۱: پر مسلمانانو د اطلاعاتي او څارنیزو پروژو پیاوړتیا
د «داعش» په نوم ناوړه پدیده نه یوازې د اسلامي نړۍ لپاره یوه ستره انساني او دیني غمیزه وه، بلکې د کفر لپاره یې یو مناسب فرصت برابر کړ، ترڅو د ترهګرۍ پر وړاندې د مبارزې په پلمه، خپلې امنیتي او څارنیزې پروژې پر مسلمانانو لا پراخې او پیاوړې کړي.
که څه هم دا کرغېړنه ډله د اسلامي شعارونو تر نامه لاندې راڅرګنده شوه، خو د دې ډلې کړنې، جوړښت او پایلې تر هر څه زیات، د لوېدیځو استخباراتي پروژو د موخو لپاره ګټورې تمامې شوې، داعشي خوارجو، په شعوري یا غیر شعوري ډول، د پراخې استخباراتي څارنې، نظامي مداخلې، د اسلام ضد قوانینو د تصویب او د اسلاموېرې د فضا د پراخېدو لپاره تر ټولو مهمه پلمه وړاندې کړه.
بې له شکه، د داعش له ظهور وروسته، د لویدیځو استخباراتي ادارو، په ځانګړې توګه په متحده ایالاتو او اروپا کې، د نویو او بېساري قوانینو په تصویبولو سره د ملیونونو مسلمانانو د محرمیت څارنه وکړه.
د بېلګې په توګه:
د «Patriot Act» قانون د سپتمبر د یوولسمې له پیښو وروسته په متحده ایالاتو کې نافذ شو، خو دا له هیچا پټه نه ده چې د داعش له راڅرګندېدو سره دا قانون لا پراخ او توجیه یې لا پیاوړې شوه، په اروپا کې هم استخباراتي پروژې لکه PRISM، Tempora، XKeyscore او د څېرو پېژندلو سیسټمونه د هوايي ډګرونو او عامه ځایونو لپاره پراخ کړل شول، چې اصلي موخه یې د جوماتونو، اسلامي مرکزونو او مسلمان فعالانو پراخه څارنه وه.
د داعش د آنلاین فعالیتونو له زیاتېدو وروسته، په مجازي فضا کې د اسلامي تمایلاتو د پېژندلو لپاره د مصنوعي ځیرکتیا (هوش مصنوعي) کارول هم ډېر شول، په ځانګړې توګه په یوتیوب، ټیلیګرام او ټویټر کې.
داعش که څه هم د اسلامي هېوادونو دننه سترې ویجاړۍ راوستې، خو له سرحدونو وراخوا یې هم په لویدیځ کې د مسلمانانو پر وړاندې د سختو او محدودو قوانینو نوې څپه را وپاروله، لوېدیځو هېوادونو د داعش له جوړو شوو ګواښونو په ګټې اخیستنې سره داسې قوانین تصویب کړل، چې له مخې یې اسلامي حجاب، دیني فعالیتونه او حتی اسلامي زدهکړې له محدودیتونو سره مخ شوې:
په همدې موده کې، په فرانسه کې د حجاب بندیز او د جوماتونو د جوړېدو خنډونه، د افراطګرۍ پر وړاندې د مبارزې تر عنوان لاندې توجیه شول، په جرمني کې پر امامانو، دیني مرکزونو او حتی د مسلمانانو پر کورنیو سخت څار پیل شو، په انګلستان کې د «Prevent» (مخنیوی) په نامه پروګرام له مخې، د افراطګرۍ سره د مبارزې تر نامه لاندې، د مسلمان ماشومانو تر ټولو کوچني حرکات هم تر ذرهبین لاندې راغلل.
دا ټول اقدامات په عراق او سوریه کې د داعش د فعالیتونو په حواله ترسره شوي، پداسې حال کې چې عام مسلمانانو د دې ډلې څخه خپله بې ګناهي اعلان کړې وه.
