که څه هم نن داعشي خوارج ځانونه د اسلامي ارزښتونو د دفاع بیرغوال بولي، خو په حقیقت کې د استعماري هېوادونو د استخباراتو تر سیوري لاندې فعالیت کوي. د شیخ ادریس صاحب ترور یو ځل بیا د داعش ناوړه او کرغېړنه څېره ښکاره کړه او څرګنده یې کړه چې دغه ډله په کامله توګه د بهرنیو استخباراتو په دام کې نښتې. دا ځل هم د پاکستان رژیم، د خپل کرغېړن او خونړي تاریخ له مخې، له داعشي خوارجو د یوې وسیلې په توګه کار واخیست او د اسلامي امت له منځه یې د رسول الله صلیاللهعلیهوسلم یو مخلص لاروی عالم له منځه یووړ.
د پاکستان پوځي رژیم د خپل پیدایښت له لومړیو ورځو تر نن پورې، په ښکاره او پټه توګه د امت د علماوو په وژنه کې لاسونه په وینو لړلي. شیخ ادریس صاحب د اسلامي امت په منځ کې یو نوموتی، دروند او د باور وړ عالم و، چې د علم، دعوت او اصلاح په ډګر کې یې ځانګړی مقام درلود. د اسلام دښمنانو تل هڅه کړې چې د حق د لارې مشالونه، یعنې د دین علما او روزونکي، په نښه کړي، څو مسلمانان له خپل دین، تاریخ او اسلامي هویت څخه لرې وساتي او خپل استعماري نفوذ ته دوام ورکړي. په همدې موخه د پاکستان رژیم یو ځل بیا له داعشي خوارجو د یوې خونړۍ وسیلې په توګه کار واخیست.
که څه هم د شیخ ادریس صاحب د ترور مسئولیت داعشي خوارجو پر غاړه واخیست، خو د دې پېښې تر شا د پاکستاني استخباراتو ښکاره او مستقیم لاس تر سترګو کېږي. د پاکستان پوځي رژیم له پیله د همدې لپاره رامنځته شوی و، څو په سیمه کې د بریتانوي استعمار موخې خوندي او عملي کړي. بریتانیا وروسته له هغه چې د زمریانو په ټاټوبي، افغانستان، کې له ماتې او ناکامۍ سره مخ شوه، د خپلو استعماري ارمانونو د بقا لپاره یې پاکستان د یوه اسلامي دولت په نوم له هند څخه بېل کړ؛ خو د دې ظاهري نوم تر شا ژورې سیاسي او استعماري موخې پرتې وې. همدا لامل دی چې پاکستان هېڅکله نه غواړي په افغانستان کې اسلامي نظام حاکم شي او غربي قوانین او استعماري تګلارې دې تر پوښتنې لاندې شي.
د اسلامي نظام د موخې ګرځولو لپاره یې بېلابېلې پلمې جوړې کړې او د شیخ ادریس صاحب ترور یې د ډیورنډ فرضي کرښې سیمې ته منسوب کړ، څو نړۍ ته داسې وښيي چې ګواکې افغانستان د تروریزم مرکز دی. همداراز یې هڅه وکړه چې د علماوو د ترور پر وړاندې د اسلامي امت د علماوو غوسه د افغانستان پر ضد راوپاروي او هغوی چوپ وساتي، ترڅو د اسلامي نظام د کمزوري کولو او نسکورولو زمینه برابره شي. خو دغه ارمان به له ځان سره ګور ته یوسي؛ ځکه اسلامي امت نن تر بل هر وخت ډېر بیدار او هوښیار شوی او د اسلامي نظام ترڅنګ په خپلو وینو ولاړ دی.
په پای کې د امت علماوو ته پیغام دا دی چې دا لومړی ځل نه دی چې د پاکستان پوځي رژیم او داعشي خوارج اسلام ته زیان رسوي. تر دې وړاندې یې هم ګڼ شمېر علما د شهادت لوړو درجو ته رسولي دي. شیخ رحیمالله حقاني او یو شمېر نور علما، د پاکستان په لارښوونه او د همدې فتنهګرې او د قدرتونو له استخباراتو سره تړلې ډلې په لاس، شهیدان شوي دي. نه د پاکستان پوځي رژیم اسلامي دی او نه داعشي خوارج د اسلامي امت استازیتوب کولی شي؛ بلکې دواړه د سیمې په کچه د اسلام د دښمنانو د موخو د تحقق لپاره کارول کېږي.
