داعش د تبلیغاتو او ټولنیزو رسنیو له ستراتیژۍ څخه د نورو جنګي او مبارزو ډلو په پرتله په بېسارې توګه زیاته ګټه پورته کړې ده، دوی په حقیقت کې، د خپلو ناوړه کړنو د تورو برخو د پټولو او سپینولو لپاره، له عصري تبلیغاتي وسیلې څخه چې نن ورځ د نړیوالې ټولنې د ابزارو برخه ده، پوره استفاده کړې ده.
په داسې یوه نړۍ کې چې تبلیغاتي وسایل د انسانانو په جذب او راجلبولو کې لومړی او اساسي رول لوبوي، د داعش ډله تر نورو حرکتونو ډیر په دې برخه کې بریالۍ شوې ده، هغه تبلیغات او لویښودنې چې داعش یې د خپلو حرکتونو او اهدافو په اړه کوي، په حقیقت کې د هغو کارونو په پرتله خورا ډیر دي چې دوی په عملي توګه ترسره کړي دي.
هغه تبلیغاتي وسایل او رسنۍ چې د دې ډلې په واک کې و، په پیل کې د ځواک په جذبولو کې اغیزمنې واقع شول او د هغوی پر مټ یې خپل تور لښکر غټ کړی و، خو له هغه ځایه چې تل د حق او باطل او د هغوی د پلویانو ترمنځ مبارزه روانه وي، الله تبارک و تعالی د داعش او د هغوی د متحدینو د اهدافو ناپاکۍ او توروالی نړیوالو ته په ډاګه او ښکاره کړ.
هر څومره چې دوی د خپلې لویي نغارې وهلې، الله تبارک و تعالی د دوی د ناپاکې څیرې په ښودلو کې د اسلام مجاهدینو او سرتیرو ته لا ډېر قوت ورکاوه، تر هغه چې د وخت په تیریدو سره د دوی د اهدافو ناپاکي او د دوی د حرکتونو شومتوب نړیوالو ته او په ځانګړې توګه هغو ځوانانو ته چې د دوی د تبلیغاتو ښکار شوي و، بربنډ شو او الله تبارک و تعالی د دوی ریښتینې څهره راښکاره کړه.
داعش له هغو وسایلو څخه چې د دې لیکنې په تیرو برخو کې یې یادونه وشوه، ډیره استفاده وکړه؛ د بیلګې په توګه، د خپل لښکر لپاره د بشري ځواک د جذب او راجلبولو په برخه کې او له بلې خوا یې په دې توګه وکولی شول چې ډېر مادي امکانات او لویې مالي مرستې ترلاسه کړي.
په داسې نړۍ کې چې له فساد او فتنې ډکه ده، الله تبارک و تعالی لا هم ځینې داسې زړونه د دین په لاره کې هدایت کړي دي چې د دین، حق او باطل په وړاندې د مبارزې او د الله په لاره کې د جهاد لپاره خپل مال او ځان قرباني کوي.
داعش د اهل ثروت کسانو له دې اخلاص څخه ګټه پورته کړه او د هغو تبلیغاتو او رسنیو په واسطه چې په لاس کې یې درلودې، وتوانیدل چې ډیرې شتمنۍ ترلاسه کړي او د یو څه وخت لپاره یې ترې استفاده وکړي.
د داعش پدیده په حقیقت کې د هغې له عقیدوي او فکري بنسټونو څخه څرګندیدله چې دوی د کومو باورونو او اندیشو په لټه کې دي او په راتلونکې کې د امت لپاره کوم پلانونه لري، داعش یوه داسې پدیده ده چې غرب او استعمار هغه غټه کړې ده، هغوی په دې لټه کې وو چې د دوی د وحشتناکو کړنو له لارې نړۍ له جهادي او مبارزو ډلو څخه کرکه پیدا کړي.
د داعش هر حرکت په حقیقت کې په هغو ټولنو کې د وحشت او ویرې د خپرولو لپاره و چې په هغو سیمو کې یې حاکمیت درلود، هغه وحشت چې دوی په نړۍ کې خپور کړی و، نړیوال یې په یوه عجیب غم کې ډوب کړي و، دوی د ترور او وحشت سمبول ګرځیدلي وو او په هره سیمه کې چې یې قدم ایښوده، د خلکو د مالونو او شتمنیو په غصب کولو سره یې د دوی ژوند او عزت هم لوټ کاوه.
دې حرکت چې په حقیقي میدان کې یې خپله ناپاکه څیره ښودلې وه، هڅه یې وکړه چې د مجازي فضا او تبلیغاتي رسنیو په کنټرولولو سره د ځان لپاره نوې څیره جوړه کړي او له دې لارې خلک د یو څه وخت لپاره وغولوي او خپل بازار ژوندی وساتي.
د تبلیغاتي وسایلو ابزاري استعمال د داعش د پټې او تورې څیرې د سپینولو لپاره ډیر اغیزمن واقع شو او ډېر ځوانان له دې لارې دې حرکت ته متوجه شول او ورسره یوځای شول.
په اروپا او هغو رسنیو کې چې هلته یې فعالیت درلود او د داعش لخوا تغذیه کیدل، هغه خلک چې په هغو سیمو کې یې ژوند کاوه او د ایمان او وجدان حس یې لا هم موجود و او د ایمان لمبه یې په زړونو کې بله وه، د دې تبلیغاتو په واسطه جذب او متوجه شول او د دې ډول وسایلو له بشپړې ګټې اخیستنې سره، دوی وتوانیدل چې ډیر خلک، په ځانګړې توګه ځوانان جذب کړي.
خو له هغه ځایه چې الله تبارک و تعالی هر هغه اور چې د حق او حقیقت د له منځه وړلو لپاره بل شي، د اسلامي ټولنې له ریښتینو خلکو (رجالو) په واسطه هغه مړ کوي، همداسې وشول؛ د داعش او د هغوی د تبلیغاتو اغیز د الله د دین د سرښندونکو په همت سره مړ او بې اغیزه شو.
اوس چې داعش حقیقي میدان هم له لاسه ورکړی او مجازي څېره یې هم بربنډه شوې، نورو حیلو او چلونو ته یې مخه کړې ده، دوی په دې لټه کې دي چې د هغو په استفاده د ځان لپاره د ځواک د جذب او راجلبولو بازار ژوندی او ګرم وساتي.
داعش پخوا په خپل تصور کې ځان یو مافوق او نه ماتېدونکی ځواک ګڼه، خو اوس له پرله پسې ماتو سره دې فکر ته رسیدلي دي چې باید د فریب او دوکې له لارې خلک جذب کړي.
