د اسلام مبارک دین له خپل پیل څخه تر اوسه پورې، یوازینی دین دی چې ټول احکام یې د انسان له طبیعت سره سم دي او د هغه ارزښت او وقار یې خوندي ساتلی دی. له همدې امله د تاریخ په اوږدو کې د یاد دین پیروان تر ټولو ارزښتناک او عزتمند خلک وو او دي؛ د تاریخ په ټولو پړاونو کې یې د نړۍ واک او مشري په لاس کې لرلې او عملاً یې غوره رهبري کړې ده.
ځینې انسانان چې د خپلو حسي او حیواني شهواتو بندیان شول، اسلام یې ونه مانه او د یاد دین دښمني یې پیل کړه. په دې لاره کې یې له هیڅ ډول هڅې ډډه ونه کړه؛ خو د دوی ټولې هڅې بې اغیزې او بې ګټې شوې ځکه صفونه یې معين نه وو او مسلمانانو په خپل ټول ځواک د دوی سره مقابله وکړه.
په پای کې د اسلام په وړاندې د خپلو ترسره شویو هڅو د پایلو ترلاسه کولو لپاره، کافرانو بله لاره غوره کړه. د اسلام او مسلمانانو په وړاندې یې ځینې په نامه مسلمانان راپورته کړل. د تاریخ په ټولو دورنو کې داسې خلکو شتون درلود، چې ظاهراً مسلمان وو او اسلامي جامې یې اغوستې وې؛ خو په داخلي او حقیقي بڼه یې د کافرانو د اهدافو ترلاسه کولو لپاره کار کاوه. نن ورځ هم د داعش په نوم یوه ډله، چې د اسلام ادعا هم کوي، د کافرانو سره یوځای شوې ده او غواړي چې ګران اسلام له مېنځه یوسي او بدنام یې کړي.
په حقیقت کې، داعش یوه پدیده نه ده چې د اسلام له متن څخه راپورته شوې وي؛ بلکې دا یو انحرافي غورځنګ دی چې د خپل تاوتریخوالي، سطحي او تکفیري چلند له امله د اسلام د اصلي روح او تعلیماتو سره په ښکاره مخالفت کې قرار لري.
د بېګناه خلکو او حقاني عالمانو د وینې تویولو، ښارونو ویجاړولو او د مذهبي مفاهیمو د تحریفولو له لارې دې ډلې د هر بهرني دښمن په پرتله، اسلام او مسلمانانو ته ډیر زیان رسولی دی. د داعش کړنو د اسلام هغه انځور وړاندې کړ چې بدخواهان او دښمنان یې له کلونو راهیسې د رامېنځته کولو هڅې کوي. د دوی هدف له اسلام څخه فاصله، د مسلمانانو ترمنځ ویش او په اسلامي ځمکو کې د تسلط او مداخلې توجیه کول دي.
کله چې نن ورځ اسلامي هیوادونو ته وګورو، راته جوته به شي چې دا ډله په بشپړ ډول د اسلام د لویو عالمانو او د دین د مبلغینو په له مېنځه وړلو تمرکز کوي. په افغانستان کې د دغه افراطی خوارجو د راڅرګندېدو له پیل راهیسې، دوی ګڼ شمېر دیني عالمان، ښه واعظان او د اسلام وفادار جنګیالي شهیدان کړي دي چې کفار یې له کلونو راهیسې د مېنځه وړلو په لټه کې دي.
د بېلګې په توګه، موږ کولی شو د اسلام د لوی واعظ او داعي، مولانا مجیب الرحمن انصاري تقبلهالله، د اسلامي ټولنې د لوړ پوړي عالم شیخ رحیم الله حقاني تقبلهالله او لوی مجاهد، خلیل الرحمن حقاني تقبلهالله نومونه واخلو. د دوی ټولې هڅې د هغو خلکو د له منځه وړلو لپاره دي چې په ریښتیا د دین سره خواخوږي لري او د اسلام او مسلمانانو ملاتړ کوي.
په پایله کې باید پوه شو چې دا ډله په اوسني عصر کې د کفارو یوه وسیله ده چې اسلام او ریښتیني مسلمانان پرې له مېنځه یوسي او د اسلامي امت ترمنځ ویش رامېنځته کړي.
