پر داعش ډلې د استخباراتي او فکري پانګونې په لړ کې یوه زیاته برخه مالي امکانات پر دې لګېدلي دي، چې څنګه وکولی شي په رسنیو او مطبوعاتو کې د داعشیانو وحشتونه انعکاس ومومي، دا تصویر هم په مثبت او هم په منفي اړخونو کې مطرح کېږي.
په مثبت اړخ کې کوښښ شوی دی چې داعش یوه اسلامي ډله معرفي کړي، د اسلام او دین خدمتګاران ورته وايي، څو د ځینو اسلامي ارزښتونو او شعارونو په کارولو سره لکه خلافت، خلیفه او د اوسنیو سرحدي او جغرافیوي جوړښتونو له منځه وړلو سره عوامو ته وښيي، چې اوس باید د خپل دین او ارزښتونو د پایښت او خوندیتوب لپاره پر دغه ډله را غونډ شي.
دوی له مبارکو ایتونو او حدیثونو څخه په تحریفي ډول استفاده کوي او هغه برخې یادوي چې د دوی د بقا او ګټو د خوندیتوب لپاره دي، له بده مرغه چې یو شمېر نالوستي او ساده مسلمانان د همدغه تبلیغاتو تر تاثیر لاندې راغلي او پر دغه ډله یې باور کړی دی، خو د هغوی د ناوړه اعمالو او فعالیتونو په لیدو له دغه ډارونکي خوبه را ویښ شوي دي، خو دا هغه مهال چې اوبه له ورخه تېرې دي او داعشیانو هم د خپل وحشي خصلت له مخې دوی د خپلو همرازو یا شریکانو له مخې په ډېر ناوړه شکل له منځه وړي دي.
د داعشي خوارجو ټولې خپرونې او نشرات د افراطیت، تشدد او زیاتي له انځورونو او تعصبي ویناوو څخه ډک دي چې ګواښونکې ژبه لري او ډېر ځله ورباندې د لومړي متن نه، بلکې د ژباړل شوي متن ګومان کېږي، ځکه چې تمویلوونکو یې په خپلو ژبو ورکړي او دوی یې بیا د ژباړې او خپلو ګټو سره د تړلي تعبیر زحمت وېستلی دی.
دلته به لږ داعش ډلې ته د خلکو د جلب او جذب پر څرنګوالي هم تم شو، لومړی خو له بده مرغه چې دوی د خلکو له ناوړه وضعیت، مجبورۍ او اقتصادي حالت څخه پوره ګټه اخیستې ده او له خپلو جذب کړو غړو سره یې د لوړو معاشونو، مادي امکاناتو او امتیازاتو وعدې کړې دي، چې دا یوازې د پیل څو میاشتو کې دوام لري، خو وروسته یې بیا د ابزارو او وسایلو په توګه ورڅخه ناوړه ګټه اخیستې او د نابودۍ کندې ته یې ور ټېل وهلي دي.
عجیبه خو دا ده چې دوی اکثره خپل معاشونه هم د ځايي پیسو پر ځای پر ډالرو او یورو اعلانوي او له پنځو سوو پورته اندازه یې ورته ټاکلې ده چې له همدې امله یو شمېر وزګار ځوانان ایران او نورو هېوادونو ته د مزدورۍ لپاره له تګ څخه دا مناسب بولي، خو دا په عین وخت کې له یوه ترخه حقیقت څخه پرده پورته کوي او هغه دا چې د دوی دا غړي یا جنګیالي نه کومه عقیده او اسلامي مفکوره یا کړنلاره نه لري او نه هم د مقدسو جذبو او جهاد سرتېري دي، بلکې د مادیاتو مزدوران دي او هغه هم د یو داسې چا چې سرچینه او تمویل یې ناڅرګند دي.
د عامو خلکو د جذب بله برخه له مادي امکاناتو او معاشونو له وعدو پرته هغوی ته د دین او جهاد په نامه تبلیغات دي، ځکه دوی ځانونه د جهاد او اسلامي مبارزې د لارې پیروان بولي، حال دا چې دا ناوړه، دروغ او غولوونکې ادعا یې په شیطاني او وحشي اعمالو کې ثابته شوې ده.
ډېر ځله داسې هم شوي چې یو کس یې برمته کړی او د خوشي کېدو په بدل کې یې د اجیر جنګیالي په توګه د هغه د کورنۍ د یوه غړي د نیولو او ګومارنې بدل کې خوشي کړي دي.
