د پوځي رژیم هر نوی ګام د هغوی د پرمختګ هیلې معکوسه کوي. دا ځل یې د تېرو ناکامو پالیسیو په دوام بله نوې پالیسي له خپلو بادارانو څخه تر لاسه کړې چې پټ او ښکاره دواړه اړخونه یې په خپله د پاکستانیو قومونو او دغه راز د سیمې او ګاونډیو هېوادونو په زیان دي.
هغه څه چې په څرګنده په خپله د پاکستانیو قومونو په زیان تمامېږي؛ هغه د تجارتي لارو بندښت، د خوراکي توکو کمښت، د ورځنیو چارو او اړتیاوو د نه ترسره کېدو یا کم لاسرسي ستونزې دي او دا هغه چارې او اړتیاوې دي چې انساني ژوند ور پورې تړلی دی. او هغه څه چې د سیمې د هېوادونو او په ځانګړي ډول د ګاونډیو هېوادونو په زیان تمېدای شي، هماغه د تجارتي لارو بندښت دی چې په لوړه کچه اقتصادي ګډوډي او فشار رامنځته کوي.
تر دې ورهاخوا، که د خیبر پښتونخوا حالت په همدې ډول دوام وکړي، نو لرې نه ده چې ډېر ژر د سیمې او ګاونډیو هېوادونو پر خوا د مهاجرو څپې پیل شي. که چېرې له پښتونخوا څخه مهاجر ګاونډیو او د سیمې نورو هېوادونو ته ګډوال شي، نو له یوې خوا دغه مهاجر د ژوند له بېشمېره ستونزو سره مخ کېږي او له بلې خوا کوربه هېوادونه مجبور دي چې د سمبالښت او مخنیوي لپاره یې لاس په کار شي؛ چې په روانو ستونزمنو حالاتو کې یې مدیریت د هر هېواد لپاره ربړونکی دی.
د پاکستاني پوځي رژیم لخوا په خیبر پښتونخوا کې د (والي واکمنۍ) تر سیوري لاندې هغه پټ اړخ چې د پاکستان پوځي اداره په څرګنده غواړي د خپلو خلکو، ګاونډیو او سیمهییزو هېوادونو او نړیوالو په سترګو کې خاورې واچوي او خپله دغه کړنه له ترهګرۍ سره د مبارزې او په خپل کور دننه د ناامنۍ د پټولو لپاره بهانه کړي، خو په حقیقت کې غواړي دغه لویه برخه جغرافیه او قومونه لا ډېر د ناامنۍ او محتاجۍ په ټغر کېنوي او خپله هغه لویه موخه چې د داعشیانو روزول، ساتل او اکمالول دي، په خوندي ډول ترلاسه کړي او خپلې اخیستې پروژې بریالۍ کړي.
پښتونخوا ایالت چې افغانستان سره اوږده پوله جوړوي او د دې ایالت اوسېدونکي د تاریخ په اوږدو کې د پاکستانۍ اجیرې ادارې له جوړښت سره جوړ نه وو، نو د پاکستانۍ اجیرې ادارې لخوا یې هم وخت ناوخت حقوق تر پښو لاندې شوي، چې دا دی نن په څرګنده د دوی ټول اسلامي او انساني حقوق تر پښو لاندې کېږي؛ خو د همدې هېواد په سیند، کراچۍ او پنجاب ایالتونو کې وضعیت له پښتونخوا سره د امن، اقتصاد، علم، بیارغونې او نورو اړخونو له زاویې په بشپړ ډول توپیر لري.
څرنګه چې ګاونډي هېوادونه له اوږدې مودې راهیسې د پاکستان د ترهګرې پوځي ادارې لخوا له ننګونو سره مخ دي او لا هم دغه حالت دوام لري، نو په پښتونخوا کې د والي واکمنۍ حاکمیت جوړول او له دغه حاکمیت څخه په ګټې اخیستنې د داعشیانو روزل، ساتل، اکمالول او بیا ګاونډیو او سیمهییزو هېوادونو ته د ترهګریزو موخو لپاره لېږل هغه پټې موخې دي چې د پاکستان ترهګرې ادارې ته یې د شرجوړوونکو بادارانو لخوا پلانونه او پالیسۍ ورکړل شوي دي.
تر ټولو وړاندې، په خپله د پاکستانیو قومونو مسؤولیت دی چې د خپل ځان د ساتنې لپاره د پوځي رژیم په وړاندې راپورته شي. د خپلو علماوو او شرعي مسؤولینو په مرسته د مزدور پوځي رژیم له کړیو ځان خلاص کړي. دغه راز، د پښتونستان د ګاونډیو او سیمهییزو هېوادونو مسؤولیت دی چې د دغه ډول ترهګریزو حالاتو د مقابلې لپاره لاس په کار شي او پرې نه ږدي چې د شرجوړوونکو زبرځواکونو په اشارو، پالیسیو او پلانونو د پاکستان ترهګره اداره د سیمې د امن او پرمختګ خنډ شي.
