په اوسنۍ نړۍ چې موږ پکې ژوند کوو، د حق او باطل ترمنځ مبارزه تاریخي ماهیت لري او په دې عصر کې یې هم ګڼې ننګونې راولاړې کړې دي، د حق او باطل ترمنځ مبارزه، چې له مودو مودو را روانه ده؛ خو تل یې په پایله کې حق واکمن شوی او بریا د حق او حقیقت پیروانو په برخه شوې ده.
په داسې نړۍ کې چې لوېدیځ او لوېدیځ پالونکو د ځمکې واک اختیار په لاس کې نیولی دی او د بادار په څېر د ځمکې او خلکو پر سر واک چلوي، لا هم د نړۍ په څنډو او ګوښو کې داسې مسلمانان او ډلې شته چې د دې واکمنۍ منلو ته چمتو نه دي او د غلامۍ سر یې نه دی ټیټ کړی.
کله چې د دې زورواکو او شتمنو ترمنځ د مسلمانانو او د حق غوښتونکو ډلو جګړې زور واخیست، لوېدیځ او زورواکو سیاستوالو دا درک کړه چې په مستقیمه مقابله کې دوی هیڅکله د دې حرکتونو مخنیوی نه شي کولی.
له همدې امله یې فکر وکړ او دې پایلې ته ورسېدل چې باید اسلام له دننه وځپي او د وَینو په څېر دې د اسلام قوي کلا کمزورې او ړنګه کړي، هغوی هڅه وکړه چې هغه خوځښتونه او ډلې چې په اسلامي نړۍ کې ژوند کوي، د خپلو موخو لپاره غلامان وګرځوي او د اسلام ضد اهدافو لپاره یې اجیران کړي.
په داسې حال کې چې دوی د مسلمانانو له منځه د اسلام د ویجاړولو او ختمولو په فکر کې و، د اسلام ښکلا لوېدیځ ته رسېدلې وه، د دې پاک او الهي دین د مطالعې بهیر پیل شوی و، نړۍ دې باور ته رسېدلې وه چې اسلام یو الهي دین دی او د انسان د نېکمرغۍ لپاره راغلی دی.
د مسلمانانو د سالمې ټولنیزې ژوندلارې له مطالعې او لیدو وروسته په لوېدیځ کې د اسلام منلو علاقه او مینه په بېساري ډول ډېره شوې وه، دغه زورواکي د دې حالت په لیدو دې پایلې ته ورسېدل چې که اسلامي عدالت د دوی خاورې ته ورسېږي، نو د دوی په کاذب ځواک او قدرت کې به کمی راشي او د ظلم او جفا واکمني به یې ختمه شي.
له همدې امله یې په خپلو خاورو کې د اسلامهراسۍ فکر خپور کړ، ترڅو خلک د دې عدالتمحور تعلیماتو څخه لرې وساتي او د خپل واک موده اوږده کړي، خو لکه څنګه چې دا یوازې یو دروغ و، دوی پوهېدل چې خلک به د دې دروغو حقیقت ته ورسېږي، نو پریکړه یې وکړه چې د اسلام او مسلمانانو په نوم داسې یو تشکیلات رامنځته کړي چې د ظلم کوي او ذ فساد په لار روان شي او په فکرونو کې یې تباهي څپې ووهي.
ترڅو د دوی دې ظلمپالو فعالیتونو په ښودلو سره خپلو خلکو ته ووايي چې اسلام او مسلمان کېدل همدا دي، او هغه څه چې دوی په تاریخ او خپلو مطالعاتو کې ورته رسېدلي دي، یوازې د یو شمېر مسلمانانو توهم او یو غلط ګومان دی.
داعش چې د ظلمپالو او جفاکارانو د فکر جوړه ډله وه، د دوی لخوا د یوې مهرې په څېر وکارول شوه ترڅو د هغوی د فاسدو افکارو او بشر ضد کړنو په وسیله نړۍ له اسلام څخه کرکه وکړي او د اسلام پاکه او سمه لار ناسمه، توحش او ظلم ښکاره کړي.
داعش د دې قضیې لپاره په نړۍ کې تر ټولو غوره فرصت برابر کړی و، او ښایي همدې موخې لپاره رامنځته شوي وو.
