د دوشنبې په ورځ، د سنبلې په دېرشمه، سهار وختي د پاکستان د پوځي رژیم جنګي الوتکو یو ځل بیا د افغانستان هوايي حریم نقض کړ او د کونړ ولایت د نورګل ولسوالۍ او د پکتیکا ولایت د برمل ولسوالۍ استوګنیزې سیمې یې په ړندو بمباریو په نښه کړې. د نورګل ولسوالۍ په برید کې یو استوګنیز کور په بشپړه توګه ویجاړ شو او په دې برید کې د یوې کورنۍ درې غړي شهیدان او څلور نور ټپیان شول.
په قربانیانو کې دوه ماشومان او دوه ښځې هم شاملې وې. په برمل ولسوالۍ کې یو دوکان او یو تش کور ویجاړ شول. د اسلامي امارت ویاند، ذبیحالله مجاهد، دغه بریدونه «جنګي جرمونه» او «د افغانستان د خلکو پر وړاندې د جنایتونو دوام» وبلل او ټینګار یې وکړ چې دغه برید به «بېځوابه پاتې نه شي».
دغه برید یو جنګي جرم او د بشریت پر وړاندې جنایت دی. د پاکستان رژیم په دغو ړندو بمباریو سره نه یوازې د افغانستان ملي حاکمیت تر پښو لاندې کړ، بلکې خپل وحشي او بزدلانه مخ یې هم نړۍ ته څرګند کړ. څنګه کېدای شي د بېګناه ماشومانو او ښځو وژنې ته د «ترهګرۍ پر وړاندې د مبارزې» نوم ورکړل شي؟ دغه رژیم خپله ترهګر دی او لاس یې تر مړوند پورې د افغانستان د مظلومو خلکو په وینو ککړ دی.
د ژنیو کنوانسیونونو د لومړي پروتوکول له مخې، هغه بریدونه چې د پوځي او ملکي موخو ترمنځ توپیر نه کوي، په څرګنده منع شوي او جنګي جرم بلل کېږي. د دغو بریدونو په ترسره کولو سره، د پاکستان رژیم ثابته کړې چې هېڅ قانون، اخلاقو او بشري وجدان ته پابند نه دی.
سیاسي کارپوهان په دې باور دي چې د پاکستان رژیم د دغو بریدونو په ترسره کولو سره هڅه کوي د خپلو کورنیو بحرانونو څخه د خلکو پام واړوي او پر خپلو امنیتي ناکامیو پرده واچوي. دغه رژیم چې خپله له اقتصادي، سیاسي او امنیتي بحرانونو سره لاس او ګرېوان دی، غواړي په افغانستان کې د کړکېچ په رامنځته کولو سره د خپلو خلکو پام له کورنیو ستونزو واړوي. ذبیحالله مجاهد هم په څرګندو ټکو ویلي چې د پاکستان بریدونه «په دغه هېواد کې له امنیتي ناکامیو څخه د عامه افکارو د اړولو» په موخه ترسره کېږي. خو دغه بزدلانه تګلاره نه یوازې ستونزه نه شي حل کولای، بلکې د دواړو ګاونډیو هېوادونو ترمنځ کرکه او بېباوري نوره هم زیاتوي.
د دې جنایت په غبرګون کې د اسلامي امارت ویاند ټینګار کړی چې دغه بریدونه به «بېځوابه پاتې نه شي» او افغانستان د خپل ځان د دفاع حق خوندي بولي. دا د پاکستان رژیم ته جدي خبرداری دی چې باید پوه شي افغانستان د ړندو وسلو د ازمېښت میدان نه دی او افغان ملت به هېڅکله د دغو تېریو پر وړاندې سر ټیټ نه کړي. اسلامي امارت په وار وار ثابته کړې چې د افغانستان د خاورې او د خلکو د ناموس په دفاع کې به هېڅ ډول لنډون ونه کړي او دغو تېریو ته به مناسب او پر وخت ځواب ورکړي.
د دغو بېګناه قربانیانو جرم څه دی؟ یوازېنی جرم یې دا دی چې د پاکستان د وینېتږي او ناوړه رژیم په ګاونډ کې ژوند کوي؛ هغه رژیم چې ماشومان په خپلو خوبځایونو کې وژني، ښځې په خپلو کورونو کې وژني او د انسانانو ژوند ته هېڅ درناوی نه لري. دغه رژیم نه یوازې د افغانستان دښمن دی، بلکې د بشریت او په سیمه کې د سولې دښمن هم بلل کېږي.
نړیواله ټولنه هم باید دغه جنایت په کلکو ټکو وغندي او له پاکستاني رژیم څخه وغواړي چې پر ملکي سیمو له هوايي بریدونو لاس واخلي. د دغو جنایتونو پر وړاندې چوپتیا له بشریت سره خیانت او د جنایتکارانو هڅونه ده. تاریخ ګواه دی چې هېڅ ځواک ونه توانېد چې افغان ملت پر ګونډو کړي او د پاکستان رژیم هم له دې قاعدې مستثنا نه دی.
