په سيمه کې د پاکستان پوځي رژيم د خپل منافقانه چلند له امله د تور بازار په مارکېټ کې لومړی مقام خپل کړی، له اوږدې مودې راهيسې يې په سختو شرایطو کې د سولې ژمنې تکرار کړې دي؛ خو په عادي حالاتو کې يې د جګړې دوام ته لاره هواره کړې ده. دا چې د داعش په څېر وحشي سازمان په پاکستان کې پراخه نفوذ، مراکز او پټنځايونه لري، نو هرکله چې د نړیوالې ټولنې لخوا په پاکستان سياسي فشارونه زيات شي، د سولې او تړون غږونه پورته کوي؛ خو کله چې وضعیت عادي شي، بیا د ډېورنډ فرضي کرښې په اوږدو کې په ملکي خلکو ظلم او ړندو بمباريو ته مخه کړي.
دا ډول تکراري او دوه ګوني حالت نه يوازې د سولې په باور د پاکستان او افغانستان د ملکي خلکو باور کمزوری کوي، بلکې د دوی په زړونو کې دا احساس هم پیدا کوي چې سیاسي شعارونه د عملي اقداماتو ځای نه شي نیولی.
همداراز د پاکستان د پوځي رژيم دې منافقانه کردار ته په کتو سره، ډېری بانفوذه او سياسي مشران هم دې حالت ګنګس کړي دي، داسې چې له يوې خوا د پاکستان په حکومت کې د واکمنې کړۍ لخوا په مکرر ډول د سولې غوښتنه کېږي، خو له بلې خوا د سياسي فشارونو په کمېدو سره؛ د دغو خبرو پای اکثره وخت د بې ګناه او مظلومو افغانانو په شهادت او د ظلم په زیاتېدو تمام شوی دی.
د پاکستاني حکومت په اړه، د سيمې د باخبره سرچينو راپورونه هم دا دي، چې پاکستان له پخوا راهيسې د وسلوالو د ملاتړ مخينه لري؛ خو په دې وروستيو کې يې د وسلوالو مخالفينو او په تېره بيا د داعش روزنې، تمويل او ملاتړ ته ډېره پاملرنه کړې ده. کله چې د پاکستان حکومت د خپلو نيابتي ډلو په واسطه د سيمي او نړۍ امنيت ګواښي، نو په داسې حالت کې د سولې خبرې تر ډېره دوام نشي کولی. له همدې امله یوازې سياسي اعلاميې کافي نه دي بلکې د باور جوړولو لپاره عملي ګامونه مهم دي.
برعکس، د افغانستان اسلامي امارت تل د سيمي او نړۍ د امن او ثبات لپاره نه يوازې دا چې خپله ژمنتیا يې څرګنده کړې بلکې عملي ګامونه يې هم پورته کړي. او په دې باور دی چې نړیواله سوله موږ ته ځانګړی ارزښت لري او همداراز اسلامي امارت له ګاونډیانو سره د رښتيني چلند لپاره لازم ګامونه هم اوچت کړي دي.
پاکستان زموږ یوازینۍ همسايه هېواد نه دی، بلکې موږ پنځه نور همسايه ګان هم لرو چې د ټولو سره د مثبت تعامل په رڼا کې ښې اړيکې لرو، دغه ټول پنځه واړه همسايه ګان له موږ څخه خوښ او راضي دي، ځکه چې موږ له هېڅ چا سره دښمني نه غواړو، لکه څنګه چې زموږ په ګران هېواد کې سوله حاکمه ده؛ همداراز د سيمې په اړه د سولې او ثبات غوښتونکي يو.
خو بدبختانه چې د پاکستان د پوځي رژيم تبليغاتي محصول يوازې د سياسي تورونو ژبه کاروي. د افغانستان د اسلامي امارت د بدنامولو لپاره هغه سطحي مسائل رابرسېره کوي چې يا خو د اسلامي امارت پورې هېڅ تړاو نه لري او يا محض کاذب تورونه او افواهات وي او بس. نړېواله ټولنه بايد په دې برخه کې د اسلامي امارت په اړه د پرديو د تبليغاتي محصول راپورونه ناديده ونيسي او د اسلامي امارت د رسمي سرچينو اطلاعات جدي ونيسي، په کومو کې چې د سيمې او نړۍ د ثبات او امن مفهوم پروت دی.
