کړي.
خوارج د خپل لږ پاتې حیثیت ساتلو لپاره تر وروستي حده کوښښ کوي چې د دوی د اقتصاد ادارې له لوري ترسره شوي غیرشرعي اعمال – لکه اختطاف، سوداګر ګواښل او د پیسو لپاره برید ورباندې کول – پټ وساتي او هیڅکله یې مسؤلیت نه مني.
د یادونې وړ ده چې المرصاد له خپلو سرچینو په خراسان ولایت کې د خوارجو د اقتصاد ادارې له لوري د ترسره شویو اختطافونو مستند معلومات او اسناد ترلاسه کړي، چې په مناسب وخت کې به یې خپاره کړي.
