د خوارجو د ګمراهۍ او تکفیر حکم
ټول اسلامي امت په دې اتفاق کړی چې خوارج يوه ګمراهه ډله ده، او له اصلي اسلامي منهج څخه يې انحراف کړی دی، تر دې چې ځینو علماوو خوارج کافران بللي دي، او ځینې دلایل یې وړاندې کړي دي، د هغو د دلایلو تفصیل په لاندې ډول دی.
۱:- عن أبي سلمة، وعطاء بن يسار أنهما أتيا أبا سعيد الخدري فسألاه عن الحرورية: أسمعت النبي صلى الله عليه وسلم؟ فقال: لا أدري ما الحرورية، سمعت النبي صلى الله عليه وسلم يقول: “يخرج في هذه الأمة -ولم يقل منها– قوم تحقرون صلاتكم مع صلاتهم (صحيح مسلم)
ژباړه: “ابو سلمه او عطاء بن يسار د ابو سعيد خدري رضی الله عنه خدمت ته حاضر شول او د حروريه (خوارجو) په اړه یې ترې وپوښتل، او ویې ویل:”آیا تا له رسول الله صلی الله علیه وسلم نه د دوی په اړه څه اورېدلي دي؟”هغه وویل: “زه نه پوهېږم حروریه څه شی ده، خو ما له رسول الله صلی الله علیه وسلم نه دا خبره اورېدلې:’په دې امت کې به یو قوم را څرګند شي، تاسو به خپل لمونځونه د دوی له لمانځه کم وګڼئ، او خپلې روژې به د دوی له روژو کمې وبولئ، دوی به قرآن لولي، خو قرآن به د دوی له مرۍ څخه پورته نه تېرېږي، له دین څخه به داسې وځي لکه غشی چې له ښکار تېر شي…'”
وجه د استدلال:
نبي کریم صلی الله علیه وسلم د دوی نسبت له امت سره نه دی ور کړی، یعنې دوی له امت څخه نه دي، او دا اشاره ده چې دوی له اسلامه وتلي دي.
۲:- رسول الله صلی الله علیه وسلم د ذوالخویصره التمیمي او د هغه د پیروانو په اړه فرمايي:”يقرؤون القرآن لا يجاوز حناجرهم، يمرقون من الدين كما يمرق السهم من الرمية.”(صحيح البخاري)
او په بل روایت کې راغلي:”يمرقون من الإسلام كما يمرق السهم من الرمية” ژباړه:دوی به قرآن لولي، خو له ستوني به یې نه اوړي، له دین څخه به داسې ووځي لکه غشی چې له ښکار تېرېږي.”
وجه د استدلال: نبي صلی الله علیه وسلم د دوی د دین پرېښودو تشبیه د غشي له تېښته سره کړې، یعنې دوی له دین څخه بشپړ وتلي دي، او په زړونو کې یې هیڅ دیني اثر نشته.
۳:- نبی علیه الصلاة والسلام فرمايي:”لئن أدركتهم لأقتلنهم قتل عاد (صحيح البخاري)او په بل روايت کې راځي:”لأقتلنهم قتل ثمود.
“ژباړه:”که زه هغوی (خوارجو) ته ورسېږم، نو خامخا به یې داسې ووژنم لکه د عاد یا ثمود قوم.”
دا ښکاره خبره ده چي عاد اوثمود دواړه کافران وو، او د کفر په سبب هلاک شول، نو خوارج چې له هغوی سره تشبیه شوي، دا د هغوی په کفر دلالت کوي.
۴:- علماوو دا هم د خوارجو پر کفر دلیل ګرځولی، چې دوی د صحابه کرامو تکفیر کاوه، د حديثو په کتابونو کې راځي چې خوارجو د حضرت علي، معاویه، او نورو صحابه کرامو تکفیر کاوه.
د صحابه وو تکفیر، په حقیقت کې د رسول الله صلی الله علیه وسلم د شهادت څخه انکار دی، چې هغوی ته یې د جنت زېری ورکړی و او هر څوک چې رسول الله صلی الله علیه وسلم دروغجن وبولي، هغه کافر دی.
۵:- په ابن ماجه کي روايت دی چې نبی صلی الله علیه وسلم فرمايي:”الخوارج كلاب أهل النار، شرّ الخلق والخليقة، يقتلهم أقرب الطائفتين إلى الحق.”
ژباړه: “خوارج د دوزخ سپيان دي، د مخلوقاتو تر ټولو بد خلک دي، هغوی به هغه ډله وژني چې حق ته نږدې وي.”
نو دا حدیث د دې لپاره واضح دلیل دی چې خوارج له اسلامه وتلي دي.
