تېره شپه (٤ رمضان / ٢ حوت) ناوخته د پاکستان پوځي رژيم د افغانستان حریم نقض کړ او په پکتیکا او ننګرهار کې یې پنځه ملکي اهداف په نښه کړل.
د معلوماتو له مخې، پاکستاني الوتکو د پکتیکا د برمل ولسوالۍ په مرغه سیمه کې یوه دیني مدرسه بمبار کړه، چې په نتیجه کې یې مدرسه تخریب شوه خو له نېکه مرغه کوم چا ته زیان نه دی اوښتی.
همداراز، الوتکو د اورګون ولسوالۍ په باليشو جبار کلا سيمه کې یو کور بمبار کړی، خو چا ته پکې تلفات نه دي اوښتي.
د پاکستاني رژيم پوځ د تیرې شپې تر ټولو ستر جنایت د ننګرهار د بهسودو ولسوالۍ په ګردي کڅ سیمه کې ترسره کړ. په یاده سیمه کې الوتکو د شهاب الدین په نوم د یوه عام کس کور په نښه کړ، چې له امله یې د ښځو او ماشومانو په شمول ١٧ کسان شهیدان او یو شمېر نور ټپیان شول.
پاکستانیو الوتکو د خوګیاڼو په کوز بیهار کې د مجاهدینو پر یوه پوسته او د غني خېلو په ګلاهي سیمه کې پر یوه کور هم بریدونه کړي، خو لله الحمد د دوو کسانو له سحطي ټپي کېدو پرته چا ته زیان نه دی پکې اوښتی.
تر دې جنایت او تېري وروسته، د پاکستان د اطلاعاتو او نشریاتو وزارت په یوه اعلامیه کې ادعا وکړه چې دا عملیات د استخباراتي معلوماتو پر بناء په مشخصو اهدافو په دقیق ډول ترسره شول، خو په رسنیو کې د ملکي وګړو د شهادت تصویرونو او هالي ورانو تعمیرونو د دوی ادعا په شرموونکي ډول رسوا کړه.
د افغانستان د اسلامي امارت د دفاع وزارت د پاکستان دې جنایت او تېري ته (چې ټول هدف یې د خپلې ناکامي پټول او د امریکا توجه جلبول دي) په غبرګون کې ویلي چې په مناسب وخت کې به مناسب او حساب شوی ځواب ورکړي.
تر دې وړاندې هم د پاکستان پوځي رژيم د افغانستان حریم نقض کړی و او د بهرنیو جنګیالیو د پټنځایونو د هدف ګرځولو ادعا یې کړې وه، خو هر ځل یې د تېري قربانیان عام ملکي وګړي پاتې شوي دي.
