تېرہ ورځ د کابل په شهرنو سیمه کې، پر یوه هوټل ځانمرګی برید وشو چې یو چینایي تبعه او شپږ افغانان پکښې شهیدان شول. وروسته، د برید مسؤلیت د معاصرو خوارجو داعش خراسان ډلې ومانه.
د داعش خراسان لخوا د برید د مسؤلیت منلو سره، دوه مهم ټکي څرګند شول چې د دې ډلې په دعوو او عمل کې یی توپیر لا روښانه کړ، د دې ناوړه عمل نه دا نوره هم څرګنده شوه چې د دوی د خلافت دعوه جعلي او دروغجنه ده، او هېڅ ریښتینی اساس نه لري.
کله چې دې خوارجو په عراق او شام کې خپل فعالیت پیل کړ او بیا یې فعالیت تر افغانستان وغځیده، نو دوی د مسلمانانو او په ځانګړې توګه د مجاهدینو وژنه یوازې د دې لپاره ترسره کوله چې د دوی په وینا، اوس خلافت قایم شوی دی. دوی ټولو مسلمانانو ته د خلافت سره د وفادارۍ د اعلانولو امر کاوه. هر هغه چا چې د دوی تش په نوم خلافت سره یې د وفادارۍ اعلان نه کاوه، هغه یې واژه.
دوی ادعا کوله چې داسې یو نظام یې جوړ کړی چې ټول مسلمانان به تر یوه ځانګړې چتر لاندې راولي، که هغوی هر چیرې وي، د هر هیواد یا جغرافیې سره یې تعلق وي، خو چې مسلمان وي د دوی د خلافت وګړی به وي، ځکه د دوی په وینا د دې نظام هدف د مسلمانانو فلاح او یووالی وو.
خو که اوس په دغه معیار په خپله دغه خوارج وتلل شي، نو دا د دوی د ټولو دعوو په ضد یو ښکاره رد دی. ځکه چې تېره ورځ دې ډلې د چینایي مسلمانانو پر یوه هوټل ځکه برید وکړ، چې هغوی چینایي تبعه وو؛ سره له دې چې هغوی مسلمانان وو او د سنکیانګ د هغې سیمې سره یې تعلق وو چې دوی پخپله د دغې سیمې د مسلمانانو د مظلومیت په اړه خبرې کوي.
پوښتنه دا ده چې آیا دا د یو مسلمان د وژنې دلیل کیدای شي، چې هغه د یوه داسې هیواد سره تعلق لري چې تاسو ور سره په جګړه کې ښکېل یاست؟ آیا دا د دې لپاره جواز ور کوي چې یو مسلمان یوازې په دې اساس ووژل شي چې هغه په بل مسلمان هېواد کې کاروبار کوي؟
آیا د خلافت او اسلامي اجتماعیت مفهوم دا اجازه ور کوي چې د یو چینایي تبعه مسلمان په توګه په کابل کې ژوند کول حرام دی او د دې جرم په بنیاد د هغه وژل جایز دي؟
تاسو څو بې ګناه مسلمانان وژلي چې یوازې د هوټل مخې ته تېرېدل، یا به د خوړو د خوړلو لپاره دغه هوټل ته ورغلي وو. دا مهمه نه ده چې هغوی د کوم هېواد یا جغرافیې څخه و، هغوی مسلمانان وو او د دین پر بنسټ تعلق سره لري، نه دا چې له کوم هېواد سره تړاو لري.
دویمه خبره دا چې ستاسو دې ناوړه عمل دا هم ثابته کړه، چې تاسو کوم نظریاتي، مذهبي یا جهادي تنظیم نه یاست، بلکې تاسو د نړۍ د څو هېوادونو د استخباراتي ادارو نیابتې ډله یاست، ستاسو هر عمل د دوی د ګټو د خوندي کولو لپاره ترسره کېږي، او ستاسو عملیات د هغوی د سیاست پر اساس دي، چې کله او څنګه هغوی در ته ووايي تاسو یې ترسره کوی.
ستاسو حقیقت او حیثیت اوس په بشپړ ډول څرګند شوی دی، تاسو یوازې د کرایې قاتلان یاست چې د پیسو لپاره جګړه کوئ، تاسو د خپلې کمزورۍ او د ماتې د احساس پټولو لپاره د هر بې ګناه مسلمان وژلو ته تیار یاست.
