پاکستان په بلوچستان کې په جعفر ایکسپریس د برید نه وروسته سمدستي په ټولنیزو رسنیو دا بیانیه خپرول شروع کړل چې ګواکې د دې برید تر شا د افغانستان لاس دی او یا دا برید په افغانستان کې پلان شوی وو او مرکزي کردارونه یې هم هغلته میشت دي.
ورورسته د ټولینزو رسنیو دغه بې اساسه ادعاوو د پاکستان د دولت د رسمي موقف بڼه خپله کړه او د بهرنیو چارو د وزارت ویاند یې هم ورته بیان ورکړ، هسې خو چې ماضي ته وګورو نو پاکستان همیشه ځپله ناکامي په نورو اچولې ده او دا د پاکستان د فوج همیشنی عادت دی چې تل یې پرې خپل خلک غولولي دي.
پاکستان د تېرو څو لسیزو دا روایت خپراوه چې د بلوچ آزادي غوښتونکو سره د هندوستان لاس دی او هغوی ورته لوژستیک او سیاسي سپورټ ورکوي خو اوس یې افغانستان ته ګوته ونیوله. د پاکستان د دې بې اساسه دعوې تر شا عوامل څه دي؟
د پاکستان استخباراتي ادارو د دغه دروغجني بیانیې تر شا خو یو هغه ” پاپولر نیریټیو” یا مشهوره بیانیه ده چې دوی د تېرو دوو کلونو راهیسي د افغانستان خلاف خپله کړې چې غواړي افغانستان د خپلو ټولو ناکامیو زمه دار ثابت کړي او ځان د خپلو خلکو له انتقاد څخه وژغوري.
بل د دې لپاره چې د افغانستان په شواهدو ولاړ موقف کمزوری وښایي دوی د ” بلیم ګیم” لوبه لوبوي. د معلوماتو له مخې پاکستان ته په خصوصي توګه دا معلومات ورکړل شوي دي چې په شهید حاجي خليل الرحمن برید د پاکستان څخه رهبري شوی وو او بریدګر له بلوچستان څخه افغانستان ته راغلی و.
همدغه راز په کندز کې په کابل بانک برید هم د پاکستان څخه رهبري او بریدګر له پاکستان څخه راغلی و، سربیره پر دې په تېر کال کې چې په افغانستان کی څومره بريدونه شوي وو، هغه ټول د پاکستان څخه رهبری شوي وو. د دې ټولو په اړه پاکستان ته ویل شوي او شواهد هم ورسره شریک شوي دي، نو له همدې امله په بلوچستان کې په ریل ګاډی باندې له برید څخه وروسته پاکستان متقابلاً ادعا وکړه چې د برید ماسټر مائینډ په افغانستان کې وو.
بله خبره دا ده چې پر مولانا حامدالحق د برید له وجې چې داعشیانو ترسره کړ، پاکستان تر زیات انتقاد لاندې راغی او په بلوچستان کې چې د داعشیانو کوم مشران ونیول شول او پاکستان یې د هغوی له جملې شریف الله امریکا ته وسپاره او د نورو په سر یې له ایران او روسیې سره معامله روانه کړې، هم پاکستان تر زیاتو انتقادو لاندې دی او ویل کیږي چې پاکستان دوه مخې لوبه شروع کړې ده.
په پاکستان کې د داعش خراسان څانګې د مراکز وجود او د پاکستان لخوا د هغوی د مدیریت مهار او د خرڅلاو د لوبې د شروع کیدو په اړه افغانستان وخت په وخت نړۍ ته خبرداری ورکړی او د دوی دا لوبه یې رسوا کړې ده، نو ځکه وس په مقابل کې پاکستان په افغانستان تورونه لګول پیل کړي دي.
بل دا چې داسې هیڅ کوم ځمکنی حقیقت نشته چې د هغې په بنیاد وویل شې چې ګنې اسلامي امارت دې د بلوچانو تر شا ودریږي ځکه د امارت اسلامي فکر او نظریه له بلوڅ آزادي خوښونکو سره توپیر لري. د بلوچانو جد و جهد د قوم پرستۍ له نظریي سرچینه اخلي او د امارت اسلامی منهج خو د رڼا ورځې په شان روښانه او واضح دی.
نو دا یو روڼ حقیقت دی چی د پاکستان د دې بې اساسه بیانیې تر شا د خپلو ناکامیو نه فرار، په خپله خاوره د داعش له مرکزونو نه توجو اړول او په نړیوال سیاست کې خپل اهمیت او حیثیت ساتلو هڅې دي.
