په شام کې د داعش له خوا د ترسره شويو جنايتونو لنډيز:
په تېرو اوولسو برخو کې په شام کې د داعش له خوا په بېلابېلو سيمو کې د ترسره شويو جنايتونو په اړه څرګندونې وشوې او د امت په ټپي وجود باندې د هغې زهرجن خنجر په اړه هم وويل شول، که څه هم ټولې پېښې په تفصيل سره بيان نه شوې، خو کوچني ټکي او لنډې اشارې هم ددغې ګمراه ډلې ورانکارۍ څرګندوي.
هغه څه چې داعش په شام کې پرېښودل او د تاريخ په پاڼو کې ثبت شول:
۱- له نورو جهادي ډلو سره جګړه
داعش د دې پرځای چې پر اصلي دښمن، يعنې د بشار الاسد پر رژيم او د هغه د ملاتړو بهرنيو ځواکونو باندې تمرکز وکړي، خپلې حملې يې د نورو اسلامي ډلو پر لوري وګرځولې، دې ډلې لومړی په سوريه کې له جبهة النصره (د القاعدې څانګې) سره جګړه پيل کړه او وروسته يې له نورو مجاهدو ډلو، لکه احرار الشام او جيش الاسلام سره جګړه وکړه، دې جګړو د رژيم او د هغه د متحدينو په وړاندې د اسلامپالو جبهه کمزورې کړه.
۲- د مسلمانانو ترمنځ تفرقه اچول
داعش د دې پرځای چې له نورو اسلامي ډلو سره اتحاد وکړي، هغوی يې تکفير کړل او هره ډله چې له دوی سره يې بيعت نه کاوه، هغه يې دښمن ګڼله، دې پاليسۍ د ډېرو هغو مسلمانانو زړونه مات کړل چې د جهاد لپاره سوريې ته تللي وو او د بېلابېلو ډلو ترمنځ يې تفرقه رامنځته کړه.
۳- وحشيانه چلندونه او د جهاد بدنامول
د داعش له خوا سخت او بې رحمه اقدامات، لکه قتل عام، سر پرې کول او د شرعي ضوابطو له مراعات پرته د حدودو تطبيق، د دې لامل شو چې لوېديځو رسنيو او د اسلام دښمنانو د جهاد او مجاهدينو يو منفي انځور وړاندې کړي، دې کار د نړۍ ډېر هغه مسلمانانو زړونه مات کړل چې پخوا يې په سوريه کې د جهاد ملاتړ کاوه.
۴- مشکوکې همکارۍ او د دښمنانو له خوا له داعش څخه د وسيلې په توګه کار اخیستل
ځينې شواهد او تحليلونه ښيي چې داعش په بېلابېلو وختونو کې په غير مستقيم ډول د اسد د رژيم او ان د لوېديځو هېوادونو په ګټه عمل کړی دی، د بېلګې په توګه، داعش په هغو سيمو کې چې د اسد د رژيم مخالفين موجود وو، ناڅاپه بريدونه کول او د دې لامل کېده چې د مخالفينو ځواکونه کمزوري شي او رژيم وکولی شي پرمختګ وکړي.
همدارنګه، ځينې راپورونه ښيي چې د اسد رژيم ځينې پخواني زندانيان چې له داعش سره تړاو لري، خوشې کړل ترڅو دا ډله وده وکړي او نورې اسلامي ډلې له منځه يوسي.
۵- د اسلامي خلافت ارمان ته زيان رسول
داعش ډله د شرعي شرايطو او مناسبې مديريتي وړتيا پرته د خلافت په اعلانولو سره، د دې لامل شوه چې د اسلامي خلافت مفهوم سخت زيانمن شي، ډېر هغه مسلمانان چې په لومړي سر کې يې اسلامي خلافت ته هيله درلوده، د داعش له خوا د جنايتونو په ليدلو سره، له دې ارمان څخه لرې شول او دې موضوع د مجاهدينو او د جهاد د ملاتړو په منځ کې ناهيلېتوب او يأس رامنځته کړ.
په دې برخه کې په هغه څه بسنه کوو چې داعش په شام کې ترسره کړي دي؛ که څه هم حق مو ادا نه شو کړای، خو هيله لرو چې ګرانو لوستونکو له مخکينيو برخو څخه استفاده کړې وي او د هغه تور تاريخ په اړه چې د بغدادي پيروانو رامنځته کړ، په لنډه توګه یې معلومات ترلاسه کړي وي.
د سلسلې په دوام کې، د عراق د سنيانو پر وړاندې د داعش غدر او خيانت تشريح کوو او سلسلې ته به په همدې مضمون سره ادامه ورکړو.
