د سوریې استخباراتو هغه داعشی قومندان نیولی چې د ابو ماریا القحطاني په شهادت کې یې لاس درلود او د سیده زینب پر زیارت باندې شنډ شوی برید یې پلان کړی و.
د سوریې دولتي اژانس په استخباراتو کې دننه د سرچینو له قوله لیکلي چې ابو الحارث العراقي د عراق لپاره د داعش په تشکیلاتو کې مهم مسؤلیتونه درلودل او د بریدونو د اکمالاتو او تجهیز مرستیال هم پاتې شوی دی.
سانا اژانس د خپلو سرچینو په حواله ویلي چې العراقي په سوریه کې په ترسره شویو ګڼ شمېر بریدونو کې ښکېل و او په هغه برید کې یې هم لاس درلود چې د شام د جهاد یو مخکښ قومندان، ابو ماریا القحطاني (میسرة الجبوري)، پکې شهید شو.
د خبر له مخې، هغې ډلې هم د ابو الحارث العراقي تر لاس لاندې فعالیت کاوه چې تېره میاشت یې د دمشق د سیده زینب پر زیارت د برید پلان جوړ کړی و، خو هدف ته تر رسېدو وړاندې ونیول شوه.
د یادونې وړ ده، داعشیانو د بشار الاسد د حکومت تر نسکورېدو وروسته ګواښ کړی و چې د نوي حاکم شوي نظام پر ضد به خپلې جګړې ته دوام ورکوي، خو له وروستیو نیونو ښکاري چې د سوریې نوی حکومت یې ګواښ ته متوجه دی او نه پرېږدي چې د سوریې د ولس ژوند او مال د دې خونخوارې ډلې د وحشیانه اعمالو قرباني شي.
