عربي او برېتانوي رسنۍ وايي چې برېتانوي حکومت تېره شنبه د سوریې د شمال له روج کمپ څخه یوه برېتانوۍ ښځه او پنځه ماشومان له کردانو تسلیم کړي او خپلې خاورې ته وړي دي.
د راپورونو له مخې، دا شپږ کسیزه کورنۍ د حسکه ولایت په روج کمپ کې ساتل کېده او د کردي ځواکونو او برېتانوي حکومت ترمنځ د یوه تړون له مخې برېتانیا ته سپارل شوې ده.
روج کمپ تر الهول راوروسته د سوریې په شمال کې دویم کمپ دی چې د داعشیانو زرګونه ښځې او ماشومان پکې ساتل کیږي.
دا دوه کمپونه د سوریې په شمال کې د داعشیانو په ښځو او ماشومانو تر هغه وروسته ډک شول چې د خوارجو تنظیم په سوریه او عراق کې ماتې وخوړه. له دې کمپونو د بهرنیو داعشي اتباعو او د هغوی د کورنیو انتقال په داسې حال کې روان دی چې د داعشیانو مشرتابه خپل بندیان په کامل ډول له پامه غورځولي او یوازې په تشو لفظي اخطارونو یې اکتفاء کړې ده.
د سوریې په کمپونو کې د ژوند وضعیت ډېر خراب دی او بندیانو یې په وار وار د خوارجو له رهبري د پاملرنې او خلاصون غوښتنه کړې ده.
څه موده وړاندې د سوریې په زندانونو کې د بندي داعشیانو لخوا د هغه وخت خپل مزعوم خلیفه ته له ګیلې او پیغورونو ډک لیک رسنیز شوی و. په لیک کې له تش په نامه مجهول الهویة خلیفه غوښتل شوي و چې د داعشي بندیانو وضعیت ته پام وکړي که نه نو ”د الله تعالی په حضور کې ځواب ویلو ته دې چمتو شي.“
